Uyghur diyarida intérnét yenila taqaqliq halette turmaqta

Xitay hökümiti "5 - iyul weqesi"din kéyin Uyghur aptonom rayonining sirt bilen bolghan téléfon we intérnét alaqisini üzüp tashlighan idi. Xelq'ara jem'iyetning bésimi hem xitayning öz ichidiki xelqning naraziliqliri kücheygenliki sewebidin, bu hepte xitay hökümiti Uyghur aptonom rayonining sirt bilen bolghan téléfon alaqisini eslige keltürgen bolsimu, emma intérnét yenila eslige kelmigen.
Muxbirimiz mihriban
2010-01-29
Élxet
Pikir
Share
Print
21 ‏- Iyun ürümchidiki " qaynam " résturanida ötküzülgen tunji qétimliq " atilar  bayrimi" din körünüsh.
21 ‏- Iyun ürümchidiki " qaynam " résturanida ötküzülgen tunji qétimliq " atilar bayrimi" din körünüsh.
www.diyarim.com Din élindi. Neshir hoquqi www.diyarim.com Ning.

Shundaqla, Uyghur tor betliri taqaqliq halette bolup, bu tor bet bashqurghuchiliri hélimu xitay türmiliride tutup turulmaqta.

Gerche ötken hepte xitay da'iriliri xelq'araning küchlük bésimi we weten ichidiki xelqning qattiq naraziliqi sewebidin, Uyghur aptonom rayonining "5 - iyul ürümchi weqesi" din kéyin üzüwétilgen téléfon we intérnét alaqisini eslige keltüridighanliqini jakarlap, bu heptining béshida xelq'ara téléfon alaqisini eslige keltürgen bolsimu, emma Uyghur aptonom rayonining intérnét alaqisi yenila eslige kelmigen. Shundaqla "5 - iyul ürümchi weqesi"ning kélip chiqishida qutratquluq qilghan dep eyiblen'gen" Uyghur biz", " diyarim", " selkin" qatarliq Uyghur tor betlirining bashqurghuchiliri hélimu xitay türmiliride tutup turulmaqta.

Uyghur élide intérnét alaqisining üzüwétilishi, bolupmu Uyghur tor betlirining taqilip, tor bet bashqurghuchilirining hélimu xitay türmiliride tutup turulushi 7 aydin buyan xelq'ara jem'iyetning diqqet - étibarini qozghap kéliwatqan bolup bu sewebtin xitay da'iriliri eyiblinip kéliwatqan idi.

Bügün xelq'ara chégrisiz muxbirlar teshkilati öz tor bétide "shinjangda intérnét téxiche eslige kelmidi" namliq maqale élan qilghan bolup, maqalide, "Uyghur biz", "diyarim", "shebnem", "selkin", "ulinish", "öz makan" qatarliq Uyghur tor betlirining téxiche échilmighanliqi, shundaqla Uyghur diyaridiki tor bet bashqurghuchiliridin dilshat perhat, nur'eli, obulqasim, muhemmet qatarliqlarning téxiche tutup turuluwatqanliqi bayan qilinip, xitay da'irilirining intérnétni qamal qilip bu rayonning tashqi alem bilen bolghan normal alaqisini üzüwetkenlikini, Uyghur tor betlirini taqap, tor bashqurghuchilirini kishilik erkinliktin mehrum qilghanliqini eyibligen.

Chégrisiz muxbirlar teshkilati élan qilghan bu maqalide xitay hökümiti eyiblinip, "biz xitay hökümitining özining bir tereplime teshwiqatliri arqiliq '5 - iyul weqesi'diki mes'uliyetni Uyghur tor betlirige artip, Uyghur rayonining intérnét alaqisini taqap, bu rayonning dunya bilen bolghan baghlinishini üzüwetkenlikini eyibleymiz," déyilgen.

Maqalide yene, xitay hökümitining ötken hepte téléfonda uchur yollashni eslige keltürgen bolsimu, lékin téléfon uchurlirigha qaratqan nazaretni téximu kücheytkenlikini, 17 - yanwar küni, 2 neper Uyghurning "milletler ittipaqliqigha hem jem'iyet muqimliqigha buzghunchiliq xaraktéri bolghan uchurlarni yollap dölet bixeterlikige tehdit saldi, térrorluq mezmunidiki uchurlarni yollidi" dégen bahaniler bilen xitay dölet bixeterlik idarisi teripidin tutup kétilgenliki bayan qilin'ghan.

Bügün "diyarim" tor bétining chet'ellerdiki bashqurghuchilirining biri bolghan dilmurat perhat ependi radi'omiz Uyghur bölümining ziyaritini qobul qilip, "diyarim" tor bétining sahibi bolghan inisi dilshat perhat qatarliq Uyghur tor bet bashqurghuchilirining hélimu xitay hökümiti teripidin tutup turuluwatqanliqini, inisi qatarliq tor bet bashqurghuchilirining baldurraq erkinlikke chiqishi üchün, özining "xelq'ara chégrisiz muxbirlar teshkilati", " kishilik hoquq komitétliri", b b s qatarliq xelq'ara metbu'atlargha muraji'et qilip kéliwatqanliqini bayan qildi.

Dilmurat perhat ependi hazir xitay xelq'aragha élan qilghan 2 - ayning 1 - heptisidin bashlap Uyghur aptonom rayonidiki intérnét alaqisini pütünley échiwétidighanliqi heqqidiki uchurgha qarita öz qarishini bayan qilip, gerche xitay hökümiti intérnétni échiwetken halettimu, Uyghur tor betlirining eslige kélishi üchün yene bir mezgil kétishi mumkinlikini bayan qildi.

Dilmurat perhat ependi sözide yene, hazir özining Uyghur tor betlirining hazirqi ehwali hem 30 din artuq tor bet bashqurghuchilirining idiye özgertish bahaniside hélimu xitay hökümiti teripidin tutup turuluwatqan ehwalni özi turushluq dölet en'gliye parlaméntidiki munasiwetlik erbablargha inkas qilghanliqini, en'gliye tashqi ishlar ministirliqining bu ishqa köngül bölüwatqanliqini bayan qildi.

Xitaydiki intérnét qamalini xelq'ara kishilik hoquq teshkilatlirila eyiblep kéliwatqan bolmastin, belki yawropa birliki, amérika qatarliq gherb démokrat döletliri üzlüksiz eyiblep kéliwatqan idi. Bolupmu yéngi yil kirgendin buyan gogul shirkiti xitayning kishilerning éléktronluq xet alaqilirini tekshürüsh telipini ret qilip, xitay baziridin chékinishni qarar qilghandin kéyin, xitaydiki intérnét qamali xelq'aradiki nurghun döletler teripidin qattiq eyiblendi.

22 - Yanwar küni amérika dölet tashqi ishlar ministiri hélariy klinton xanim xitay qatarliq döletlerni intérnét erkinlikini boghush bilen eyiblep xitayni puqralarning intérnét erkinlikini qoyuwétishke chaqirghan idi.

Yuqiridiki awaz ulinishidin, bu heqtiki melumatimizning tepsilatini anglaysiler.

Toluq bet