Rabiye qadir xanim b d t ni guma mukuyla weqesini sürüshte qilishqa chaqirdi

Buning bilen gumu nahiyiside keng kölemde tutqun bashlan'ghan. Uyghur milliy herikitining yolbashchisi rabiye qadir xanim, bügün bu munasiwet bilen bayanat élan qilip, xitayni Uyghurlargha qarita qirghinchiliq élip bériwatidu dep eyiblidi. U bayanatida, birleshken döletler teshkilatini mezkur weqeni tekshürüsh we weqening jawabkarliqini sürüshte qilishqa chaqirdi.

Bügün réytér we birleshme agéntliqi qatarliq, bir qatar meshhur axbarat wasitilirining xewer qilishiche, gumidiki weqede jem'iy sekkiz kishi ölgen. Biz bügün weqe heqqide yenimu tepsiliy melumat igilesh üchün, guma nahiyilik saqchi idarisige téléfon qilduq.

Mes'ul xadim ilgirikige oxshashla so'allirimizgha jawab bérishni ret qildi. Da'irilermu oxshashla weqe heqqide pikir bayan qilishtin özini qachurdi. Uyghur milliy herikitining yolbashchisi rabiye qadir xanimning bügünki bayanatida bildürüshiche, dunya Uyghur qurultiyimu weqe heqqide belgilik derijide tekshürüsh élip barghan. Qurultayning igilishiche, tekshürüsh netijiside nöwette gumida keng kölemlik tutqun qilish we öy axturush dawam qilmaqta.

Xotende ahaliler we yerlik saqchi xadimliridin igiligen uchurlirimizdin qarighanda, weqede xitayning guma saqchi idarisining mu'awin bashliqi adil abduweli weqediki toqunushta ölgen. Gumida nöwette barliq saqchi xadimliri seperwerlikke keltürülgen bolup, xoten weziyitidiki jiddiylik dawam qilmaqta.

Rabiye xanim bügünki bayanatida, eslide weqediki ikki terepning qoral küchi sélishturulsa, xitay üchün qarshi terepni tirik qolgha chüshürüsh we sot arqiliq bir terep qilish mumkinchiliki barliqini, shunga xitayning öz qanuni boyiche éytqandimu, weqede heddidin ziyade küch qollan'ghanliqini tekitlidi.

Rabiye qadir xanimning qarishiche, xitay weqede heddidin ziyade küch qollinish arqiliq, özining rayondiki hakimiyitining mustemlikichi hakimiyet ikenlikini dunyagha yene bir qétim ashkarilidi.