Хәлқаралиқ бурса 3 - нөвәтлик йипәк йоли кино фестивали рәсми башланди

Хәлқара йипәк йоли кино фестивалиниң үчинчиси түркийиниң 4 - чоң шәһири һесаблинидиған бурса шәһридә рәсми башланған болуп, сүрәттә, дунйаға мәшһур қирғиз йазғучиси чиңгиз айтматовниң сиңлиси йазғучи роза айтматов ханим һәдийә қобул қилмақта.

11 - Айниң 28 - күни ахшам мәринос ататүрк мәдәнийәт мәркизидә өткүзүлгән ечилиш мурасимиға түркийә мәдәнийәт вә саяһәт министири әртуғрул гүнай әпәнди, қирғизистан мәдәнийәт вә учур министири султан райев, мексикилиқ даңлиқ кино әртиси гаәл гаркиа бәрнал, `әлведа гүлсари` намлиқ филимниң реҗиссори ардақ амирқулов, дуняға мәшһур қирғиз язғучиси чиңгиз айтматовниң сиңлиси язғучи роза айтматов ханим, түркләрниң даңлиқ кино артислиридин һүля қочйигит, мәлтәм җумбул вә мүслүм гурсәс қатарлиқлар болуп көп санда түрк кино сәнәтчилири қатнашти.

Йиғинниң ечилиш мурасими гөркәмли залға даңлиқ кино сәнәтчилириниң қизил гиләмдә меңип кириши билән башланди. Бу мурасим көп санда телевизийә қанили тәрипидин нәқ мәйдандин тарқитилди. Бу филим фестивалиға 50 дөләттин 116 кино қатнаштурулған болуп, бу кинолар 4 түрдә мусабиқиға қатнишидикән. Ахирида биринчи, иккинҗи вә үчинчи болғанлар мукапатлинидикән.

Бу кино мусабиқиси даңлиқ язғучи чиңгиз айтматовниң киносиниң көрситилиши билән башланди. Ечилиш мурасимида түркийә мәдәнийәт вә саяһәт министири әртуғрул гүнәй, қирғизистан мәдәнийәттә вә учур министири султан райев әпәндиләр бу фестивалниң вә йипәк йолиниң әһмийити үстидә тохталди.

Бурса шәһәр башлиқи һикмәт шаһин ечилиш мурасимида қилған сөзидә, йипәк йоли карваниниң бүгүн тарихий йипәк йолиниң түгүни болған бурса шәһридә икәнликини, йипәк йолиниң пәқәтла йипәкниң әмәс мәдәний байлиқниң йоли икәнликини ейтти. У йәнә сөзидә әҗдатлиридин қалған йипәк йолидин ибарәт бу тарихи мирасни фестиваллар билән яшитишқа давам қилидиғанлиқини ейтти.

Юқиридики аваз улинишидин, бу кино мусабиқиси һәққидә мухбиримиз әркин таримниң ишлигән программисиға қулақ салғайсиз.