Güentanamodiki Uyghurlar heqqide köp maqale yazghan yazghuchi endy wortington toghrisida

En'giliyilik musteqil yazghuchi endy wortington, güentanamo höjjetliri namliq kitabning aptori. U yene güentanamodiki Uyghurlar heqqide bir qeder köp maqale élan qilip Uyghurlar mesilisini tonushturup kéliwatqan yazghuchilarning biri.
Muxbirimiz jüme
2009.11.04
Share on WhatsApp
Share on WhatsApp
Gitmo-uyg-andy-305 Endy wortington Andy Worthington engliyilik musteqil yazghuchi bolup, u "guantanamo höjjetliri: amérikining qanunsiz türmisidiki 474 mehbusning hékayisi" namliq kitabning aptori.
www.andyworthington.co.uk Din élindi.

Endy wortington güentanamo mehbusliri jümlidin güentanamogha qamalghan Uyghurlar heqqide her xil maqalilerni yézip ularning ehwalni xelq'ara jama'etke bildürüshke tiriship kéliwatqan musteqil yazghuchilarning biri. U 4 - noyabir kechqurun özi ilgiri yazghan güentanamo höjjetliri: "amérikining qanunsiz türmisige qamalghan 774 tutqunning hékayisi" namliq kitabi heqqide sözlesh hemde yéqinda en'giliyilik kino rézhissori polly nesh bilen birlikte ishlep chiqqan "qanunning sirtida: güentanamo hékayiliri" namliq höjjetlik filimni körsitish üchün amérikigha yétip keldi.

Endy wortingtonning güentanamo heqqide yazghan tunji kitabi: "güentanamo höjjetliri: amérikining qanunsiz türmisige qamalghan 774 tutqunning hékayisi" 2007 - yili öktebirde poltu neshriyati teripidin neshr qilin'ghan.

Uning mezkur kitabida güentanamogha qamalghan Uyghurlar heqqidimu bir qisim melumatlar otturigha qoyulghan. U kitabida, güentanamogha qamalghan her bir mehbus heqqide ayrim ‏ - ayrim dégüdek toxtalghan bolup, u eyni waqitta mezkur türmige qamalghan 22 neper Uyghur mehbuslar heqqidimu shu sheklide melumat bergen.

Endy wortington 4 - noyabir kechqurun nyuyorkqa jaylashqan inqilab kitabxanisida "güentanamo höjjetliri" namliq kitabi heqqide nutuq sözleydu.

U yene, peyshenbe küni nyuyork shehiridiki nyuyork qanun instituti qanun merkizide " qanunning sirtida: güentanamo hékayiliri" namliq höjjetlik filimni körsitidu we filim heqqidiki munazirige qatnishidu.

Endy wortington 8 - we 9 - noyabir amérika paytexti washin'gton we feyrfeks rayonliridiki bir qisim orunlarda höjjetlik filimini körsitish pa'aliyiti bilen shughullinidu.

2006 - Yili 5 neper Uyghur albaniyige qoyup bérilgendin kéyin, endy wortington Uyghurlar heqqide ayrim maqalilerni élan qilishqa bashlidi.

Uning tor bétide bérilgen melumatlargha qarighanda, endy wortington shundin kéyin güentanamodiki Uyghurlar heqqide yaki shulargha a'it élan qilghan maqale we mulahiziler 62 parchigha yétidu.

Bularning ichide " güentanamodiki Uyghurlargha erkinlik" , " dunya xitay Uyghurlar üstidin élip bériwatqan qirghinchiliqini körmeske saldimu" , " obamagha yéngi yilliq mektup: güentanamo Uyghurlirigha hörlük bérilsun" , " güentanamo höjjetliri: tordiki toluqlima bab: pakistan'gha qéchish" we " ababekri qasimning prézidént obamagha yollighan mektupi" qatarliqlar bir qeder körünerlik.

Aptor yene, güentanamo Uyghurlirining sot qilinish ehwali we bu jehettiki oz köz qarashlirini obzor sheklidimu élan qilip keldi.

Aptor endy wortington bügün yeni 4 - noyabir "palawgha qoyup bérilgen Uyghurlar kimler" dégen témide bir parche maqale élan qildi. Uning bu maqaliside bular heqqide hazirghiche köp otturigha qoyulmighan bezi yéngi uchurlarni otturigha qoyghan.

Biz bu heqte aptorning köz qarashliri we hazir palawda yashawatqan Uyghurlarning bu heqtiki özining bayanlirini anglitishqa tirishimiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet