Iranning ikki xil siyasiti

Iranning ereb döletliri bilen bolghan diplomatik munasiwiti yéqinqi waqitlardin biri intayin ajizliship barmaqta. Buni az dep ikki terep otturisida bezi sürkilishler we eyibleshler pat - pat bolup turidighan boldi.
Ixtiyari muxbirimiz ömerjan
2012.11.23
Share on WhatsApp
Share on WhatsApp


Tehlilchilerge köre, iranning süriye mesilisidiki mewqesi iranni ereb we islam memliketliridin téximu yiraq qilip qoyghan. Iranning ereb birleshme xelipiliki bilen zémin talishish majirasi we behreyinde xelqni hökümetke qarshi küshkürtüshi qatarliqlarning hemmisi iranni ereb döletliridin yiraqlashturup qoyushqa yéterlik sewebler idi.

Londonda chiqidighan “Ottura sherq” gézitining 2012 - yili20 - noyabir künidiki sanida, yazghuchi tariq hemid teripidin “Iranning rakétaliri ikki xil” dégen témida mundaq bir maqale élan qilin'ghan:“Iranning rakétaliri ikki xil bolup, biri isra'iliyige qaritilghan bolsa, yene biri ereblerge qaritilghan. Emma ereblerge qaratqan rakétaliri küchlüktur. Süriyide namayish bashlan'ghan kündin bashlap iran hakimiyiti süriye re'isi beshshar el esedni qollash we uninggha ashkara hem yoshun qoral - yaraq, hem esker yardem qilishni bashliwetken bolup, esedning qanchilik zalimliqini körüp turup, uni qollash mewqesidin héch qaytmidi. Buning bilen iran köpchilik musulmanlarning neziridin chüshti. Iran iraqni köwrük qilghan halda süriyige yardem toshudi. Iraq hakimiyitimu buninggha köz yumdi. Hetta iraq bash ministiri nuri maliki bu ishni inkar qilip turdi. Emma xelqi alemning közi boluwatqanlardin gheplette qalmidi. Iran hazirghiche esedni qollap kéliwatidu we süriye xelqini birge öltürüwatidu. Bu waqitning özide iran pelestinning ghezze rayonidiki musulmanlarni isra'iliyige qarshi qorallanduruwatidu. Hamasning isra'iliyige atqan rakétaliri iranning rakétaliridur. Démek, iran erebni öltürüwatidu we erebni mudapi'e qiliwatidu. Bu qandaq siyaset?”

Iran abroyini qayta tikleshni meqset qilmaqta

Se'udi erebistanida chiqidighan“El weten” gézitining2012 - yili21 - noyabir künidiki sanida, “Iran abroyini qayta tiklimekchi boluwatidu” dégen témida mundaq bir maqale élan qilin'ghan:“Pelestinning ghezze rayonidiki weziyet heqiqeten éghir bir insaniy weziyet bolup, pütün dunya musulmanliri we insaniy xislitini yoqatmighan her qandaq adem bu weziyetke échinidu. Chünki bu insaniy krizistur. Meyli musulman, meyli bashqa dinda bolsun, héchkimning qéni tökülmesliki kérek. Mundaq krizisqa muptila bolghanlargha herkimning hésdashliq bildürgüsi kélidu we musibetlirige teselliy bergüsi, küchi yetse yardem qilghusi kélidu. Emma, mundaq weziyetni özi üchün xizmet qildurushni xam xiyal qilidighanlarmu bolidu. Mesilen: iran esed bilen birliship nechche yüzligen erebni öltürdi. Halbuki, beshshar el esedning süriyidiki ereblerge qiliwatqan zulumliri we qetli'ami isra'iliyining pelestinliklerge qilghanliridin éghir. Yéqinqi waqitlar ichide süriyide esed bilen iranliqlarning qolida öltürülgen ereblerning sani shu künlerde isra'iliyiliklerning qolida öltürülgen pelestinliklerningkidin köp. Démek, iranning süriyide ereblerni shundaq öltürüp turup, yene bir tereptin ghezzediki qérindashlargha yardem qilip qoyghini peqetla siyasettur. U kétip qalghan abroyini buning bilen qayta tiklimekchi bolidu.”

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.