Гүәнтанамо түрмисидики уйғур мәһбусниң хети күчлүк ғулғула қозғиди


2008-03-25
Share

Америка қошунлири тәрипидин қолға елинип, кубаниң гүәнтанамо түрмисигә соланған уйғур мәһбуслиридин 5 нәпири әркинликкә чиққан болсиму, мәзкүр түрмидә йәнә 17 нәпәр уйғур мәһбус 6 йилдин буян йәнила тутуп турулмақта. Йеқинда 17 нәпәр мәһбус ичидики абдуғаппар түркистани, өзлириниң түрмидин қутулуп чиқиши үчүн хизмәт қиливатқан икки нәпәр адвокатиға мәктүп йоллап, өзлириниң гунаһсиз икәнликини вә тезрақ түрмидин чиқип кетишни үмид қилидиғанлиқини билдүргән. Абдуғаппар түркистанниң адвокатлириға язған хети нөвәттә һәр қайси мәтбуатларда елан қилинип күчлүк ғулғула қозғиди.

Гуантанамо түрмисидики уйғур мәһбусниң авази тунҗи қетим дуняға хитаб қилинди

Буниңдин 6 йил илгири америка қошунлири тәрипидин қолға елинған 22 нәпәр уйғурдин 5 нәпири түрмидин қоюп берилип, 2006 ‏- йили албанийигә орунлаштурулди. Қалған 17 нәпәр уйғур мәһбус һазир йәнила түрмидә болуп, уларниң арисидики абдуғаппар түркистани өз адвокатлиридин Wells. Dixon Әпәнди вә Sima Seyifi ханимға мәктүп йоллап, тезрақ түрмидин қутулуп чиқиш үмидини ипадилиди.

Абдуғаппар түркистанниң мәктупи ялғуз адвокатларға йоллинипла қалмай, нөвәттә америкидики нопузлуқ мәтбуат вастилирида енглиз тилида елан қилинип, күчлүк ғулғула қозғимақта.

Хетидә, өзлириниң тутулуш җәрянини баян қилғандин кейин, 2004 ‏- вә 2005 ‏- йиллири америка һөкүмити тәрипидин гунаһсиз дәп елан қилинған болсиму 6 йилдин буян йәнила түрмә ичигә қамалғанлиқидин шикайәт қилған абдуғаппар, өзи вә бир қисим сәбдашлириниң һәр хил сәвәбләр түпәйли афғанистанға беришқа мәҗбур болғанлиқини билдүрүп мундақ дәйду": җуңго һөкүмитиниң күндин - күнгә ешип бериватқан зулими вә биз уйғур яшлирини һәр хил баһаниләр билән түрмиләргә ташлашлиридин шуниңдәк һәр хил бөһтанлар билән уйғур хәлқини болупму яшларни наһәқ қирғин қилишлири сәвәбидин йол тапалмиған нурғун яшлар чәтәлләргә панаһлиқ изләп чиқип кетиватмақта. Афғанистан вә пакистанда тутулуп қалған уйғур яшларму әнә шулардәк вәтинимизгә чегридаш мустәқил дөләтләргә чиқишқа мәҗбур болған. Җүмлидин бизму һәр хил сәвәбләр түпәйли афғанистанға кәлгән идуқ. Бизниң афғанистанға келишимизгә, америка армийиси афғанистанға һуҗум қилип кирди. Бизгә афғанистанда туридиған җай қалмиғандин кейин, биз һечкимни тонимиғачқа амалсиз пакистанға бардуқ. Пакистан хәлқи бизни тутувелип пакистан һөкүмитигә тапшуруп бәрди, пакистан армийиси бизни америка армийисигә тапшуруп бәрди, америка армийиси бизни гүәнтанамо түрмисигә елип кәлди, пакистан һөкүмити бизни америка тәрәпкә өткүзүп бәргәндә биз хушал болған вә америка һөкүмитини бизгә һесдашлиқ қилиду вә ярдәм бериду дәп үмид күткән идуқ. Гәрчә бир гунаһсиз дәп елан қилинған болсақму, йәнила 6 йил болди түрмидә йетиватимиз, түрмидә немә үчүн йетиватқанлиқимизни билмәймиз, әмма биз йәнила америка һөкүмити бизни тезрақ түрмидин чиқирип яхши җайға орунлаштурсикән дегән үмидтимиз."

Абдуғаппар хетидә йәнә, вәтинидин, аилисидин айрилған инсанниң, сиртқи дунядин пүтүнләй алақиси үзүлгән, иссиқ күн нури вә тәбии һавадин мәһрум болған 4 әтрапи қамалған төмүр қәпәз ичидә яшишиниң ейтип түгәткүсиз бир азап икәнликини билдүрүп, сәбдиши абдуразақниң ачлиқ елан қилип наразилиқ билдүрүши нәтиҗисидә, униң мәҗбурий озуқландуруш җазасиға тартиливатқанлиқи буниң билән саламәтликиниң күндин ‏- күнгә начарлишип кетиватқанлиқи, болупму абдуразақниң роһий бесим астида яман ақивәткә дуч келишидин әндишә қиливатқанлиқи, өзиниңму еғир рематизим кесилигә гириптар болғанлиқи вә ахирида адвокатлар вә қанун органлириниң бу мәсилини тезрақ бир тәрәп қилишини өтүнүп сориғанлиқи баян қилинған.

Уйғур мәһбусларниң адвукати уларниң әркинликкә чиқиши үчүн һәргиз бошашмайдиғанлиқини билдүрди

Абдуғаппарниң хетини тапшуруп алған адвокат Wells Dixon ,Sima Seyifi вә башқа адвокатлар, мәзкүр мәктүп арқилиқ гүәнтанамо түрмисидики вәзийәтниң нәқәдәр еғир икәнликини вә гунаһсиз уйғур мәһбусларни тезрақ қутулдуруп чиқишниң интайин муһим бир хизмәт икәнликини билдүрмәктә.

Адвокат Wells Dixon әпәнди, абдуғаппарниң дуняға елан қилған мәктубиниң әһмийити һәққидә тохтилип мундақ дәйду: "бу интайин муһим әһмийәтлик бир мәктуп, чүнки бу мәктуп гүәнтанамо түрмисидики бир мәһбусниң биринчи қол мәлумати һесаблиниду. Гәрчә бу мәһбус бир қанчә йил илгири қоюп берилиши керәк дәп ақланған болсиму, лекин һазирға қәдәр шараити интайин начар болған, америкиниң гүәнтанамо түрмисидә тутуп турулмақта ."

Адвокат Dixon әпәнди, өзиниң гунаһсиз уйғур мәһбусларни түрмидин қутулдуруп чиққанға қәдәр һәргиз бошашмайдиғанлиқини билдүрүп йәнә мундақ дәйду : " шуни ениқ ейталаймәнки, мән адвокат болуш сүпитим билән, уларни гүәнтанамо түрмисидин қутулдуруп чиқиш үчүн қолумдин келишичә хизмәт қилимән. Һәммигә мәлум болғандәк вә мән тәкитләп өткәндәк, улар гунаһсиз, әмма улар һазирға қәдәр америкиниң шараити начар һәрбий түрмисидә тутуп турулмақта. Уларни гүәнтанамо түрмисидин қутулдуруп чиқишидики бирдин - бир амал, башқа дөләтләрниң уларни орунлаштурушқа қошулушини қолға кәлтүрүш."

А у б ниң муавин рәиси рошән аббас ханим уйғур мәһбуслириниң әһвали һәққидә тохталди

Гүәнтанамо түрмисидики уйғурларниң әһвалини америка һөкүмәт даирилиригә вә адвокатларға йәткүзүштә, изчил түрдә тәрҗиманлиқ хизмитини ишләп келиватқан, америка уйғур бирләшмисиниң муавин рәиси рошән ханим, уйғур мәһбуслириниң әһвали һәққидә тохтилип өтиду.

Рошән ханим сөзидә йәнә":мәзкүр хәтниң америкидики тәсири әң күчлүк болған ахбарат органлиридин MSNBC, мәйами алдин хәвәр күндилик гезити вә башқа қануний гезит ‏- журналлар, бирләшкән дөләтләр тәшкилати хәвәр тори, әнгилийә б б с радио ‏- телевизийә ширкити, америка авази радиоси, әлҗәзирә гезити, гүәнтанамо көчмәнлири хәвәр тори қатарлиқ нурғун мәтбуатларда елан қилинғанлиқини вә бу хәтниң елан қилинишиға һөкүмәт вә һәрбий тәрәпниң йол қоюши, 6 йилдин бери тунҗи қетим гүәнтанамодики бир уйғурниң өз қоли билән язған хәттә авазини сиртқа хитап қилиши һесаблиниду " деди. (Әқидә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт