Istanbulda "Uyghur pen-ma'aripi we kelgüsi tereqqiyati" dégen témida ilmiy muhakime yighini ötküzüldi

Bu ilmiy muhakime yighinigha istanbuldiki her qaysi uniwérsitétlarda oquwatqan Uyghur oqughuchilar, jem'iyettiki meripetperwer zatlar we türkiyide chong bolghan Uyghur yashlardin terkib tapqan 60 din artuq kishi qatnashti. Yighin qur'an kerim tilawet qilish bilen bashlandi. Yighinda Uyghur akadémiyisining re'is wekili abdulhemit qaraxan ependi échilish nutqi sözlidi. Abdulhemit ependi özining sözide bu qétimliq ilmiy muhakime yighinining chet'eldiki Uyghur oqughuchilar arisida élip bérilghan tunji qétimliq Uyghur tilidiki ilmiy sewiyisi yuqiri muhakime yighini ikenlikini tilgha aldi.

RFA/Arslan

U, bu yighinning oqughuchilarni ilhamlandurup bashqilargha ülge bolush, yash oqughuchilarning özini namayan qilip kéyinki ilmiy we xizmet hayatigha ul sélishi üchün paydiliq ikenlikini tekitlidi.

Abdulhemit ependi yene ishlitish da'irisi kündin-kün'ge tariyip kétiwatqan Uyghur tilining zamanning keynide qalmighanliqi, dunyadiki ilghar tillargha oxshashla yuqiri sewiyilik, ilim sahesidimu ünümlük halda qollan'ghili bolidighanliqini ispatlash jehettiki ehmiyetlirini tekitlep ötti.

Bu ilmiy muhakime yighinida istanbulning oxshimighan uniwérsitétlirida doktor we magistirliq unwanliri üchün oquwatqan Uyghur oqughuchilardin 9 kishi öz kesipliri boyiche, jümlidin, qedimki Uyghurche--xaqaniye Uyghur tili, chaghatay Uyghur tili we hazirqi zaman Uyghur tili mesililiri, iqtisad we bazar igiliki hem bashqa saheler boyiche ilmiy doklat oqudi.

Ular oqughan doklatlar arisida "altun we tashqi péréwot", "bazar ilmi heqqide deslepki chüshenche", "pul-mu'amile we uning siyasetke bolghan tesiri", "simsiz alaqe téxnikisi we signal analizi toghrisida qisqiche chüshenche" dégen témilardiki doklatlar alahide qiziqish qozghidi.

Her bir doklat teqdim qilin'ghandin kéyin so'al-jawab shekilde bes-munazire élip bérildi. Yighin jeryanida yighin ishtirakchilirining keypiyatini kötürüsh üchün "ghezep we zar", "ana wetinige bolghan séghinish" dégen'ge oxshash shé'irlar déklamatsiye qilindi.

Biz bu yighin heqqide toluq melumatqa érishish üchün Uyghur akadémiyisining bash katipi doktor ablet turan ependi bilen söhbet élip barduq.