Gollandiyide yashawatqan Uyghurlarning namayishqa chiqish qizghinliqi barghanséri ashmaqta

2012 - Yili 7 - ayning 5 - küni denhax sheherlik merkizi poyiz istansisidin xitay bash konsulxanisigha qeder sozulghan 5 kilométirliq musapining ikki qasniqidiki binalarda turuwatqan we yollarda kétiwatqan golland xelqi Uyghurlarning awazini yene bir qétim anglidi.

Ay - yultuzluq kök bayraqliri, plakat we lozunkiliri bilen piyade yürüsh qilip, sho'arlarni yangritip we teshwiq waraqlirini tarqitip méngip, xitay konsulxanisi aldigha qoyulghan tömür tosuqlarghiche qistap kelgen namayishchilar, u yerde qaytidin sep tüzdi.

“Gollandiye Uyghur birliki teshkilati”, “Yawropa sherqiy türkistan ma'arip jem'iyiti”, “Gollandiye Uyghur yashlar partiyisi teshkilati” we “Tibet erkinliki teshkilati” qatarliq teshkilatlargha we shexslerge wakaliten bayanatchilar chiqip, gollandche, in'glizche, xitayche we Uyghurche bayanatlirini oqudi we namayishchilar masliship sho'arlar towlidi.

Yéqinqi yillardin biri xitaylarning zulumda teqdirdash qismetliri bilen quchaqlashqan Uyghur, tibet we mongghul milletlirining erkinlik pa'aliyetchiliri bir - birining pa'aliyetlirini qollap, xitaygha qarshi birlik sep hazirlimaqta. Uningdin bashqa xitayni démokratlashturush idiyisidiki xitay aktiplirimu bu septe yer almaqta. Bügünki bu pa'aliyetkimu “Tibet erkinliki teshkilati”ning aktipliridin 20 ge yéqin tibet namayishchiliri özlirining bayriqi bilen kiyimliri kélip, Uyghurlarning namayishigha reng berdi.

Shu yer waqti chüshtin kéyin ikkidin, tötke qeder dawam qilghan ikki sa'etlik namayish bilen, gollandiyining siyasiy paytexti denhax shehiride, ay - yultuzluq bayraqlirini lepilditip, jarangliq sho'arlar bilen kochilarni lerzige salghan, özining wijdaniy we imaniy burchini ada qilghan Uyghurlar: bu yilqi “5 - Iyul qirghinchiliqi” ni xatirilesh namayishi, bir nechche yildin buyanqi eng köp adem qatnashqan namayish boldi, dep, bir - birige medet bérishken we kelgen qedemliridin razi bolushqan halda qaytishti.

Pa'aliyet axirlashqanda gollandiyidiki ammiwi teshkilatlarning wekilliri we jama'et erbabliridin bolup on nechche kishi ayrim muzakire uyushturup, bügünki namayishta ipadilen'gen ittipaqliqidin söyün'gen halda, bundin kéyinki pa'aliyetlerde téximu zich hemkarliship, yilliq we pesillik, muqim we qerelsiz, siyasiy we ijtima'iy témilardiki barliq pa'aliyetlerde öz - ara meslihetlishish we ittipaqlishish arqiliq gollandiyidiki Uyghur muhajirliq tarixigha yéngi bet échish üchün atlandi.