Uyghur qizi güljennet qurban hayat-mamatliq jéngide

2012-Yili 11-séntebir küni seher sa'et besh etrapida qeshqer yumilaq sheher yolida kütülmigen ot apiti yüz berdi.
Ixtiyariy muxbirimiz erkin tarim
2012-10-03
Share
guljennet-qurban-305.jpg Bedinining 75 pirsent qismi köyüp, éghir yarilan'ghan güljennet qurbanning kimliki. 2012-Yili séntebir.
RFA/Erkin Tarim

Ot apitide pütün bedinining 75 pirsent qismi köyüp, éghir yarilan'ghan güljennet qurban dölet igilikidiki qoralliq qisim 12-doxturxanisida jiddiy qutquzulghandin kéyin hayat qaldi.

Emma ish buning bilen tügimidi. Güljennet qurbanning qedem basquchluq opératsiye heqqi we türlük dawalash chiqimliri choqum del waqtida doxturxanigha ötküzülüp turulushi kérek idi. Bextke qarshi, güljennetning ata-anisi burunla ajriship ketken bolup, güljennet anisi bilen anisining azghine pénsiye ma'ashigha tayinip yashaytti. Uning üstige güljennetning anisimu bu qétimliq ot apitide yarilan'ghan bolup, oxshashla doxturxanida dawalanmaqta idi. Chaqmaq chéqilghandek taralghan bu xewer güljennetning oqutquchisi we sawaqdashlirining quliqigha yetkinide ularning qelbi teswirligüsiz azab we endishe bilen toldi.

Bedinining 75 pirsent qismi köyüp, éghir yarilan'ghan güljennet qurban. 2012-Yili séntebir.
Bedinining 75 pirsent qismi köyüp, éghir yarilan'ghan güljennet qurban. 2012-Yili séntebir.
RFA/Erkin Tarim

Güljennet qurban qeshqer sheherlik tébbiy mektep séstraliq sinipining oqughuchisi bolup, uning sawaqdashliri öz arisida i'ane toplighandin sirt yene derstin sirtqi waqitlirida qeshqer shehirining herqaysi kochilirida güljennetning dawalash puli üchün i'ane toplidi. Tolimu epsus, toplan'ghan pullar doxturxana kariwitida aghriq azabida ingrawatqan yash ghunchining birinchi qétimliq opératsiye heqqinimu qamdiyalmidi. Uning üstige mektep oqughuchilarning i'ane qilishini cheklidi. Bu xewer jem'iyette belgilik tesir qozghighandin kéyin, jem'iyettiki herqaysi idare-organlar we sodigerlermu terep-tereptin güljennetke yette tümendin oshuq pul toplidi. Bu pullar bilen güljennet ikkinchi qétimliq opératsiyige kirdi. Döletmu besh tümendin oshuq pul bergen bolsimu, emma hazirghiche jem'iy 15 tümen'ge yéqin pul ketken bolup, kéyinki qedemde élip bérilidighan töt qétimliq opératsiye üchün yene nurghun pul kétidighanliqi mölcherlenmekte.

Mes'ul doxturning güljennetning oqutquchisigha déyishiche hetta bu dawalashlar ünüm bergen teqdirdimu güljennet méyip bolup qélishi mumkin iken. Bundaq bir weziyette hemmeylen'ge amalsizliq ichide uning köyüp qaqshal bolup ketken bedinige achchiq azab bilen qarash we du'a qilishtin bashqa chare qalmidi.

Buni bilgen yashlar güljennetning doxturxanida tartilghan sür'itini misranim, izdinish, köklem, kengsay qatarliq Uyghurche intérnét sehipilirining munberliride élan qilish arqiliq pütün dunyadiki Uyghurlarni ochuq i'ane pa'aliyitige qatnishishqa muraji'et qildi. Bularning hemmisila xususiy tor béketler bolup, shunche éghir yaridar körülgen bir ot apiti heqqide héchqandaq resmiy axbarat wasitiliride xewer bérilmidi. Buning sewebini sürüshtürüsh üchün oqutquchidin ot apitining yüz bérish sewebini sorighinimizda oqutquchining jawabi bizni oygha saldi.

Ot apiti motsiklitining tok menbesining köyüp kétishidin kélip chiqqan bolup, sürüshtürülse mes'uliyet motsiklit shirkitining menpe'itige bérip taqilatti. Eger axbarat wasitiliride bu xewer ochuq tarqitilsa yaki motsiklit shirkiti jazagha tartilsa choqum pütkül Uyghur diyaridiki xitaylar qurghan nurghun tokluq motsiklit shirketlirining iqtisadi menpe'iti ziyan'gha uchraytti. Chünki tokluq motsiklit Uyghur diyarining hemmila yérini qaplighan bolup, xelqning eng aldi bilen tallaydighan qatnash wasitisining birige aylan'ghan idi. Bolupmu qeshqer shehiride hemmila a'ilide dégüdek tokluq motsiklit tépilatti. Bundaq bir ehwal astida döletning motsiklitlarning süpiti, bixeterlikini yuqiri kötürüsh heqqide belgilime chiqarmasliqi, hetta süpetsiz mallarni bazargha sélish arqiliq insanlarning hayatigha xewp yetküzülüshige qarita héchqandaq chare qollanmasliqi kishilerni oygha salmaqta.

Xewerlerde éytilishiche, yardem qilishni xalighanlar töwendiki banka hésab nomurigha pul yatquzsa bolidu. Junggo soda-sana'et bankisi: 6222023012009580335.

Güljennetning ehwali heqqide tepsiliy melumatqa érishmekchi bolsanglar güljennetning sinip mes'uli dilber mu'ellim bilen élip barghan söhbitimizge qulaq salghaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet