Пакистандики уйғурлар хитай әлчиханисиниң һейтлиқ совғисини рәт қилди

Хитай әлчиханиси бу қетимқи қурбан һейтта алаһидә тәйярлиқ қилип уйғурларни өзигә тартмақчи болған болсиму, пакистандики уйғурлар уларниң соғисини қобул қилмиған.
Мухбиримиз шөһрәт һошур
2011-11-11
Елхәт
Пикир
Share
Принт
Өмәр уйғур вәхпидә қурбанлиқ қилинған малларниң бири. 2011-Йили 6-ноябир, пакистан.
Өмәр уйғур вәхпидә қурбанлиқ қилинған малларниң бири. 2011-Йили 6-ноябир, пакистан.
RFA/Shohret Hoshur

Муһаҗирәттики уйғурлар ичидә, пакистандики уйғур муһаҗирларниң иқтисадий әһвали нисбәтән төвән һаләттидур. Шуңа дуня уйғур қурултийи бу қетим һейт мәзгилидә, пакистандики өмәр уйғур вәхпи арқилиқ бәлгилик миқдарда һейтлиқ совға әвәткән. Буниңдин хәвәр тапқан, пакистандики хитай әлчиханисиму дәрһал һәрикәткә өтүп, пакистандики уйғурларға һейтлиқ совға тарқатмақчи болған.

Пакистандики уйғурларниң дуня уйғур қурултийиға әгишип кетишидин әндишә қилған, пакистандики хитай әлчиханиси бу қетимқи қурбан һейтта алаһидә тәйярлиқ қилған. Әлчихана дәсләптә, әлчиханиға 100 уйғурни топлап һейт паалийити өткүзүш вә уларға һейтлиқ пул тарқитишни пиланлиған. Лекин, равалпиндидики хитай шериклири, бу вәзипини орундашқа қурби йәтмигән. Чүнки уйғурларниң һәммиси әлчиханиға беришни һәм совға қобул қилишни рәт қилған. Ахирида мәзкур җәмийәт тәдбирини өзгәрткән. Улар җамаәтни әлчихана орниға җәмийәт башлиқиниң өйигә тәклип қилған. «Һейтлиқ паалийәт» орниға, пәқәт «һейтлиқ пул тарқитиш» ни тәшвиқ қилған. Нәтиҗидә, яшанғанлар вә ағриқ-силақлар болуп, пәқәт 15 кишинила йиғалиған һәм улар 600 доллардин пул тарқитишқа вәдә берип, әмәлийәттә 100 доллардин пул тарқатқан.

Дуня уйғур қурултийиниң германийидики мәркизи оргини, түркийидики шәрқи түркистан маарип вә һәмкарлиқ җәмийити вә түркийидики бир қисим түрк тәшкилатлириму, пакистандики уйғурларға һейтлиқ пул вә мал әвәткән. Бу өмәр уйғур вәхпи тәрипидин тарқитилған вә пакистандики уйғур җамаити тәрипидин тәшәббускарлиқ билән қобул қилинған. Бу һейтлиқ хираҗәттин 300 гә йеқин киши бәһримән болған.

Биз хитай әлчиханисиниң пул тарқитиш җәрянини билип беқиш үчүн, әлчиханиниң пулини уқушмастин қобул қилған алтунхан ханим билән сөһбәтләштуқ.

Пакистандики уйғурлардин абдуқейим шәмшидин әпәнди, хитайниң һейтлиқ совғиси һәққидә пикир баян қилди.

Юқирида биз силәргә, пакистандики уйғурларниң мутләқ көп қисминиң хитай әлчиханисидин сунулған, һейтлиқ совғини рәт қилғанлиқи һәққидә хәвәр аңлаттуқ.

Пикирләр (0)
Share
Толуқ бәт