Gu'angdungdiki wuken mehellisidin kommunist emeldarliri pütünley qoghlap chiqirildi

“Wolt stért” gézitide bayan qilinishiche, xitay hökümiti hazir gu'angdung ölkisidiki wuken mehellisini qoralliq saqchi qisimliri bilen muhasirige éliwélip, bu mehellining yémek, su teminatini üzüp tashlidi. Bu, xitay hökümitining buningdin kéyin jem'iyettiki muqimsizliqni bir terep qilish modéli ikenlikidin dérek béridu. Bu jiddiylik wuken mehelliside namayish qilghan xelqning bir wekili türmide ölgenliki üchün xelq qattiq ghezepke kelgen, xitay emeldarliri xelqning ghezep-nepritidin qorqup mehellini tashlap qachqan ehwal astida yüz bergen. Buningdin kéyin xelqning, démokratik saylam bilen emes, belki özliri boluwalghan kommunist emeldarlirigha qollinidighan axirqi charisimu mushundaq bolush éhtimali bar.

“Xitaygha nezer tor géziti”ning bayan qilishiche, gu'angdung ölkisidiki luféng sheherchisige tewe wuken mehelliside, xitay hökümitining emeldarliri térilghu yerlerni sirtqa sétishqa bashlighandin kéyin, bu mehellide kommunist partiye sékrétarliri, maliye xadimliri we ularning uruq-tughqanlirining heshemetlik turalghuliri peyda bolup, kommunistlar bilen awamning otturisidiki iqtisadiy perq nahayiti téz chonglap ketken. Bu mehellidiki awam xelq adaletsizlikke qarshi naraziliq ipadileshke bashlighan. Xelq bu mehellidiki térilghu yerlerning axirqi bir qismi bu yil 9‏-ayda pütünley sétilip bolghanliqidin xewer tapqandin kéyin, qattiq ghezeplinip, yer-zéminini hergiz birkimge bermeydighanliqini ipadilep namayish qilishqa bashlighan.

Maqalide bayan qilinishiche, wuken mehelliside hökümetning yerlerni tartiwélishigha naraziliq bildürgen namayishchilar xitay hökümitining qoralliq qisimliri teripidin köp qétim haqaretlen'gendin kéyin, axir ötken heptide, xitay hökümitining ming kishilik qoralliq saqchi qisimlirini meghlup qilghan. Nechche on yildin buyan bu mehellige hökümranliq qilip kéliwatqan xiyanetchi kommunist partiye sékrétarlirini qoghlap chiqarghan. Shuningdin kéyin 20 minggha yéqin nopusi bar bu béliqchilar mehellisi kommunist hökümiti bolmighan mehellige aylan'ghan.

Xitay hökümiti ötken peyshenbe küni wuken mehellisini muhasirige éliwalghandin kéyin, hazir bu mehellidiki qozghilangchilar öz mehellisini qattiq muhapizet qilip, mehellining memuri yighin zalida pa'aliyet élip bériwatidu. Mehellide yayma-dukanlar ochuq. Tijaret qilidighan ashxanilarmu ochuq. Bu mehellidiki bir tijaretchining xongkong uchur wasitilirige éytishiche, wuken mehellisidiki déhqanlar yerlirini hökümettin pütünley qayturup almighiche keynige chékinmeydiken, emma bu mehellining hazirqi yémek, su zapisi aran on kün'ge yétidiken, sirttin motoskilit bilen yémek we su toshup kélidighan charimu mesilini qisimen hel qilalishi mumkin iken. Bu, hazir mehellidiki xelqni kütüp turghan bir chong riqabet iken.

Firansiye xelq'ara radi'o istansisining bayan qilishiche, xitay hökümiti gu'angdung ölkisining wuken mehellisidiki yer-zémini bulap kétilgen déhqanlarning qozghilingini “Chégra sirtidiki düshmen küchler bilen til biriktürgen” dégen töhmetni qollinip basturmaqchi bolghan, shundaqla bu mehellidin hökümet bilen söhbetlishishke ewetilgen wekillerni, ayallar teshkilatlirining wekillirini saqchixanigha soliwalghan. Ularni “Qozghilang peyda qilghuchilar” dep jazalimaqchi bolghan.

Bügün birleshme agéntliqi, firansiye agéntliqi qatarliq uchur wasitiliri wuken mehellisi muhasirige élin'ghandin buyan neq meydandin tartilghan namayish körünüshlirini élan qildi. “Nyuyork taymis”, “Télégraf” qatarliq uchur wasitilirimu xewer, mulahiziler élan qildi. Uchurlardin qarighanda, wuken mehellisidiki déhqanlarning sho'ari bashtin-axir “Xiyanetchi-chérik emeldarlarni yoqitimiz”, “Yer-zéminni qayturup alayli”, “Bashliqni özimiz saylayli” dégendin ibaret.

Bügün “Xitaygha nezer tor géziti”de wuken mehellisining muhasirige élin'ghanliqi heqqide élip bérilghan munazirilerde, xitayda démokratiyini tinchliq bilen qolgha keltürüsh éhtimalgha yéqin emes, wuken mehellisining kommunist partiyini qoghlap chiqirish modéli eqilge muwapiq dégen küz qarash üstünlükni igilidi.