Мәһбус гүлмирә иминниң ери б д т да ечилған инсан һәқлири йиғинда гуваһлиқ бәрди

Муддәтсиз қамаққа һөкүм қилинған мәһбус гүлмирә иминниң ери бәхтияр өмәр б д т дики инсан һәқлири йиғинда 5-июл вәқәси вә униңдин кейинки уйғур вәзийити һәққидә мәлумат бәрди.
Мухбиримиз шөһрәт һошур
2011-03-28
Share
bextiyar-omer-bdt3-305.jpg Бәхтияр өмәр б д т дики инсан һәқлири йиғинда 5-июл вәқәси вә униңдин кейинки уйғур вәзийити һәққидә мәлумат бәрмәктә. 2011-Йили март.
RFA/Shohret Hoshur

Бирләшкән дөләтләр тәшкилатиниң 16-нөвәтлик алий кеңиши җүмә күни ахирлашти. Бир ай давамлашқан бу йиғин давамида дуня уйғур қурултийи бирқанчә түрлүк паалийәт елип барди. Бу паалийәтлиридин бири мәһбус гүлмирә иминниң ери бәхтияр өмәрниң өткән һәптә б д т дики инсан һәқлири йиғинда 5-июл мәһкумлириниң нөвәттики әһвали һәққидә гуваһлиқ беришидур. Нөвәттә норвегийидә яшаватқан бәхтияр әпәнди, дуня уйғур қурултийиниң орунлаштуруши билән бу йиғинға қатнашқан.

bextiyar-omer-bdt1-385.jpg
Бәхтияр өмәр б д т дики инсан һәқлири йиғинда 5-июл вәқәси вә униңдин кейинки уйғур вәзийити һәққидә мәлумат бәрмәктә. 2011-Йили март.
RFA/Shohret Hoshur
Бәхтияр әпәнди йиғинда гүлмирә имин билән 5-июл күни намайиш мәзгилидә телефонда қилишқан сөзлирини вә бу сөһбәтниң хитай һөкүмити тәрипидин дөләт мәхпийәтликини ашкарилаш дәп қаралғанлиқини, гүлмирә имин намайишта актип рол алғанлиқи үчүн, вәқәни тәшкиллигүчи дәп әйибләнгәнликини вә муддәтсиз қамаққа һөкүм қилинип, шу тапта, үрүмчидики аяллар түрмисидә җаза муддитини өтәватқанлиқини билдүргән.

Шу күндики йиғин шветсарийидики б д т ни көзитиш( UN Watch) тәшкилатиниң уюштуруши билән дунядики 25 тин артуқ хәлқаралиқ тәшкилат вәкиллириниң қатнишишида елип берилған. Йиғинда мисирдики намайишчилар вә ливийидики исянчиларниң вәкиллири, буниңдин башқа, хитай вә тибәт вәкиллириму өз вәзийәтлири һәққидә мәлумат бәргән. Йиғинниң әтиси йиғин вәкиллири б д т ниң алақидар тармақлириниң мәсуллири вә бәзи дөләтләрниң баш әлчилири билән көрүшкән.

Б д т ирқи қирғинчилиқниң алдини елиш комитетиниң башлиқи вәкилләрни қобул қилғанда, ливийә вәкили билән уйғур вәкилигила сөз қилиш пурсити берилгән. Йиғинда мисир вә ливийидин кәлгән вәкилләр, өзлириниң намайиш вә исянни тәшкилләш җәрянида интернеттин қандақ пайдиланғанлиқи һәққидә тәҗрибилирини тонуштурған.

Дуня уйғур қурултийиниң торбетидики бир хәвәрдин мәлум болушичә, б д т ниң 16-нөвәтлик алий кеңиши давамида, уйғур мәсилиси 10 ға йеқин дөләт вә тәшкилатниң доклатлирида тилға елинип, бу нөвәтлик кеңәштә баштин-ахир күн тәртиптин чүшмигән мәсилиләрниң биригә айланған.

Бәхтияр әпәндиниң икки күн давам қилған б д т дики паалийити җәрянидики тәсиратини вә мухбиримиз билән болған сөһбитини юқиридики аваз улинишидин аңлиғайсиләр.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт