Meschiti heremni kéngeytish qurulushi bashlandi

Se'udi erebistan padishahi abdulla 2011-yili 19-awghust jüme küni meschiti heremni kéngeytish üchün bashlan'ghan qurulushqa ul sélish murasimigha qedem teshrip qildi.
Ixtiyariy muxbirimiz ömerjan
2011.08.19
herem-yengi-meschit-305.jpg Meschiti heremge yéngidin qoshulushi pilanlan'ghan yéngi qurulushning ichidin körünüshi.
www.waraqat.net

Murasim nahayiti tentenilik ötküzüldi. Murasimgha ereb we islam memliketlirining mes'ulliri, shundaqla dunyaning her qaysi jayliridin kelgen radi'o-téléwiziye muxbirliri ishtirak qildi. Bu qurulush toluq 6 yilda pütüp chiqidiken we nöwettiki meschiti heremni kéngeytish qurulushi tarixtiki eng chong kéngeytish qurulushi hésablinidiken.

Se'udi erebistanida chiqidighan “El weten”, “El bilad” we “El medine” gézitlirining xewer qilishiche, hej yaki ömre qilish meqsiti bilen heremge kélidighan musulmanlarning sani yildin yilgha éship bérishigha egiship, meschiti heremde jiddiy qistilangghuluq peyda bolghan bolup, hajilar meschiti heremge sighmaydighan bolghan idi. Bu ehwal se'udi erebistani hökümitini jiddiy heriketke keltürgen bolup, meschiti heremning shamiye teripini kéngeytish qurulushi bashlatqan idi. 19-Awghust küni se'udi erebistan padishahi abdullaning mezkur qurulushqa ul sélishi bilen bu qurulush resmiy bashlinip ketti.

herem-yengi-meschit-385.jpg
Meschiti heremge yéngidin qoshulushi pilanlan'ghan yéngi qurulushning sirttin körünüshi.
www.waraqat.net

Meschiti heremde bir waqitta 1 milyondin köp adem namaz oquydighan bolidu

Bu qétimqi kéngeytishke meschiti heremge qoshulidighan qurulush eng mukemmel we eng zamaniy shekilde sélinidiken. Bu kéngeytish tarixtiki her qandaq bir chong kéngeytishtinmu alahide katta kéngeytish hésablinidiken. Nöwettiki kéngeytishte meschiti heremge qoshulidighan yéngi qurulushning kölimi 400 ming kwadrat métir iken. Hazirghiche meschiti heremde 900 ming adem birla waqitta namaz oquyalaydu. Emma bu qurulush pütüp chiqqandin kéyin meschiti heremde bir milyon 200 ming adem birla waqitta azade namaz oquyalaydiken. Nöwettiki yéngi qurulushqa her birining égizliki 92 métir kélidighan 2 chong munare chiqirilidiken.

Se'udi erebistan hökümet menbelirining doklatigha asaslan'ghanda, meschiti heremni kéngeytish yolida meschiti herem etrapidiki öy-makan we quru-jaylarni sétip élish üchün hökümet 40 milyard riyal( 10 milyard 666 milyon dollar) serp qilghan. Chünki se'udi erebistanining qanunida shexslerning yer-zéminliri hökümetke kérek bolup qalghanda, bu yer-zéminlerning igilirini yerning normaldiki bahasidin nechche hesse artuq pul bérish bilen razi qilidu. Se'udi erebistanidiki bu ésil qanunning sayisida Uyghurlarning meschiti heremge yéqin bolghan weqip binaliri meschiti heremni kéngeytish zörüriyiti tüpeyli hökümet teripidin sétip élinip, normal bahasidin nechche hesse köp pul bergen. Netijide Uyghur weqiplirining iqtisadiy milyonlap éship barghan. Bu Uyghur xelqining bayliqi dégenlik.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.