Һүсәнҗан җелилниң хитайға қайтурулиши, канада даирилириниң наразилиқини қозғиди

• Мухбиримиз әқидәниң бу һәқтики толуқ мәлумати
• Download story audio

Һүсәнҗан җелил

Сиясий паалийәтлири түпәйли 1990 ‏- йиллири чәтәлгә қечип чиққан һүсәнҗан җелил, 2001 ‏- йили бирләшкән дөләтләр тәшкилати мусапирлар идарисиниң орунлаштуриши билән канадаға келип, канада пуқралиға өткән, у бу йил аяли вә үч балиси билән бирликтә өзбекистанға уруқ - туққанлири билән көрүшүш үчүн барған. Өзбек даирилири 27 ‏- март күни, һүсәнҗан җелилни қолға алған иди.

Гәрчә, канада һөкүмити, һүсәнҗан җелилниң өзбек даирилири тәрипидин тутулғанлиқиға қаттиқ наразилиқ билдүрүп, өзбекистан һөкүмитидин униң дәрһал қоюп берилишини тәләп қилған һәмдә уни қутқузуш үчүн дипломатийә паалийәтлирини давамлаштуруп кәлгән болсиму, бирақ өзбекистан тәрәп хәлқара қанунларға хилап һалда һүсәнҗан җелилни йәнила хитайға қайтуруп бәргән.

Канада ташқи ишлар министирлиқи дүшәнбә күни, өзбекистан һөкүмитиниң һүсәнҗан җелилни хитайға қайтуруп бәргәнликини униң аяли камиләгә хәвәр қилған.

Канада пуқраси уйғур һүсәнҗан җелилниң өзбекистан һөкүмити тәрипидин хитайға қайтурулуши, уйғур җамаити арисида ғул - ғула қозғапла қалмай, хәлқара җәмийәтниң күчлүк диққитини қозғимақта.

Нөвәттә канада һөкүмити, өзбекистанниң бу қилмишини қаттиқ әйиблигән, канада мәтбуатиниң хәвәр қилишичә, канада ташқи ишлар министири питер маккәй пәтәр маккай , өзбекистанниң һүсәнҗан җелилни канадаға қайтуруп бериши үчүн, өзбекистан даирилиригә бир дипломатик нота тапшурған. Лекин хитай даирилири һазирға қәдәр бу һәқтә һечқандақ инкас билдүрмиди.

Бу һәқтә техиму көп мәлумат игиләш үчүн, мухбиримиз әқидә өзбекистанниң америкидики баш әлчиханиси, һүсәнҗан җелилниң аяли камилә ханимниң аниси вә канада уйғур җәмийитиниң рәиси мәмәт тохти әпәндини телефон зиярити қилди.