Бомбай һуҗумчиларниң еғир зәрбисигә учриди

Һиндистанниң бомбай шәһири чаршәнбә күни кәчтә бир гуруп һуҗумчиларниң еғир зәрбисигә учриди. Хәвәрләрдә көрситилишичә, әрәп деңизидин қолвақлар арқилиқ кәлгән 10 - 12 кишилик бир гуруп бомбайниң катта меһманхана, ашхана қатарлиқ сода мәркәзлиригә вә пойиз истансисиға һуҗум қилған.
Мухбиримиз шөһрәт һошур
2008.11.27
Hin-bombay-taj-maxal-305.jpg Сүрәт, 26 - нойабир күнидики һуҗумға учриған бомбай шәһиридики даңлиқ меһманханилардин бири таҗ - махал меһманханисиниң от кәткән көрүнүши.
AFP Photo

Вәқәдә һазирға қәдәр 110 киши өлгән вә 300 дин артуқ киши яриланған. Нөвәттә вәқә 11 ‏ - сентәбир вәқәсидин кейин йүз бәргән шиддити нисбәтән зор болған террорлуқ вәқәси дәп қаралмақта.

Һуҗумчилар, кәч саәт 10 әтрапида 10 орунға тәң бастуруп кирип, херидарларни оққа тутқан, вә бомба ташлиған вә бир қисим херидарларни гөрүгә еливалған. Нөвәттә һиндистан бихәтәрлик күчлири, гөрүгә елинғанларни қутулдуруш вә һуҗумчиларни уҗуқтуруш үчүн һәркәт елип бармақта.

Һуҗумға учриған орунлардин бири таҗ мәһәл меһманханиси болуп, меһманхана 10 саәттин артуқ муһасиригә елинғандин кейин, гөрүгә елинғанлар қутқузувелинған вә һуҗумчилар өлтүрүлгән. Обәрийо меһманханисида гөрүгә елинғанлардин һазирға қәдәр 45и қутулдурулған, 35 киши болса қутқузушни күтүп турмақта.

Бу қетимқи һуҗум пухта пиланланғанлиқи вә үстүн маһарәт билән иҗра қилинғанлиқи билән диққәтни тартмақта. Һазирға қәдәр бу вәқәниң җавабкарлиқини, "дәкка куҗаһидин" намидики бир исламий тәшкилат үстигә алған, әмма бу тәшкилат анчә тонулмиған бир тәшкилат болғачқа, тәрәпләр мәзкур тәшкилатниң җавабкарлиқ баянатиға гуман билән қаримақта.

Һиндистан баш министири бүгүн вәқәни вәһши терорлуқ вәқәси дәп әйиблиди, һәм вәқәниң арқисида ташқи күчләр мәвҗутлуқини билдүрди һәм һиндистан хәлқини террорлуқ һуҗумлириға қарита бирлик - иттипақлиққа чақирди. Америка президенти җорҗ буш, әнгилийә баш министири голден бравунлар вәқәни әйиплиди.

Бу қетимқи һуҗумда, һуҗумға учриған орунлар чәтәлликләр мәркәзләшкән орунлар вә гөрүгә елинғанларниң көпинчиси ғәрбликләр болуп, һуҗумни әлқаидә тәшкилатиниң елип барғанлиқи қилиниватқан пәрәзләрдин биридур. Шиветсийә дөләт мудапиә иниститутиниң мутәхәссиси магнас ранстроп мана бу қарашта. У вәқәниң әлқаидә билән четишлиқи барлиқини әң чоң еһтималлиқ дәп көрситиду.

Йәнә бәзи мутәхәссисләр, һуҗумни кәшмир партизанлириниң елип барғанлиқини тәхмин қилишмақта. Бу қетим һуҗумға учриған орунлардин бири бомбайдики йәһуди ибадәтханиси.

Гөрүгә елинғанлар ичидә, америка, әнгилийә, италийә, шиветсийә, канада, сингапор вә түркийә вәтәдашлири барлиқи мәлум. Бүгүн түркийидики "һөрийәт" гезитиниң хәвәр қилишичә, һуҗумчилар, гөрүгә елинғанлар ичидики мусулманларға алаһидә муамилә қилған вә икки нәпәр түрк вәтәдешини қоювәткән.

Бомбай шәһири һиндистанниң пул - муамилә мәркизи болуп, у һиндистанниң тиҗарий пайтәхти дәпму атилиду. Нопуси 13 милйон болуп, дунядики көп нопуслуқ шәһәрләрдин бири санилиду.

Хәвәр архиплирида көрситилишичә, бомбай шәһири йеқинқи йиллардин бери йүз бәргән террорлуқ һуҗумлирида 187 киши өлгән. Бу қетимқиси әң шиддәтликидур. Вәқәниң җавабкарлиқини үстигә алған "дәкка муҗаһидин" тәшкилати, бомбай шәһиридә бу хил һуҗумларниң бундин кейинму йүз беридиғанлиқи, вәқәдә өлгәнләрниң мәсулийити бомбай бихәтәрлик күчлиридә икәнлигини билдүргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.