Güentanamodiki 4 neper Uyghur bérmuda taqim arallirigha orunlashti

Bérmuda xeritisi

 Erkinlikke érishken 4 neper Uyghur abdulla abduqadir 30 yash؛ xélil mamut 31 yash؛ ablikim turaxun 38 yash؛ salahidin ablehet 32 yash ؛ ular bügün ikki neper adwokat we bir terjiman hem bir türküm amérika hökümet tarmaqlirining xadimliri bilen birlikte, mexsus ayripilan bilen bérmudaning hamilton shehirige yétip keldi.

Bérmuda, shimaliy atlantik okyandiki en'giliye hamiliqidiki bir aral. Bérmuda taqim aralliri amérika qoshma ishtatlirining sherqi qirghiqidin 1770 kilométir uzaqliqta؛ bérmuda taqim aralliri jem'iy 138 araldin teshkillen'gen, yüz ölchimi 53 kwadirat kilométir, nopusi 61 ming. Bérmudaning asasliq iqtisadi kirimi sayahet ishliri bolup, 2005 ‏ - yililliq kishi béshi otturiche kirimu dunya boyiche aldinqi qatargha ötken.

Tünügün güentanamodiki Uyghurlarning jenubiy ténch okyandiki palaw ariligha orunlashturulidighanliqi heqqide xewerler tarqalghan idi.

Xitay bayanatchisi chin gang bügün, bu heqte ipade bildürüp güentanamodiki Uyghurlarning, sherqi türkistan islam herikiti teshkilatining ezaliri ikenlikini, bu teshkilatning birleshken döletler teshkilatining térrorchilar tizimlikide ikenlikini, shunga amérikining, güentanamodiki 17 neper Uyghurni xitaygha derhal qayturushi kéreklikini, her qandaq bir döletning bu Uyghurlarni qobul qilishigha qarshi ikenlikini bildürdi.

Bügün yene amérika adalet ministiri erik holder muxbirlargha söz qilip, bérmuda taqim arallirining, 4 neper Uyghurni qobul qilghanliqigha minnetdarliqini bildürdi؛ u yene qalghan 13 neper Uyghurni, palawgha orunlashturush üchün heriket qiliwatqanliqini, palawgha orunlishidighan her bir Uyghur üchün amérikining 100 ming dollar xirajet ajratqanliqini bildürdi.

Bügün yene , bérmuda arilining bash ministiri Hon Ewart F Brown söz qilip, bérmudagha orunlashqan Uyghurlarning bigunah kishiler ikenlikini, ularning özliri tewe bolghan dölettiki tüzülmige qarshi bolghanliqi üchünla, jinayetchi sanalghanliqini, ularning bügün'ge qeder héchbir dölettiki bigunah insanlargha ziyan - zexmet yetkuzmigenlikini, insanperwerlik nuqtisidin bu 4 neper Uyghurni qobul qilghanliqini bildürdi.

Bash ministir brawn yene, amérikining bu 4 neper Uyghurning bérmudagha orunlishish, turmush we xizmet tépish qatarliq jehetlerdiki mes'uliyetnimu üstige alghanliqini eskertip ötti. Brawnning bildürüshche, bérmudagha orunlashqan Uyghurlarning, bérmudada wetendash bolush, wetendash bolghandin kéyin her qandaq bir döletke sayahetke bérish hetta bashqa döletlerge köchüp yerlishish hoquqi barliqini bildürdi.

Güentanamodiki Uyghurlar mesilisi, muhajirettiki Uyghur teshkilatlirining yéqinqi yillardin bériqi muhim xizmet nuqtisi bolup kelgen idi. Dunya Uyghur qurultiyining bash katipi dolqun eysa, 4 neper Uyghurning bérmudagha yerlishish we qalghan 13 nepirining palawgha orunlashturulushqa planlinishini, Uyghur milliy herikiti üchün bir xushxewer dep bildürdi.

Yuqirida biz silerge, güentanamodiki 4 neper Uyghur mehbusning en'giliye hamiyliqidiki bérmuda taqim arallirigha orunlashqanliqi we uninggha qarita her qaysi tereplerning inkaslirini yetküzduq.

Yuqiridiki awaz ulinishidin, bu heqtiki melumatimizning tepsilatini anglaysiler.