Истанбулда 1 - нөвәтлик дуня әдәбиятида истанбул намлиқ йиғин өткүзүлди
Мухбиримиз арислан
2010.05.07
2010.05.07
RFA Photo / Arslan
Йиғинға 27 дөләттин 120 дин артуқ чәтәллик язғучи, шаирлар тәклип билән қатнашти. Бу йиғинға уйғурларға вакалитән, австралийидә яшаватқан ахбаратчи сәлимә камал ханим, бәйкәнт университети әдәбият факултети түрк тил - әдәбият бөлүминиң оқутқучиси доктур мәғпирәт камал ханим қатарлиқ төт нәпәр уйғур аял тәклип билән қатнашти.
Йиғинда бәйкәнт университетиниң ректори профессор доктур әхмәт йүксәл әпәнди вә истанбул - фатих районлуқ шәһәр башлиқи мустафа дәмер әпәнди ечилиш нутиқи сөзлиди.
Икки күн давам қилған бу йиғин әли әмри күлтүр мәркизиниң фатих, буғаз ичи, султан әхмәт вә истанбул қатарлиқ төт йиғин залида бирла вақитта өткүзүлүп истанбул шәһириниң әдәбияттики орни, истанбулни зиярәт қилған чәтәллик язғучи, шаирларниң бу шәһәр һәққидә охшимиған тилларда язған 118 парчә шеир вә мақалилири оқуп өтүлди.
Йиғинда уйғурларға вакаләт йиғинға тәклип билән қатнашқан сәлимә камал ханим, 'уйғур шаирлири вә истанбул сөйгүси' дегән темида сөз қилип, уйғур шаирларниң истанбул һәққидә язған шеирлиридин арийә тәқдим қилиш билән биргә, истанбулда оқуп юртиға қайтқандин кейин, вәтән милләт үчүн алаһидә хизмәт көрсәткән мәрипәтпәрвәр шаир мәмәтели тәвпиқ әпәндигә охшаш уйғур зиялийлириниң иш - излирини тонуштурди вә истанбулни зиярәт қилғандин кейинки тәсиратлирини ипадиләп шеир язған уйғур шаирлар һәққидә тохталди.
Йиғинда сәлимә камал ханим уйғур тилида сөз қилған болуп, сөзини ахирлаштурғандин кейин йиғин иштиракчилириниң уйғурлар һәққидә сориған соаллириға җаваб бәрди.
Биз бу йиғин һәққидә техиму көп мәлуматқа еришиш үчүн йиғинда сөз қилған сәлимә камал вә доктур мәғпирәт ханимлар билән сөһбәт елип бардуқ.
Юқиридики аваз улинишидин, бу һәқтики мәлуматимизниң тәпсилатини аңлайсиләр.