Ilham toxti: ishlepchiqirish qurulush armiyisi alahide hoquqluq

Musteqil tetqiqatchi, merkizi milletler uniwérsitétining dotsénti ilham toxti ependi ötken hepte radi'omiz ziyariti qobul qilip, Uyghurlarning siyasiy ornida töwenlesh körülüwatqanliqini bildürgen we Uyghur élige yerleshken “Bingtu'en” yeni ishlepchiqirish qurulush armiyisi heqqidimu toxtalghan idi.

U, ishlepchiqirish qurulush armiyisidin ibaret bundaq alahide imtiyazliq organning pütün xitay boyiche peqet Uyghur aptonom rayonidila mewjut bolup turuwatqanliqini bildürdi.

Ilham toxti ependi ishlepchiqirish qurulush armiyisi Uyghur aptonom rayonida érishiwatqan imtiyazlirining “Uyghur aptonom rayoni” dep atilidighan bu milliy térritoriyilik rayondin köp derijide üstün turuwatqanliqini, Uyghurlarning iqtisadiy we siyasiy jehettiki ornining 60 yildin buyan barghanche töwenlewatqanliqini emili misallar bilen otturigha qoydi.

Ilham toxti ependi bayanida yene, xitay kompartiyisining 18-qurultiyigha qatnashqan Uyghur wekilliri sanining körünerlik azayghanliqigha alahide diqqet qilishqa bolidighanliqinimu qoshumche qildi.

Uyghur millitidin bolghan hökümet kadirlirining xitay hakimiyet sistémisidiki siyasiy orni we tesir da'irisining xitaydiki tibet, mongghul, tunggan, ju'angzu qatarliq xitay bolmighan milletlerdin chiqqan kadirlardin töwen ikenlikini bayan qilghan ilham ependi, nöwette hökümet organlirida wezipe ötewatqan Uyghur kadirlirining meyli san jehette bolsun, meyli hoquq jehette bolsun Uyghur aptonom rayoni qurulghan deslepki mezgillerdiki imtiyazlardin mehrum qilinishidek ehwallarning aptonomiye qanunidiki maddilargha xilap ikenlikini, yéngi bir nöwetlik xitay rehberlik qatlimining bu ehwalgha diqqet qilishi kéreklikini tekitlidi.

Ilham toxti ependi yene yéngi bir nöwetlik xitay rehberlik qatlimidin kütidighan ümidi we telipini otturigha qoyup, Uyghur aptonom rayonida nöwette yürgüzülüwatqan siyaset we rayonda bingtu'enning érishiwatqan imtiyazlirining barghanche köpiyip, yerlik Uyghurlarning siyasiy we iqtisadiy ornining barghanche töwenlep bérishidek weziyetke shi jingping qatarliq yéngi bir nöwetlik xitay rehberlirining jiddiy qarishini ümid qilidighanliqini bildürdi.