Голландийидики уйғурлар рамизанниң 21‏-кечиси ибадәт билән таң атқузди

Аллаһқа бағланған қәлблири, исламға уйғун әмәллири, өзи, миллити вә һәтта пүтүн инсанийәткә беғишланған дуайи-саламлири, халислиқта бәсләшкән чин ихласлири билән ибадәт қиливалған бу уйғурлар, бу кечиниң бәрикитидин бир үлүш несивисини алғанлиқини изһар қилди.

Кечә саәт 12 йеримдин башланған қеямулләйли арисида вәз-нәсиһәтләр, соал-җаваблар вә дуайи-тәкбирләрниң һозури таки соһур вақтиғичә давам қилди. Соһурлуқтин кейинки қисқа пурсәттә зияритимизни қобул қилғанлики уйғур өзиниң бу қетимлиқ паалийәттин интайин рази болғанлиқини ейтти.

Паалийәт тәшкиллигүчи “шәрқий түркистан маарип җәмийити” ниң мәсуллириму, иштиракчи қериндашларниң сәмимийликидин тәсирләнгәнлики вә бундин кейин бу хил паалийәтләрни техиму кәң көләмдә тәшкилләшкә теришидиғанлиқини билдүрди.

“явропа шәрқий түркистан маарип җәмийити” рәһбири обулқасим әпәнди алдимизда келиватқан роза һейт байрими пиланидин учур берип: бу йилқи һейт паалийитини башқичә қилмақчимиз. Пүтүн голландийиниң һәрқайси шәһәрлиридә олтурақлашқан уйғурлардин өзлири турушлуқ даиридә гуруппиларни уюштуруп, һәр бир шәрқий түркистанлиқларниң өйлиригә һейт пәтиси қилишни пиланлаватимиз. Аллаһ несип қилса чоқум яхши бир һейт болиду... Деди.

Улар өткән һәптиму 400 кишилик ифтар зияпити бәргән вә өткән йилқи рамизанниңму ахирқи бир тақ кечиси мушундақ ибадәт паалийити тәшкилләп, голландийидики уйғурларниң алқишиға еришкән иди.