Мәсчити һәрәмни кеңәйтиш қурулуши башланди

Мурасим наһайити тәнтәнилик өткүзүлди. Мурасимға әрәб вә ислам мәмликәтлириниң мәсуллири, шундақла дуняниң һәр қайси җайлиридин кәлгән радио-телевизийә мухбирлири иштирак қилди. Бу қурулуш толуқ 6 йилда пүтүп чиқидикән вә нөвәттики мәсчити һәрәмни кеңәйтиш қурулуши тарихтики әң чоң кеңәйтиш қурулуши һесаблинидикән.

Сәуди әрәбистанида чиқидиған “әл вәтән”, “әл билад” вә “әл мәдинә” гезитлириниң хәвәр қилишичә, һәҗ яки өмрә қилиш мәқсити билән һәрәмгә келидиған мусулманларниң сани йилдин йилға ешип беришиға әгишип, мәсчити һәрәмдә җиддий қистилаңғулуқ пәйда болған болуп, һаҗилар мәсчити һәрәмгә сиғмайдиған болған иди. Бу әһвал сәуди әрәбистани һөкүмитини җиддий һәрикәткә кәлтүргән болуп, мәсчити һәрәмниң шамийә тәрипини кеңәйтиш қурулуши башлатқан иди. 19-Авғуст күни сәуди әрәбистан падишаһи абдулланиң мәзкур қурулушқа ул селиши билән бу қурулуш рәсмий башлинип кәтти.

www.waraqat.net

Мәсчити һәрәмдә бир вақитта 1 милйондин көп адәм намаз оқуйдиған болиду

Бу қетимқи кеңәйтишкә мәсчити һәрәмгә қошулидиған қурулуш әң мукәммәл вә әң заманий шәкилдә селинидикән. Бу кеңәйтиш тарихтики һәр қандақ бир чоң кеңәйтиштинму алаһидә катта кеңәйтиш һесаблинидикән. Нөвәттики кеңәйтиштә мәсчити һәрәмгә қошулидиған йеңи қурулушниң көлими 400 миң квадрат метир икән. Һазирғичә мәсчити һәрәмдә 900 миң адәм бирла вақитта намаз оқуялайду. Әмма бу қурулуш пүтүп чиққандин кейин мәсчити һәрәмдә бир милйон 200 миң адәм бирла вақитта азадә намаз оқуялайдикән. Нөвәттики йеңи қурулушқа һәр бириниң егизлики 92 метир келидиған 2 чоң мунарә чиқирилидикән.

Сәуди әрәбистан һөкүмәт мәнбәлириниң доклатиға асасланғанда, мәсчити һәрәмни кеңәйтиш йолида мәсчити һәрәм әтрапидики өй-макан вә қуру-җайларни сетип елиш үчүн һөкүмәт 40 милярд риял( 10 милярд 666 милйон доллар) сәрп қилған. Чүнки сәуди әрәбистаниниң қанунида шәхсләрниң йәр-земинлири һөкүмәткә керәк болуп қалғанда, бу йәр-земинләрниң игилирини йәрниң нормалдики баһасидин нәччә һәссә артуқ пул бериш билән рази қилиду. Сәуди әрәбистанидики бу есил қанунниң сайисида уйғурларниң мәсчити һәрәмгә йеқин болған вәқип биналири мәсчити һәрәмни кеңәйтиш зөрүрийити түпәйли һөкүмәт тәрипидин сетип елинип, нормал баһасидин нәччә һәссә көп пул бәргән. Нәтиҗидә уйғур вәқиплириниң иқтисадий милйонлап ешип барған. Бу уйғур хәлқиниң байлиқи дегәнлик.