Yaponiyide “Sherqiy asiya we xitaydiki insan heqliri mesililiri” témisida yighin chaqirildi

Bu yighinda Uyghur ziyaliysi turmemet hashim “Sherqiy türkistanning nöwettiki insan heqliri mesililiri” témisida doklat berdi. Bu qétimqi insan heqliri muhakime yighinigha yaponiyidiki nopuzluq démokrat xitay pa'aliyetchilerdin démokratik xitay ittipaqining mu'awin re'isi hem yaponiye shöbisining re'isi lin féy ependi, bash katipi wang dey ependi, yokoxama toyin uniwérsitéti proféssori we dangliq tibetlik alim pema gyarpo ependi, ichki mongghul xelq partiyisining yaponiyidiki wekili kereyt xubisgalt ependi, insan heqliri pa'aliyetchisi da'isuke kitayi'i, xitay kompartiyisidin chékinip chiqishqa yardem bérish merkizi yaponiye shöbisining bashliqi kuniyu sato ependilermu munasiwetlik témilarda doklat berdi.

Bu yighin'gha nöwette yaponiyide ziyarette boluwatqan tibet ayallar birleshmisining re'isi dolkar lihamo kirti xanim alahide méhman süpitide qatniship tibetning hazirqi weziyiti heqqide doklat berdi.

Bu qétimqi muhakime yighinigha xitay démokratchiliri, yaponiyilik herqaysi sahe kishiliri, we axbarat xadimliridin bolup köp sanda kishi qatnashti.

Uyghur ziyaliysi turmemet hashim ependi doklatida 2009- yili 5- iyul ürümchi weqesidin buyanqi sherqiy türkistanning weziyitini tonushturush bilen birge, nuqtiliq halda diyarim tor bétining bashqurghuchisi dilshat perhat, selkin tor bétining bashqurghuchisi nur'eli obul, shebnem tor bétining bashqurghuchisi nijat azad, qanliq qirghinchiliq ehwalini chet'elge yetküzgenliki tüpeyli muddetsiz qamaq jazasi bérilgen gülmire emin, we gheyret niyazdin ibaret siyasiy mehbuslarning paji'elik ehwalini tepsiliy tonushturup ötken. Biz yighin heqqide téximu tepsiliy melumat élish üchün turmemet hashim bilen téléfon söhbiti élip barduq.