Голландийидики уйғурлар үрүмчидики хитайлар намайишиға инкас билдүрди

Бүгүн 4 - сентәбир күни чүштин кейин,голландийидики уйғурлар голландийә шәрқий түркистан уйғур бирликиниң тәшкиллиши билән голландийиниң пайтәхти амистердам шәһәр мәркизигә йиғилип хитай пуқралириниң 2 - сентәбирдин буян үрүмчидә елип бериватқан намайишиға инкас билдүрүш, уйғурларниң өз ана юртида тартиватқан дәрдини голландийә хәлқигә вә дуняға аңлитиш учун намайиш елип барди.
Мухбиримиз миһрибан
2009.09.04
Gollandiye-Namayish-Urumqi-305 8 - Ийул күни голландийә аместирдамдики дан мәйданида голландийилик университет оқуғучилири уйғурларға һесдашлиқини билдүрүш үчүн намайиш елип барған болуп, сүрәттә, намайишқа қатнашқан университет оқуғучилири вә голландийидики уйғур йашлири.
RFA Photo / Irade

2 - Сентәбир күнидин башлап үрүмчидики хитай пуқралири үрүмчидики хәлқ һөкүмити алдиға йиғилип, өзлириниң әнсизлик ичидә яшаватқанлиқиға һәмдә уйғур ели вәзийитиниң бүгүнкидәк турақсиз һаләткә кәлгәнликигә нарази болуп намайиш қилған иди. Бүгүн хитайларниң үрүмчидики намайиши 3 - күнигә қәдәм қойған болуп, хитайларниң үрүмчидә елип барған бу намайишиға қарита чәтәлләрдә муһаҗирәттә яшаватқан уйғурлардин голландийә уйғурлири тунҗи болуп инкас билдүрди.
 
Намайиш башлиништин илгири голландийә шәрқий түркистан уйғур бирлики тәшкилатиниң хадими зәйнидин әпәнди зияритимизни қобул қилип, намайишниң орунлаштурулуш мәқсити һәққидә тохталди.

Зәйнидин әпәнди голландийә уйғурлириниң түнүгүн үрүмчидә хитай пуқралириниң намайиш елип барғанлиқи һәққидики хәвәрни аңлиғандин кейин голландийә яшлириниң өзлүкидин тәшкиллинип, тәшвиқ вәрәқилирини тәйярлап түнүгүн кәчтә бүгүн голландийиниң пайтәхти амистердам шәһиридә намайиш елип беришни қарар қилғанлиқини, шу тапта уйғур яшлириниң амистердам шәһәр мәркизидики шәһәр аһалиси вә чәтәллик саяһәтчиләргә тәшвиқ вәрәқилири тарқитиватқанлиқини баян қилди.

Вәтәндики уйғурларниң әһвали һәққидики тәшвиқат вәрәқилирини тарқитиватқан бир уйғур қизи зияритимизни қобул қилип, өзиниң шу таптики һессятини баян қилди.

Голландийә уйғурлириниң намайиши чүштин кейин саәт 4 ләрдә башланди, намайишчиларниң кәйпияти наһайити юқири болуп, намайишчилар "уйғурларға әркинлик, хитай һөкүмити өзи террорчи, бизгә әркинлик керәк" дегән шоарларни товлашти.

Намайиш тәшкиллигүчилиридин зәйнидин әпәнди,гәрчә шу тапта қаттиқ ямғур йеғиватқан болсиму, намайишқа қатнашқан һәр бир уйғурниң кәйпиятиниң наһайити юқирилиқини, йәрлик голландийиликләр һәм чәтәллик саяһәтчиләрниңму мәйдандин айрилмай намайишчиларға мәдәт бериватқанлиқини, һазир голландийидә хәлқниң уйғурлар вә уйғур мәсилисигә толиму қизиқидиғанлиқини, елип кәлгән тәшвиқ вәрәқилирини голландийә пуқралири өзлүкидин уйғурларниң алдиға келип елип кәткәнликини, гәрчә намайиш учун берилгән вақит 2 саәт болсиму, лекин сақчиларниң намайишчиларни қоллап намайиш вақтини йәнә 1 саәт узартип бәргәнликини баян қилди.

Зәйнидин әпәнди, голландийидики уйғурларниң тунҗи болуп хитай пуқралириниң үрүмчидики намайишиға инкас билдүрүватқанлиқидин, өзиниң һәм намайишқа қатнашқан һәр бир уйғурниң бир уйғур болуш сүпити билән уйғур миллитидин пәхирлинидиғанлиқини, уйғурларниң дәрдини дуняға аңлитиш учун имканийәт яр бәргән тиришчанлиқларниң һәммини қилидиғанлиқини баян қилди.

Зияритимиз ахирида зәйнидин әпәнди голландийидики уйғурларға вакалитән, дуняниң һәр қайси җайлирида муһаҗәрәттә туруватқан уйғурлардин вәтәндики уйғурларға мәдәт беришкә, уйғурларниң дәрдини дуняға аңлитиш учун өзиниң бир кишилик һәссисини қошушқа чақириқ қилидиғанлиқини билдүрди.
 
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.