Xu jintaw néme üchün xitayda yüz bergen chong weqelerning héchqaysini hel qilmaydu?

Bir nechche kün ichide, xelq'ara uchur wastiliri xitayning hazirqi weziyiti heqqide élan qilghan obzorlarda, xu jintawning xitayda yüz bergen chong weqelerning héchqaysini hel qilmighanliqini körsitipla qalmay, belki xu jintawning bundaq mesilini hel qilmasliq taktisini “Nölni nölge qoshi'ush oyuni” dep körsetti.
Muxbirimiz weli
2012.05.04
Share on WhatsApp
Share on WhatsApp
chen-guangcheng-US-elchixanidin-305.jpg Ema adwokat chén gu'angchéng amérika elchixanisidin chiqiwatqan körünüsh. 2012-Yili 2-may, béyjing.
AFP

Bir nechche kün ichide “Nyuyork taymis” gézitide “Bo shiley weqesi xitay kommunist partiyi'isning eng rezil noqtilirini ashkarilidi” serlewhilik obzor élan qilindi. En'giliyide chiqidighan “Pul mu'amile géziti” de “Wang lijün, chén gu'angchéng weqeliri xitay tewrimes hakimiyet dégen epsanini berbat qildi” serlewhilik obzor élan qilindi. “Xitaygha nezer” tor gézitide “Xu jintawning qanchilik waqti qaldi?” serlewhilik obzor élan qilindi. Bu maqalilarde xu jintawni, xitayda yüz bergen chong weqelerning héchqaysini hel qilmay turuwatidu dep körsetken.

“Pul mu'amile géziti”ning bayan qilishiche, xitayda yéqinqi mushu bir nechche ay ichide, ikki adem amérika elchixanisigha panahliq tilep kirdi. Bular qilidighan xizmitimu, shexsiy mijez - xaraktérimu bir - birge tüptin oxshimaydighan ikki adem. Buning biri, xitaydiki eng chong sheherning saqchi idare bashliqi, bu sheherdiki eng chong kommunist emeldarining eng yéqin adimi we chaparmini, qanunni kommunist partiye üchün xizmet qildurghan adem - wang lijün. Yene biri, xitayda kishilik hoquqi depsende qilin'ghan ademlerni azaptin qutuldurush üchün adwokatliq qilghanliqi üchün puqraliq hoquqidin mehrum qaldurulghan, nezerbendke alghan saqchilarning köz aldidin pem - paraset bilen qéchip qutulghan méyip )ema( adem - chén gu'angchéng. Xitayda yüz bergen bu weqeler, xitaydiki partiye we dölet muqeddes, tewrimes hakimiyet dégen epsanini berbat qildi. Bu tewrimes hakimiyetning rehberlik qatlimida qattiq dawalghush - hoquq urushi partlidi.

“Nyuyork taymis” gézitining bayan qilishiche, wang lijün weqesi xitay kommunist partiyi'isning eng rezil noqtilirini ashkarilap qoydi. Bu weqe arqiliq, chungching shehiride élip bérilghan “Qizil naxsha éytish - qara guruhlargha zerbe bérish” herikiti peqet emeldarlarning hoquq kürishi we bayliq toplash herikiti ikenliki ispatlandi. Melum boldiki, bo shileyning eng yéqin adimi wang lijün özini jazadin qutuldurup qélish üchün mes'uliyetni bo shileyge artip qoydi. Bo shileyning xotuni bolsa bayliq toplash üchün yüz bergen adem öltürüsh jinayitining jawabkarliqidin özini qutuldurush üchün, bu ishlarning hemmisi merkezdiki ju yungkangning yétekchilikide bolghan dep turuwaldi. Ju yungkangmu dölet puqralirining beden organlirini tirik turghuzup késiwalghan jinayetlerni, özi rehberlik qiliwatqan qanun organliri ötküzgen jinayet démey, belki jang zémin bilen xu jintawning bash sékritarliqida sadir qilin'ghan jinayet dégenni ipadilimey qalmidi.

“Xitaygha nezer” tor gézitide bayan qilinishiche, xu jintaw bir nechche on milyon xelqni öltürüp qan qerzige bughulup ketken kommunsit partiyining re'isi. Gerche uning her qandaq jinayetchini tutup jazalash hoquqi bolsimu, emma u, hoquq tutuwatqan on yildin buyan, “Tötinchi iyon weqesi” qatarliq hel qilishqa tégishlik tarixiy weqelerning héchqaysini hel qilmidila emes, köz aldida neq yüz bergen weqelernimu hel qilmay turuwatidu. Uning emel tutidighan waqti aza qalghachqa, hetta merkizi komitétta chong hoquq urushini keltürüp chiqarghan bo shiley weqesinimu gerche jinayi ishlargha chétip hel qilish üchün heriket qilghan bolsimu, emma emeliyette yenila hel qilmay qoyup qoydi. U hazir peqet alliqachan menpe'etke érishp bolghan kommunist emeldarlirining menpe'etini - hazirqi muqimliqni saqlap qélishnila oylawatidu.

Bu maqalide xu jintawning, adette mesilini hel qilish üchün heriket qilidighan, emma héchnimini hel qilmaydighan bundaq taktikisini, xu jintawning “Nölni nölge qoshush oyuni” dep körsetti. “Beydu” torida izahat bérilishiche, ikki adem bir - birige qarshi oynighan her qandaq oyunda choqum biri yéngidu, yene biri meghlup bolidu. Emma “Nölni nölge qoshush oyuni” - ikki terep peqet bir - biri bilen qarshilishidighan, emma bir - birini yengmeydighan oyun. Ikkisini qoshsa yene nöl bolidighan oyun.

Buningdin burun, 3 - ayning 30 - küni “Jenubiy koriye géziti” de, hindistan bash ministiri manmoxanning xitayni tenqidlep, hindistan hergiz xitay bilen bolghan munasiwette, xuddi xitaydek nölni nölge qoshidighan oyun oynimaydu, dep jakarlighan idi. Uningdin burun, xitay hökümiti türmige qamap qoyup nobil tinchliq mukapatini élishqa barghuzmighan lyu shawbo 2007 - yili 4 - ayning 1 - küni élan qilghan “Zeher tighliq xenjer” dégen maqaliside, xu jintawning “Nölni nölge qoshi'ush oyuni” adettikidek peqet her ikki terep bir - biri bilen qarshilishidighan, emma bir - birini yengmeydighan oyun emes, belki qarshilashqan her'ikki terepni teng yep kétidighan oyun dep körsetken idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.