Jongnenxey kimlerning téléfon alaqisini oghurlimaqchi bolsa, uni xu'awéy shirkiti orundaydu

Xu'awéy shirkitining élanliridin bir körünüsh.

Awstraliye hökümiti buningdin bir nechche kün burun, awstraliyige 35 milyard 900 milyon awstraliye dolliri meblegh sélip, keng léntiliq uchur alaqe torini yolgha qoymaqchi bolghan xitayning xu'awéy shirkitidin, mehsulatlirining iptida'iy nomurini (kélish menbesini) ashkarilashni telep qilghan idi. Xu'awéy shirkiti özini xususiy shirket atash pikride ching turuwalghandin kéyin, awstraliye bash ministiri géllard xanim, xitayning xu'awéy éléktir - téxnika shirkitining awstraliyige keng léntiliq uchur alaqisini yolgha qoyush üchün salidighan meblighi bixeterlik sewebidin cheklendi, bu, xitayning awstraliyige salidighan bashqa mebleghlirini chekligenlik emes, dep jakarlighan idi.

Bügün awstraliye soda ministiri krayg émirson xelq'aragha, xitayning xu'awéy éléktir - téxnika shirkitining awstraliyide keng léntiliq uchur alaqe torini yolgha qoyush üchün salidighan meblighi alliqachan cheklendi, bu heqte qaytidin belgilime chiqirilmaydu dep jakarlidi.

Teywende chiqidighan “Heptilik xewer géziti” bügün “Jongnenxey kimlerning téléfon alaqisini bilmekchi bolsa, uni xu'awéy shirkiti orundaydu” serlewhilik tepsili xewer élan qildi. Xu'awéy éléktir - téxnika shirkitining xitay azadliq armiyisige chétilidighan arqa körünishi ashkarilan'ghan bu tepsili xewerni “Xitaygha nezer” tor géziti köchürüp bésip kéngeytti.

“Heptilik xewer géziti” de élan qilin'ghan bu obzorda bayan qilinishiche, xitayning xu'awéy éléktir - téxnika shirkiti 2001 - yilidin kéyin afghanistanda talibanlar üchün téléfon alaqe tori qurup bergen shirket. Iran hökümiti üchünmu éléktronluq xet we téléfonlarning signal yönilishni bilish sistémisi qurup bergen, shundaqla iranning “Zaym” shirkiti bilen eng yéqin hemkarlishiwatqan shirket. Bu xu'awéy shirkitining xelq'arada memuriy emeldarlargha para bérishte dang chiqarghanliqimu bir pakit. Téximu qiziq yéri shuki, xitaydiki bundaq bir chong xelq'ara shirketning pay chéki bazirigha sélinmighan, uning hessidarliri intayin sirliq kishiler. Eger xitayning xu'awéy shirkitining “Jama'et qurulushi” dégen nam astida teywen'ge salmaqchi bolghan meblighi teywendiki minjindang, teylyendang partiyilirining cheklishige uchrap turmighan bolsa, belki hökümetler ara munasiwet yoli bilen teywen'ge singip kériwerse, yene bir nechche yilda teywendimu, xuddi chong quruqluqqa oxshash birmu “Pakiz uchur liniyisi” qalmaydu, pütün xelqning we herbiy qisimlarning téléfon - uchur mexpiyetliki mewjut bolmaydu.

Xitayning xu'awéy éléktir - téxnika shirkiti 1982 - yili shénjénda qurulghan, deslep tizimlatqan waqittiki meblighi aran 20 ming yu'en. Emma u hazir dunya boyiche ikkinchi chong éléktir - téxnika shirkiti,uning meblighi alliqachan 30 milyard amérika dollirigha yetken.

Amérika merkizi axbarat idarisining 2011 - yilidiki doklatida ashkarilinishiche, bu shirketni “Xu'awéy rohi” dep atilidighan ikki adem idare qilidu. Uning biri shirketning bash mudiri rén jéngféy, u, azadliq armiyining uchur - alaqe tarmaqlirida 14 yil ishligendin kéyin herbiydin chékinip, qéyin atisi méng dosho (sichu'en ölkisining mu'awin bashliqi) ning yardimi bilen, xitay azadliq armiyisining gherbiy jenup herbiy rayonida téléfonlarni programmiliq téléfonlargha özgertidighan bir chong bazar tapqan kishi. Ikkinchisi shirketning hessidarliq hey'itining mudiri sün yafang, u ali mektepni püttürgendin kéyinla, xitayning bixeterlik idarisige teqsimlinip, dölet bilen herbiy qisimlar otturisidiki uchur - alaqichiliq bilen shughullinip kéliwatqan kishi.

Amérika merkizi axbarat idarisining 2011 - yilidiki doklatida ashkarilinishiche, xitayning xu'awéy shirkiti 2011 - yili 10 - aydin bashlap, béyjing hökümitining 228 milyon yu'en meblighi bilen, xuddi sowét ittipaqining k g b sidek axbaratchiliq bilen shughullinishqa bashlighan. U, xitay hökümiti üchün téléfon uchurlirini oghirliqche anglash sistémisi qurup chiqqandin kéyin yene, qolini afriqa, ottura asiya we jenubiy amérikigha sozghan. Bu jeryanda, amérikining “Üch yapraq” markiliq éléktir - téxnika shirkitini we “Motorola” belgilik éléktir - téxnika shirkitini sétiwélish üchün besh qétim urunup körgen. Sirilanka bash ministirining yiqilishi, jenubiy amérika kolombiya shirkitining bash mudirining yiqilishi, panama “3G” délosi qatarliqlarning hemmisini xitayning mushu shirkiti para bérip peyda qilghan.

Xitayning bu xu'awéy shirkiti hazir en'giliyining éléktir - téxnika sistémisigha we amérikining bashqurulidighan bomba sistémisigha bösüp kérishke urunuwatidu. Amérika, hindistan, awstraliye qatarliq döletler hazir xu'awéy shirkitining singip kirishini cheklewatidu uning bilen hemkarlishishni ret qilip kéliwatidu.

Birleshme agéntliqi bügün “Xitayning qolini uzun sozuwatqanliqidin agah bolush kérek” serlewhilik obzor élan qildi. B b s mu “Xitayning awstraliyide yolgha qoymaqchi bolghan keng léntiliq uchur alaqe tori cheklendi” serlewhilik obzor élan qildi. Bügün xitayda shexsiyler bu heqte yazghan obzorlarmu köp.