Ilham toxti 18-qurultay mezgilide öz yurtidinmu qoghlandi

Xitay merkizi milletler uniwérsitéti dotsénti ilham toxti ependimu ene shu kishilik hoquq aktipliri yoluqqan qismetlerge  duch kelgen.  U bu yil 20-öktebir  béyjingdiki ikki neper dölet amanliqini qoghdash saqchisining nazaret qilishi bilen ürümchige yétip kelgen. Emma u öz yurtidimu qoghlan'ghan.

Radi'omiz ziyaritini qobul qilghan ilham toxtining bildürüshiche, eyni chaghda uning Uyghur diyarigha yétip kélishimu yerlik da'irilerni bi'aram qilghan. Hetta  uning bilen körüshken we téléfon alaqisi qilghan kishilermu qattiq agahlandurushqa uchrighan we nazaret astigha élin'ghan.

Ilham toxti ependi yene, Uyghur aptonom rayonidiki yerlik saqchi da'irilirining uning a'ile ezaliri we uruq-tughqanlirigha dawamliq bésim ishlitishi, uninggha éghir rohi bésim élip kelgenlikini bildürdi.

Bu yil 9-ay mezgilide “Twitér” qatarliq tor béketliride élan qilin'ghan uchurlardin melum bolushiche, ilham toxti ependining bu yil 6 yashqa kirgen oghli béyjing xeydiyen rayonidiki bashlan'ghuch mektepke qobul qilinmighan.

Ilham toxtining bildürüshiche,  mektep da'iriliri uning oghlining néme üchün mektepke qobul qilinmighanliqi heqqide héchqandaq chüshendürüsh bermigen, béyjing saqchi da'iriliri bolsa oghlining mektepke qobul qilinmasliqi uning pa'aliyetliri bilen munasiwetsiz ikenlikini izahlashqa tirishqan.

Melum bilishiche, munasiwetlik da'iriler ilham toxti bilen körüshüp, xitay kompartiyisining 18-qurultiyidin kéyin  oghlining oqush mesilisi hel bolidighanliqini bildürgen bolsimu, emma uning oghli ta bügün'giche mektepke kirelmigen.

18-Qurultay mezgilide  nezerbend astigha élin'ghan ilham toxti ependi, ötken hepte radi'omiz Uyghur bölümining mexsus ziyaritini qobul qilip, özining 18-qurultaydin kéyinki Uyghur weziyiti we xitay hökümitining Uyghurlargha qaratqan siyasiti heqqidiki qarashlirini bayan qilghan idi.