Хитай ишғалиниң 63-йили мунасивити билән истанбулда намайиш өткүзүлди

2012-Йили 9-айниң 30-күни хитай ишғалиниң 63-йили мунасивити билән истанбулда яшаватқан уйғурлар хитайниң истанбулдики консулханиси алдида намайиш өткүзди.
Ихтиярий мухбиримиз арслан
2012.10.01
Xitay-Bayriqi-koyduruldi-305.jpg Истанбулдики хитай консулханиси алдида өткүзүлгән намайишта хитай байриқи көйдүрүлди. 2012-Йили 30-сентәбир.
RFA/Arslan

Истанбулда паалийәт қиливатқан шәрқий түркистан аммиви тәшкилатлириниң бирликтә уюштуруши билән “һөр шәрқий түркистан мунбири” нам астида истанбулдики хитай консулханиси алдида намайиш өткүзүлди.

Истанбулдики хитай консулханиси алдида өткүзүлгән намайиштин көрүнүш. 2012-Йили 30-сентәбир.
Истанбулдики хитай консулханиси алдида өткүзүлгән намайиштин көрүнүш. 2012-Йили 30-сентәбир.
RFA/Arslan

Намайишқа истанбулда яшаватқан уйғурлар вә уйғурларниң түрк достлири болуп 200 дин артуқ киши қатнашти. Намайишчилар, “шәрқий түркистан 63 йилдин буян хитай ишғал астида”, “шәрқий түркистандики хитай ишғалийитиниң 63-йилиға ләнәт оқуймиз”, дегәнгә охшаш чоң һәҗимдә хәтләр йезилған пилакиларни көтүргән һалда хитай консулханиси алдиға йеқинлап кәлди. Намайишчилар консулхана алдида қоллирида ай юлтузлуқ көк байрақ вә пилакиларни көтүргән һалда, “ишғалчи қизил хитай шәрқий түркистандин йоқал!”, “яшисун мустәқил шәрқий түркистан”, “түркийә ухлима қериндашлириңға саһиб чиқ”, “шинҗаң әмәс шәрқий түркистан” дегәнгә охшаш шоарлар товлиди. Намайишчилар хитайниң 2 данә байриқиға от йеқип көйдүрүп ташлиди.

Истанбулдики хитай консулханиси алдида өткүзүлгән намайиштин көрүнүш. 2012-Йили 30-сентәбир.
Истанбулдики хитай консулханиси алдида өткүзүлгән намайиштин көрүнүш. 2012-Йили 30-сентәбир.
RFA/Arslan

Кейин шәрқий түркистан маарип вә һәмкарлиқ җәмийитиниң рәиси һидайәтуллаһ оғузхан “һөр шәрқий түркистан мунбири” гә вакалитән, хитайниң шәрқий түркистанни ишғал қиливалғанлиқиға қарши йезилған баянатни оқуп өтти.

Һидайәтуллаһ оғузхан сөзидә мундақ деди: өзиниң мәвҗутлуқини шан-шәрәп билән давам қилған шәрқий түркистан 1949-йили рус вә хитайниң һәмкарлиқи вә суйиқәстлири нәтиҗисидә қанунлуқ дөлитимиз хитай коммунистлири тәрипидин ишғал қилинди. Мәктәпләрни тақап хәлқимизни надан қалдуруш, ана тилимиздин узақлаштуруш, мәдәнийәт, өрп-адәтлиримизни бузуп йоқ қилиш үчүн һәр хил усулларни қолланди.

Һидайәтуллаһ оғузхан сөзидә йәнә әрәб баһариниң шәрқий түркистанғиму тәсир көрситидиғанлиқиға ишарәт берип мундақ деди: бүгүнки күндә дуняниң төт әтрапиға кәң тарқалған азадлиқ нидалири вә күчлүк бир шәкилдә оттуриға чиққан баһар шамили шәрқий түркистан асминиғиму тарқилишқа башлиди. Бу һәқиқәт хитайни чоңқур сарасимигә салмақта.

Намайиш җәрянида йәнә истанбулдики вәтәнпәрвәр пешқәдәм уйғурлардин абдуләзиз әпәнди сөз қилип хитайниң шәрқий түркистанни бесивалғанлиқини қаттиқ әйиблиди.

Ахирида намайишчилардин 5 киши намайишчиларға вакалитән хитай консулханисиниң дәрвазиси алдиға қара чәмбирәк қойди. Қара чәмбирәк үстигә шәрқий түркистанлиқлар дегән чоң һәҗимлик хәт қизил рәңдә йезилған болуп, қара чәмбирәк қоюш түркийидә инсанийәткә қарши җинайәт ишлигәнләрни әйибләйдиғанлиқниң ипадиси дәп қарилиду.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.