Gogulning xakkérliq hujumgha uchrishida xitaydiki gogul xadimlirining qoli bolushi mumkin
Muxbirimiz irade
2010.01.19
2010.01.19
AFP Photo
Bügün gogul shirkiti yene gogulning xakkér hujumigha uchrishida xitaydiki shöbe shirkitide ishleydighan xadimlarning qoli bar bolushi mumkin dédi. Hazir gogul xitay xadimliri üstide tekshürüsh élip barmaqta.
Gogul shirkitige a'it élxet adréslirining xitayda arqa -arqidin hujumgha uchrishi we xitayning intérnétte xalighan uchurgha érishishke cheklime qoyushi gogulning xitaydin chékinip chiqish qarari élishigha seweb bolghan idi. Bügün b b s'da bérilgen xewerge qarighanda, gogul shirkiti hazir xitaydiki shöbe shirketliride ishleydighan xadimlarning bu ishning ichide qoli bar bolushi mumkinlikini bildürdi.
Gogul shirkiti hazir bu ish üstide tekshürüsh élip bériwatqan bolup, ular tedbir élish üchün xitaydiki shöbe shirketliridiki bezi xadimlarning ichki tor séstimisda meshghulat qilishini chekligen we bezi xadimlirini öyide dem élip turushqa buyrighan.
Gogulning bildürüshiche, gogul ilgiri uchrighan xakkér hujumliri xitaydiki shirketliride ishleydighanlarning yeni ichki qisimdikilerning yardimi bilen élip bérilghan bolushi mumkin iken. Xewerlerdin melum bolushiche, xitayda gogulgha a'it élxet adréslirini ishletken nurghunlighan orun we shexslerning élxet adrésliri bashqilar teripidin oghriliqche échilghan bolup, xitayda turushluq chet'ellik muxbirlarning élxet adréslirimu bu xil hujumdin mustesna emes.
Düshenbe küni béyjingda turushluq chet'ellik muxbirlar teshkilatining bayan qilishiche, ular nurghunlighan chet'ellik muxbirlarning gogulgha a'it bolghan élxet adréslirining oghurluqche échilghanliqi, hetta élxet adrésidiki xetlerning bashqa tonumaydighan kishilerge ewetilgenlikini bayqighan.
Arqidinla merkizi fransiyidiki chégrisiz muxbirlar teshkilati weqe heqqide bayanat bérip, béyjingda turushluq chet'ellik muxbirlarning élxet adréslirigha élip bérilghan hujumlargha qattiq naraziliq bildürdi. Ular bayanatida béyjingda turushluq chet'el muxbirlirining élxet adréslirining ikki yildin béri izchil halda mushundaq xakkérliq hujumlargha uchrap kéliwatqanliqini eskertip, kishilerdin élxetlirini tekshürgende nahayiti éhtiyatchan bolushini telep qilghan.
Xitaydiki kishilerning intérnétte xalighan uchurlargha ige bolush erkinliki we insanlarning shexsi mexpiyetlikining xitayda depsende qilinish mesilisige qarita gogulning meydani we uning netijisining néme bolidighanliqi qizghin munazire qiliniwatqan mushundaq bir peytte, xitay da'iriliri bu heqte téxiche ochuq bir ipade bildürmey kelgen idi. Kishiler xitayning bu herikitige xitay gogulning chiqip kétishidin éhtiyat qilmaqta, dep baha bergen idi. Emma xitay tashqi ishlar ministirliqining bayanatchisi ma jawshu bügün tunji qétim ochuq bayanat berdi. U gogulning ismini ochuq atap turup qilghan sözide: "xitayda ish qiliwatqan chet'el shirketliri choqum xitayning qanunigha we qa'ide - nizamlirigha boysunushi kérek, ular omumiy xelqning qiziqishi we örp - adetlirige hörmet qilishi kérek. Gogulmu buning sirtida emes," dédi.
Birleshme agéntliqining bildürüshiche, gogul bir qanche heptigiche eger xitay da'irilirini intérnétta érishidighan mezmunlargha cheklime qoyushni emeldin qaldurushqa köndürelmigen teqdirde xitaydin chékinip chiqip kétidighanliqini we bu heqte xitay da'iriliri bilen söhbet élip baridighanliqini bildürgen. Emma xitay tashqi ishlar ministirliqining bayanatchisi ma özining terepler arisida birer söhbet élip bérilghan - bérilmighanliqidin xewirining yoqluqini bildürdi.
Gerche, xitay da'irilirining nechche waqittin béri weqege nisbeten bir ipade bildürmey jim turuwélishini bezi kishiler xitay gogulning teleplirige qoshulushi mumkin dégen perezni yaratqan bolsimu, emma ma jawshüning bügünki sözliri unimu yoqqa chiqarghandek körünmekte. Jümlidin xitay hökümiti intérnét uchur alaqilirige bolghan qamalliqidin qandaq bedel tölishidin qet'iynezer waz kechmeydighanliqini ashkara qilmaqta.
Yuqiridiki awaz ulinishidin, bu heqtiki melumatimizning tepsilatini anglaysiler.