Xotende ikki neper xitay dukandar öltürülgen

Weqe xoten shehiridin 13 kilométir uzaqliqtiki layqa yézisida yüz bergen. Ikki heptining aldida xélil jélil qatarliq 3 neper Uyghur yash layqa yézisidiki qawaqxana sahibi bilen jédelleshken.
Muxbirimiz shöhret hoshur
2008.11.21
uyghur-boway-305.jpg Uyghur kochilirining biride kétip barghan uyghur boway.
RFA Photo

Weqe xoten shehiridin 13 kilométir uzaqliqtiki layqa yézisida yüz bergen. Ikki heptining aldida xélil jélil qatarliq 3 neper Uyghur yash layqa yézisidiki qawaqxana sahibi bilen jédelleshken.

Jédelning aqiwitide qawaqxana sahibi bolghan xitay er - ayal ölgen. Jidelge arilashqan 3 neper Uyghur yashtin ikki nepiri shu küni tutulghan, yene bir nepiri yeni xélil jélil weqedin 10 kéyin tutulghan.

Biz yerlik saqchi ponkitidin weqeni sürüshte qilghinimizda, weqening yüz bergenlikini we xélil jélilning tutulghanliqini bildürdi. Emma weqening tepsilati heqqide melumat bermidi.

Yerlik ahalilerdin biri weqening kélip chiqish jeryani heqqide bizge qisqiche melumat berdi.

Bu kishining bildürüshiche, qawaqxana qatnash tügünige jaylashqanliqi üchün jem'iyet tertipige her tereptin ziyan keltürgen. Ahalilerning mezkur qawaqxanini taqash telipi hökümet da'irilirining ret qilishigha uchrighan. Netijide mezkur toqunush kélip chiqqan.

Bir neper gumandarni qolgha chüshürüsh üchün yüz neper bigunah insanning xata tutulushigha yol qoyush, wang léchüenning muqimliq tedbirliridin biridur. Bu qétimqi weqedin kéyin ene eshu tedbirning yolgha qoyulghanliqi bayqalmaqta.

Qawaqxana we pahishxana qatarliq Uyghurlarning milliy exlaqigha xilap tijaret orunliri yéqinqi yillardin béri Uyghur musteqilchilirining hujum nishani bolup kelmekte.

Bu yil yazda ürümchide yüz bergen 8 ‏- iyul weqesining bashlinishidimu, Uyghur yashliri ürümchi shehiridiki bir güzellik salonigha hujum qilghan. 10 ‏- Awghust kucha weqesidimu, xelchem abliz qatarliq Uyghur jengchiler saqchi we hökümet binaliri bilen birlikte pahishexanilarni partilatqan.

Bu qétim xotenning layqa yézisida yüz bergen qawaqxana xojayinini öltürüsh weqesining pilanliq élip bérilghan bir siyasiy weqe yaki ushtumtut yüz bergen ijtima'iy weqe ikenliki hazirche melum emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.