Islam tinchliq saqlash armiyisi heqqide munazire

Islam konféransi teshkilati bash katipi proféssor doktor ekmelettin ihsan'oghluning 1 - ayning 28 - küni türkiyening eng chong gézitliridin biri bolghan hüriyet gézitige bergen bayanati türkiyide qattiq ghulghula peyda qildi.
Muxbirimiz erkin tarim
2010-01-29
Élxet
Pikir
Share
Print
Süret, islam konféransi teshkilati bash katipi proféssor doktor ekmelettin ihsanoghluning 1 - ayning 28 - küni türkiyening eng chong gézitliridin biri bolghan hüriyet gézitige bergen bayanatining gézittiki körünüshi.
Süret, islam konféransi teshkilati bash katipi proféssor doktor ekmelettin ihsanoghluning 1 - ayning 28 - küni türkiyening eng chong gézitliridin biri bolghan hüriyet gézitige bergen bayanatining gézittiki körünüshi.
RFA Photo / Erkin Tarim

Proféssor doktor ekmelettin ihsan'oghlu bayanatida, qalaymiqanchiliq chiqiwatqan islam döletlirige ewetish üchün islam tinchliq saqlash armiyisi qurush layihisini islam döletlirige sun'ghanliqini, emma bu pilanigha islam konféransi teshkilatigha eza bezi döletlerning qarshi chiqqanliqini éytqan. Ekmelettin ihsan'oghlu bayanatida islam tinchliq saqlash armiyisi qurushqa qarshi chiqqan döletlerning ismini ashkarilimighan. U bu mesilini türkiyening islam döletliri rehberlirige idiyiwiy xizmet ishlishi, islam konféransi teshkilatining bolsa islam döletliridiki ülimalarni yighip müzakire élip bérish arqiliq hel qilghili bolidighanliqini éytqan.

Afriqa tinchliq saqlash armiyisi qurulsa bolidiken, néme üchün islam tinchliq saqlash armiyisi qurulsa bolmaydu?  ekmelettin ihsanoghlu 1 - ayning 28 - küni hüriyet gézitige bergen bayanatida yene munularni dégen: "néme üchün islam döletlirining bir tinchliq saqlash armiyisi yoq dégen so'algha jawab tépish üchün ötken yili bir doklat teyyarlap islam döletliri tashqi ishlar ministirliri yighinida ulargha berduq. Doklatni mutexessislermu közdin köchürdi. Kéyin islam konféransi teshkilatigha eza islam döletlirige sunduq, bezi islam döletliri bundaq bir armiye qurushning baldur ikenlikini éytti. Bezi islam döletliri birleshken döletler teshkilati bar tursa, mesililirimizni ular arqiliq hel qilayli dep qarshi chiqiwatidu. Emma birleshken döletler teshkilati afriqa tinchliq saqlash armiyisini qurushqa ruxset qildi. Afriqa tinchliq saqlash armiyisi birleshken döletler teshkilatining armiyisi bilen birlikte hazir sudanning darfur shehiride wezipe ötewatidu. Démek bir'az waqitqa éhtiyajimiz bar. Biz islam tinchliq armiyisi qurush pilani üstide téximu ilgiriligen halda toxtalmaqchi."

Obzorchi ibrahim qaragül ependi, 1 - ayning 29 - küni yéngi shafaq gézitide bu heqte  yazghan "islam tinchliq saqlash armiyisini türkiye qurmaqchimu?" mawzuluq maqaliside, bügün dünyaning nurghun jaylirida bolupmu islam döletliride qalaymiqanchiliq barliqini, bu qalaymiqanchiliqlarni hel qilish üchün her xil tedbirlerni élish kéreklikini, buning eng muhim yolliridin birining birleshken döletler teshkilatining qollishi astida islam tinchliq saqlash armiyisi qurush kéreklikini ilgiri sürgen.

Ibrahim qaragül ependi maqaliside bundaq bir teshkilatning qurulushigha qaysi islam döletliri qarshi chiqidu dep sorap, buninggha mundaq jawab béridu: "elwette buninggha xeterlik dep qaraydighan döletler qarshi chiqidu. Islamgha xewp dep qaraydighan döletlerning tesiri astidiki, ulargha qoshna islam döletliri qarshi chiqidu." U maqaliside,  islam tinchliq armiyisining türkiye, malayshiya, hindonéziye we afriqidiki islam döletliri rehberlikide qurulushi kéreklikini ilgiri sürgen.

Biz bu heqte köz qarishini élish üchün tetqiqatchi zhurnalist azadjan bughra ependige mikrafonimizni uzattuq. U islam tinchliq armiyisi'ining qurulushigha qaysi islam döletlirining qarshi chiqidighanliqi, bundaq bir armiyining dünya tinchliqigha qoshidighan töhpiliri heqqide toxtaldi.

Yuqiridiki awaz ulinishidin, bu heqtiki melumatimizning tepsilatini anglaysiler.

Toluq bet