Kechküzdiki qar arilash yamghur ili déhqanlirini halsiratti

Radi'omiz ziyaritini qobul qilghan déhqanlarning bildürüshiche, ili teweside ötken hepte bashlan'ghan yamghur ikki kündin buyan qar arilash yamghurgha aylan'ghan. Déhqanlarning déyishiche, bu ehwal, qonaq qatarliq zira'etlirini téxi yighiwalalmighan, bulturqi yamghur hem qar apitide örülüp ketken öylirini yasap bolalmighan ili déhqanlirigha téximu zor ziyanlarni élip kélishi mumkin iken.
Muxbirimiz mihriban
2010-10-29
Élxet
Pikir
Share
Print
26 - Iyuldin 28 - iyulghiche ili wadisida qattiq yamghur yéghip, tékes nahiyiside apet keltürüp chiqarghan bolup, 1311 öy örülüp chüshken. Sürette, öyi apetke uchrighan melum tunggan dihqan öyi aldida.
26 - Iyuldin 28 - iyulghiche ili wadisida qattiq yamghur yéghip, tékes nahiyiside apet keltürüp chiqarghan bolup, 1311 öy örülüp chüshken. Sürette, öyi apetke uchrighan melum tunggan dihqan öyi aldida.
http://211.138.34.66/news Din élindi.

Ili hökümet tor bétining xewer qilishiche, bu yil kech küz mezgilide ili rayonida yamghurluq hawarayi hadisisi yüz bergenliki heqqide xewer bérilgen. Ili hökümet tor betliride bérilgen xewerlerde bu yilqi yamghurluq hawarayigha qarita, herqaysi nahiyilerning apetning aldini élish xizmitini kücheytkenliki xewer qilin'ghan bolsimu, emma déhqanlar uchrawatqan ziyanlar heqqide héchqandaq xewer bérilmigen.

Radi'omizning ziyaritini qobul qilghan déhqanlar bolsa, bu yil küzdiki yamghurning ili déhqanlirigha yéngi apetlerni élip kéliwatqanliqini bildürüshti. Birnechche kün ilgiri ghulja nahiyisidin ziyaritimizni qobul qilghan bir déhqan bu yilqi yamghurning déhqanlargha élip kélidighan ziyinining ötken yildikidin kem bolmaydighanliqi heqqidiki perizini otturigha qoydi. Uning bildürüshiche, hazir yézida yene 50%tin köprek déhqanning qonaq qatarliq zira'etliri téxi yighiwélinmighan halette bolup, nöwette heptidin buyan pilastik yopuq yépilghan bu qonaqlarning dimiqip qayta bixlap kétish yaki kökirip kétish xewpi bar iken. Uning qarishiche, bu ehwal déhqanlarning qonaqtin kirim qilish ümidinimu yoqqa chiqirish aldida iken.

Bu déhqan yene, ötken heptidin buyan toxtimay yaqqan yamghurning, hawaning tuyuqsiz sowup kétishi bilen qar arilash yamghurgha aylinish aldida turghanliqini, bu ehwalning yaziche qurulush qilip, bulturqi qar hem yamghur apitide örülüp ketken öylirini yasap halidin ketken déhqanlarning yasap bolalmighan öylirini weyran qilip, déhqanlargha yene yéngi ziyanlarni élip kéliwatqanliqini bildürdi.

Ziyaritimizni qobul qilghan bir xanimning bildürüshiche, ili teweside yaqqan yamghur birnechche kündin buyan qar arilash yamghurgha ayliniwatqan bolup, bu ehwal déhqanlarni étizda qalghan qonaq qatarliq zira'etlerni yighiwélishqa hem xaman'gha döwilep qoyup sétish üchün teyyarlan'ghan uwitilghan qonaqlarni taghargha qachilashqa imkan bermigen.

Bu xanim yene, hökümet gerche déhqanlargha yardem béridighanliqini wede qilghan hem bezi tedbirlerni qolliniwatqan bolsimu, emma yergila tayinip qalghan, bashqa kirim menbesi bolmighan déhqanlarning turmushining yenila éghir halette ikenlikini bildürdi. U sözide bolupmu bulturdin buyan dawamlishiwatqan yamghur hem qar apitining déhqanlarni téximu halsiratqanliqini bildürdi.

Uyghur élidin ziyaritimizni qobul qilghan bir ziyaliy öz bayanida, xitay hökümitining "shinjanggha yardem bérish", rayonning iqtisadini tereqqiy qildurush namida Uyghur aptonom rayonidiki yer üsti yer asti kan bayliqlirini échishni tézlitip, rayonda nurghun qurulushlarni sélip, shirketlerni quruwatqan bolsimu, emma buningdin yenila köchmen xitaylar nep éliwatqanliqini bildürdi.

U sözini dawamlashturup,‏ -- qarang, taghlirimizda kanlar échilip, charwichilar mal béqishqa amalsiz qaldi. Déhqanlarning yerlirini xitay shirketliri sétiwélip sayahet rayonliri quruwatidu. Emma, bu kanlarda, sayahet merkezliride Uyghurlargha bolupmu déhqan, charwichilirimizgha ishligüdek ish yoq. Mana hazir ularning öz jénini béqishi üchün qaldurulghan ashu azghina yerliridiki zira'etlirimu mushundaq tebi'iy apetler sewebidin weyran bolup, ularning tirikchilik yoli üzüwétilmekte, ‏-- dédi.

Yuqiridiki awaz ulinishidin, bu heqtiki melumatimizning tepsilatini anglaysiler.

Toluq bet