Bombay hujumchilarning éghir zerbisige uchridi

Hindistanning bombay shehiri charshenbe küni kechte bir gurup hujumchilarning éghir zerbisige uchridi. Xewerlerde körsitilishiche, erep déngizidin qolwaqlar arqiliq kelgen 10 - 12 kishilik bir gurup bombayning katta méhmanxana, ashxana qatarliq soda merkezlirige we poyiz istansisigha hujum qilghan.
Muxbirimiz shöhret hoshur
2008.11.27
Share on WhatsApp
Share on WhatsApp
Hin-bombay-taj-maxal-305.jpg Süret, 26 - noyabir künidiki hujumgha uchrighan bombay shehiridiki dangliq méhmanxanilardin biri taj - maxal méhmanxanisining ot ketken körünüshi.
AFP Photo

Weqede hazirgha qeder 110 kishi ölgen we 300 din artuq kishi yarilan'ghan. Nöwette weqe 11 ‏ - séntebir weqesidin kéyin yüz bergen shidditi nisbeten zor bolghan térrorluq weqesi dep qaralmaqta.

Hujumchilar, kech sa'et 10 etrapida 10 orun'gha teng basturup kirip, xéridarlarni oqqa tutqan, we bomba tashlighan we bir qisim xéridarlarni görüge éliwalghan. Nöwette hindistan bixeterlik küchliri, görüge élin'ghanlarni qutuldurush we hujumchilarni ujuqturush üchün herket élip barmaqta.

Hujumgha uchrighan orunlardin biri taj mehel méhmanxanisi bolup, méhmanxana 10 sa'ettin artuq muhasirige élin'ghandin kéyin, görüge élin'ghanlar qutquzuwélin'ghan we hujumchilar öltürülgen. Oberiy'o méhmanxanisida görüge élin'ghanlardin hazirgha qeder 45i qutuldurulghan, 35 kishi bolsa qutquzushni kütüp turmaqta.

Bu qétimqi hujum puxta pilanlan'ghanliqi we üstün maharet bilen ijra qilin'ghanliqi bilen diqqetni tartmaqta. Hazirgha qeder bu weqening jawabkarliqini, "dekka kujahidin" namidiki bir islamiy teshkilat üstige alghan, emma bu teshkilat anche tonulmighan bir teshkilat bolghachqa, terepler mezkur teshkilatning jawabkarliq bayanatigha guman bilen qarimaqta.

Hindistan bash ministiri bügün weqeni wehshi térorluq weqesi dep eyiblidi, hem weqening arqisida tashqi küchler mewjutluqini bildürdi hem hindistan xelqini térrorluq hujumlirigha qarita birlik - ittipaqliqqa chaqirdi. Amérika prézidénti jorj bush, en'giliye bash ministiri goldén brawunlar weqeni eyiplidi.

Bu qétimqi hujumda, hujumgha uchrighan orunlar chet'ellikler merkezleshken orunlar we görüge élin'ghanlarning köpinchisi gherblikler bolup, hujumni elqa'ide teshkilatining élip barghanliqi qiliniwatqan perezlerdin biridur. Shiwétsiye dölet mudapi'e inistitutining mutexessisi magnas ranstrop mana bu qarashta. U weqening elqa'ide bilen chétishliqi barliqini eng chong éhtimalliq dep körsitidu.

Yene bezi mutexessisler, hujumni keshmir partizanlirining élip barghanliqini texmin qilishmaqta. Bu qétim hujumgha uchrighan orunlardin biri bombaydiki yehudi ibadetxanisi.

Görüge élin'ghanlar ichide, amérika, en'giliye, italiye, shiwétsiye, kanada, sin'gapor we türkiye wetedashliri barliqi melum. Bügün türkiyidiki "höriyet" gézitining xewer qilishiche, hujumchilar, görüge élin'ghanlar ichidiki musulmanlargha alahide mu'amile qilghan we ikki neper türk wetedéshini qoyuwetken.

Bombay shehiri hindistanning pul - mu'amile merkizi bolup, u hindistanning tijariy paytexti depmu atilidu. Nopusi 13 milyon bolup, dunyadiki köp nopusluq sheherlerdin biri sanilidu.

Xewer arxiplirida körsitilishiche, bombay shehiri yéqinqi yillardin béri yüz bergen térrorluq hujumlirida 187 kishi ölgen. Bu qétimqisi eng shiddetlikidur. Weqening jawabkarliqini üstige alghan "dekka mujahidin" teshkilati, bombay shehiride bu xil hujumlarning bundin kéyinmu yüz béridighanliqi, weqede ölgenlerning mes'uliyiti bombay bixeterlik küchliride ikenligini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.