Голландийидики уйғурлар 5-июл дәнһахта өткүзүлидиған намайиш һәққидә музакириләшти

Голландийидики “явропа шәрқий түркистан маарип җәмийити” ниң бу айлиқ паалийити үтрехт вилайитигә қарашлиқ бир далада илип берилди. Паалийәткә җәмийәт әзалири вә башқа шәрқий түркистанлиқ вәтәндашлардин болуп 30 артуқ уйғур қатнашти.
Ихтиярий мухбиримиз пидаий
2012-07-03
Share
gollandiye-dala-paaliyiti-305.jpg Голландийидики уйғурлар 5-июл дәнһахта өткүзүлидиған намайиш һәққидә музакириләшти. 2012-Йили 30-июн.
RFA/Pidaiy

Шу йәр вақти чүш саәт 2 дин кәч саәт 9 ға қәдәр давам қилған бу паалийәт қуран кәрим телавити билән башланди. Тәлим-тәрбийә программисида, алдимизда келиватқан рамзан ейиниң пәзилити вә бу ай-күнләрдә ғәниймәт билишкә тегишлик болған муһим ислами мәсилиләр һәққидә мәлуматлар берилди вә шу темини чөридигән һалда, һәрким дуч кәлгән мәсилилиридин соал сорап ‏җаваб алди.

Әркин муназирә темилири таза қизип юқири пәллигә чиққан минутларда, вәтән ичи-сиртидики бир қатар мәсилиләр муһакимә қилинди. Тәшкилатлар вә шәхсләрдә сақлиниватқан артуқчилиқ вә кәмчиликләр һәққидә тәклип вә тәрбийиләр елип берилип, өз-ара иттипақлиқ күчәйтилди.

Охшиған уйғур каваплири, уйғурчә сорунлири һәмдә ана тилидики күлкә-чақчақлири билән, бир сәптә янму-ян туруп ада қилған намазлири билән, бир күнини хушал бир кәйпиятта өткүзгән паалийәт әһли, йәнә бир қетимлиқ учрашқучилик бир-биригә аманлиқ тиләп тарқилишти.

“явропа шәрқий түркистан маарип җәмийити” голландийидики уйғурларниң диний тәлим-тәрбийә вә қаидә-йосунлириға аит хизмәтләр билән шуғуллиниватқан тәшкилат болуп, паалийәтлири изчил вә салмақ давам қилмақта. Уларниң бу қетимлиқ айлиқ сөһбәт паалийитигә, “голландийә уйғур бирлики тәшкилати” вә “голландийә уйғур яшлар партийиси тәшкилати” қатарлиқларниң вәкиллириму тәклип билән қатнашқан болуп, 5-июл күни илип берилидиған намайишниң тәртиплири вә пилан-лайиһәлири кеңәш қилинди. Паалийәт иштиракчилири, 5-июл күни дәнһахта өткүзүлидиған намайиш паалийитигә, голландийидики барлиқ вәтәндашларни сәпәрвәр қилиш үчүн тиришчанлиқ көрситидиғанлиқини билдүрди.

Мәлум болушичә, бу йиллиқ 5-июл намайиши бир қәдәр дағдуғилиқ өткүзүш пиланланған болуп, голландийиниң дәнһах шәһиридики мәркизи пойиз истансисидин, хитай баш әлчиханисиғичә пиядә йүрүш қилинидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт