Һиндистанлиқ генерал хитайниң һәрбий тәһдитидин агаһландуруш бәрди

Һиндистан “екисприс” ахбаратиниң хәвиригә қариғанда, һиндистан генерали парнайк бир йиғинда сөз қилип, азад кәшмирдә хитай әскәрлириниң барғансери көпийиватқанлиқи, хитай әскәрлириниң уруш тохтитиш сизиқида мәвҗут икәнлики шуниңдәк һиндистанниң чегра әтрапида хитайниң бу хил һәрбий һәрикәтлири барлиқи қатарлиқ мәсилиләрдә һиндистан армийисигә агаһландуруш бәрди.

Һиндистанниң “телеграф” гезитиниң хәвиридә йеқиндин буян хитайниң пакистанниң гилгит вә балтистан районлириға әскәр орунлаштурғанлиқи, буниңдин һиндистанниң әндишә қиливатқанлиқини билдүрүлгән.

Һиндистанниң “һазирқи вақит” намлиқ телевизийисиниң сәйшәнбә күнидики хәвиригә қариғанда, һиндистанниң шималий район һәрбий әмәлдари генерал пернайик бир йиғинда сөз қилип мундақ деди: хитайниң әскәрлири ялғуз азад кәшмирдә әмәс, бәлки пакистанниң гилгит вә балтистан районлирида күндин күнгә көпийиватиду. Униңдин башқа йәнә хитай әскәрлири һиндистан чеграсидики уруш тохтитиш сизиқлириғиму йеқинлап кәлди. Бу һәқтә дәлил-испат бар. Хитай һиндистан чегралириға йеқин әтрапта җиддий йол ясимақта. Көплигән һиндистан хәлқи, әгәр пакистан билән һиндистан оттурисида бирәр тоқунуш йүз берип қалса хитайму һиндистанға қарши туруп пакистан тәрәпкә өтидиғанлиқидин әндишә қилмақта. Азад кәшмирниң тағлиқ районлирида хитай пакистан билән һәрбий алақә-мунасивәтлирини күчәйтмәктә. Бу әһвал һиндистанниң бихәтәрлики үчүн җиддий бир тәһдит пәйда қилиду.

Биз бу һәқтики пикир-қарашлирини елиш үчүн, түркийә истратегийә вә чүшәнчә идарисиниң истратегийә мутәхәссиси доктор әркин әкрәм вә пакистанда узун заман илим тәһсил қилған шундақла пакистан-һиндистан вә хитай мунасивәтлирини яхши билидиған уйғур зиялий һидайәтуллаһ оғузхан әпәндиләр билән сөһбәт елип бардуқ.