Mehbus gülmire iminning éri b d t da échilghan insan heqliri yighinda guwahliq berdi

Bextiyar ömer b d t diki insan heqliri yighinda 5-iyul weqesi we uningdin kéyinki Uyghur weziyiti heqqide melumat bermekte. 2011-Yili mart.

Birleshken döletler teshkilatining 16-nöwetlik aliy kéngishi jüme küni axirlashti. Bir ay dawamlashqan bu yighin dawamida dunya Uyghur qurultiyi birqanche türlük pa'aliyet élip bardi. Bu pa'aliyetliridin biri mehbus gülmire iminning éri bextiyar ömerning ötken hepte b d t diki insan heqliri yighinda 5-iyul mehkumlirining nöwettiki ehwali heqqide guwahliq bérishidur. Nöwette norwégiyide yashawatqan bextiyar ependi, dunya Uyghur qurultiyining orunlashturushi bilen bu yighin'gha qatnashqan.

RFA/Shohret Hoshur

Bextiyar ependi yighinda gülmire imin bilen 5-iyul küni namayish mezgilide téléfonda qilishqan sözlirini we bu söhbetning xitay hökümiti teripidin dölet mexpiyetlikini ashkarilash dep qaralghanliqini, gülmire imin namayishta aktip rol alghanliqi üchün, weqeni teshkilligüchi dep eyiblen'genlikini we muddetsiz qamaqqa höküm qilinip, shu tapta, ürümchidiki ayallar türmiside jaza mudditini ötewatqanliqini bildürgen.

Shu kündiki yighin shwétsariyidiki b d t ni közitish( UN Watch) teshkilatining uyushturushi bilen dunyadiki 25 tin artuq xelq'araliq teshkilat wekillirining qatnishishida élip bérilghan. Yighinda misirdiki namayishchilar we liwiyidiki isyanchilarning wekilliri, buningdin bashqa, xitay we tibet wekillirimu öz weziyetliri heqqide melumat bergen. Yighinning etisi yighin wekilliri b d t ning alaqidar tarmaqlirining mes'ulliri we bezi döletlerning bash elchiliri bilen körüshken.

B d t irqi qirghinchiliqning aldini élish komitétining bashliqi wekillerni qobul qilghanda, liwiye wekili bilen Uyghur wekiligila söz qilish pursiti bérilgen. Yighinda misir we liwiyidin kelgen wekiller, özlirining namayish we isyanni teshkillesh jeryanida intérnéttin qandaq paydilan'ghanliqi heqqide tejribilirini tonushturghan.

Dunya Uyghur qurultiyining torbétidiki bir xewerdin melum bolushiche, b d t ning 16-nöwetlik aliy kéngishi dawamida, Uyghur mesilisi 10 gha yéqin dölet we teshkilatning doklatlirida tilgha élinip, bu nöwetlik kéngeshte bashtin-axir kün tertiptin chüshmigen mesililerning birige aylan'ghan.

Bextiyar ependining ikki kün dawam qilghan b d t diki pa'aliyiti jeryanidiki tesiratini we muxbirimiz bilen bolghan söhbitini yuqiridiki awaz ulinishidin anglighaysiler.