Gollandiyide birleshme yighin échildi

Süret, "gollandiye uyghurlargha yardem bérish jemiyiti" we "gollandiye tibetlerni qollash jemiyiti "ning hemkarliqida élip bérilghan, xitay komunistlirining ortaq ziyankeshlikige uchrighan xelq we guruhlarning tunji qétimliq hemkarliq yighinidin bir körünüsh.

Yighin'gha "gollandiye Uyghurlargha yardem bérish jem'iyiti", xitay démokratchiliri, tibet jem'iyiti, gollandiye insan heqliri teshkilati, gollandiye tibetlerni qollash jem'iyiti, falun'gong muritliri qatarliq birqisim teshkilatlarning mes'ulliri ishtirak qilghan bolup, ular barawer, ittipaqliq, bir - birini hörmet qilghan asasta hemkarliq ornitip, kelgüsi xizmetlerni qandaq élip bérish heqqide bir meslihetke kélishken.

Yighinda "gollandiye Uyghurlargha yardem bérish jem'iyiti" teripidin teyyarlan'ghan 5 - iyul ürümchi qirghinchiliqigha da'ir filim körsitilip xitay hökümitining Uyghurlar üstidin élip bériwatqan ziyankeshliklirining heqiqi mahiyiti échip bérilgen. Yighin jeryanida téléfon ziyaritimizni qobul qilghan "gollandiye tibetlerni qollash jem'iyti "ning mes'uli yighin heqqide tesiratini sözlep mundaq deydu: " xitay kommunistlirining ortaq ziyankeshlikige uchrighan tereplerning bir arigha kélishi bizning arzuyimiz idi, bügünki bu tunji qedemdin memnunluq hés qildim. Ziyankeshlikke uchrighuchilarning ortaq düshmini peqetla bir, u bolsimu xitay komunistliri. Öz aldigha ayrim pa'aliyet élip bériwatqanlarning aridiki oqushmasliqlarni tügitip, ortaq hemkarliship ish élip bérishi yighin'gha qatnishiwatqan herqaysi terepler üchün tolimu muhimdur."

Yighin'gha xitay démokiratchilirigha wakaliten qatnashqan tibet herikitining küchlük qollighuchilirining biri bolghan maw shawming mundaq deydu: "bizning bügün bu yerge yighilishimizdiki meqsitimiz öz'ara tonushush, öz'ara chüshinish hasil qilish, men bu yerdikilerdin shuni bayqidimki biz hemmimiz xitay kommunistlirining ziyankeshlikige uchrighuchilar ikenmiz."

U sözide yene, 5-iyul ürümchide yüz bergen weqe heqqide toxtilip mundaq deydu: "bu külpet bügün Uyghurlarning béshigha keldi, ötken yili tibetlerning béshigha kelgen bolsa burun falun'gong muritlirining, tiy'en enmén oqughuchilirining béshigha kelgen idi, kim bilidu ete yene kimlerning béshigha kélidu? xitay kommunistliri her da'im milletler arisigha zidiyet sélip ulardin özliri paydilip keldi. Bu qétim xitay kommunistliri Uyghurlar bilen xitaylar otturisigha ziddiyet sélip, xelqning özlirige bolghan naraziliqini milletler arisigha ishtirip qoydi. Bu xitay kommunistlirning eng chong jinayetlirining biridur."

Yighin teshkilatchilirining biri bolghan gheyret rozi ependi ziyaritimizni qubul qilip, yighin heqqide sorighan so'allirimizgha jawab berdi.

Gheyret ependimning bildürüshche bügünki bu yighindin kéyin gollandiye téléwiziyisi Uyghurlar heqqide mexsus bir programma süretke alghan bolup, buni xitay hökümiti 1- öktebir dölet bayrimini tebriklewatqan bir mezgilde téléwiziye qanallirida terqitidiken.

Yuqiridiki awaz ulinishidin, bu heqtiki melumatimizning tepsilatini anglaysiler.