Голландийә парламентида 20 уйғур вә бир уйғур қиз мәсилиси оттуриға қоюлди

Сүрәттә, голландийидики сотсийалист партийиниң башлиқи Harry Van Bommel әпәнди уйғурлар билән биргә.

Бүгүн голландийә парламентида 20 уйғур вә бир қиз мәсилиси музакирә қилинған. Мәсилини голландийидики сотсиялист партийиниң башлиқи Harry Van Bommel әпәнди оттуриға қойған. У сөзидә камбоджаниң 20 уйғурни хитайға қайтурушиниң дуняда қаттиқ тәнқидкә учриғанлиқини, явропа бирликиниңму камбоджани бу мунасивәт билән тәнқид қилғанлиқини, әмма, явропа бирликиниң әзаси болған голландийиниң уйғур муһаҗирлар мәсилисидә камбоджа өткүзгән хаталиқни тәкрарлиғили тас қалғанлиқини баян қилған вә парламент әзалириға уйғурларниң омуми вәзийити һәққидә мәлумат бәргән.

Йиғинда, голландийә көчмәнләр идарисиниң алақидар мәсуллиридин албайрақ сөз қилип, мәзкур уйғур қизиниң ишини тоғра бир тәрәп қилидиғанлиқи һәққидә вәдә бәргән. Һаррий бомәл йәнә голландийә һөкүмитини хитайға қайтурулған 20 уйғурниң нөвәттики әһвалини сүрүштә қилишқа чақирған.

Голландийә парламентида уйғурлар мәсилиси оттуриға қоюлуштин бир қанчә саәт бурун, голландийидики шәрқи түркистан уйғур бирлики тәшкилатиниң мәсуллири парламент әзаси һаррий бомәл билән көрүшкән.

Бу көрүшүшниң җәряни һәққидә мәзкур тәшкилатниң мәсуллиридин зәйнидин турсун бизгә мәлумат бәрди.

Һаррий бомәл голландийидики сотсялист партийиниң башлиқи, бу партийиниң нөвәттә голландийә парламентида 25 нәпәр вәкили болуп, 150 кишилик голландийә парламентиниң қарарлирида күчлүк тәсир күчигә игә. Партийә башлиқи һаррий бомәл өткән йили пәләстин хәлқини қоллап бир қатар паалийәтләрни елип барған.

Нөвәттә уйғур мәсилисигә диққитини бәрмәктә. У бүгүнки йиғиндин чиққандин кейин, голландийидики уйғур паалийәтчиләр билән көрүшүп, бүгүнки йиғинниң мәзмунидин мәлумат бәргән; бу һәқтә уйғур тәшкилатиниң мәсули бәхтияр насир бизгә мәлумат бәрди.

Юқиридики аваз улинишидин, бу һәқтики мәлуматимизниң тәпсилатини аңлайсиләр.