Istanbulda 'asiyaning merkizide dostluq we hemkarliq aliy derijilikler yighini' ötküzüldi

2010 ‏- Yili ‏- ayning 25 ‏- küni istanbulda, türkiye-afghanistan-pakistan üch tereplik aliy derijilikler yighini ötküzülgendin kéyin bügün yeni 1 ‏- ayning 26 ‏- küni türkiye jumhuriyiti re'isi abdullah gülning sahibxaniliq qilishi bilen, istanbuldiki chiraghan sariyida "asiyaning merkizide dostluq we hemkarliq aliy derijilikler yighini" namliq xelq'araliq yighin ötküzüldi.
Muxbirimiz arislan
2010.01.26
Share on WhatsApp
Share on WhatsApp
Abdulla-Gul-Karzay-Zardari-ottura-asiya-yighini-305.jpg Süret, 2010 ‏- yili 1 ‏- ayning 25 ‏- künidiki, türkiye-afghanistan-pakistan üch tereplik aliy derijilikler yighini we 1 ‏- ayning 26 ‏- künidiki, "asiyaning merkizide dostluq we hemkarliq aliy derijilikler yighini"gha qatnipshiwatqan afghanistan dölet reisi hamid karzay we pakistan dölet reisi asif eli zerdari, türkiye jumhuriyiti reisi abdullah gül bilen birge.
AFP Photo

Yighin'gha afghanistan dölet re'isi hamid karzay we pakistan dölet re'isi asif eli zerdari, hemde afghanistan'gha qoshna döletlerning yuqiri derijilik wekilliri bilen közetküchi döletler we xelq'ara teshkilatlarning wekilliri qatnashti. Yighin bashlinishtin ilgiri axbaratchilarning süret tartishqa ruxset qilindi, yighinning kéynki qismigha axbaratchilarning qatnishishigha ruxset qilinmidi.

Yighin'gha türkiye tashqi ishlar ministiri exmet dawut oghlu, iran jumhuriyitining mu'awin dölet re'isi muhemmed riza réhimi, xitay tashqi ishlar ministiri, yang jéchi, en'gliye tashqi ishlar ministiri dawid miliband, afghanistan tashqi ishlar ministiri zalmay resul, pakistan tashqi ishlar ministiri nawazade malikxan, tajikistan tashqi ishlar ministiri hamruxan zarifi, qirghizistan tashqi ishlar ministiri qadirbek sarbaw, ereb birleshme xelipilikning tashqi ishlar ministirlikining wekili dölet ministiri enwer gargash, rusiye tashqi ishlar mu'awin ministiri aléksiy borodawkin qatarliq rehberler qatnashti.

Yighin'gha yene islam qurultiyi teshkilatining bash katipi ekmeleddin éhsan'oghlu, iqtisad hemkarliq teshkilatining bash katipi muhemmed yehya maruf, amérika dölet re'isining afghanistan, pakistan ishliri boyiche alahide wekili pa'ul jonés, birleshken döletler teshkilatining bash katipning afghanistan boyiche alahide wekilining yardemchisi wolfgang wésbord wébér, shimali atlantik okyan ehdi teshkilati sékritarining yardemchisi lariy rossin, yawropa ittipaqining asiya ishliri dériktori xim moran we yaponiye wekili qatnashti.

Yéngi dewirde afghanistan bilen hemkarlishishni meqset qilghan bu yighinda, afghanistan düch kéliwatqan mesililerni hel qilishta xoshna döletler hemkarlishalaydighan xizmetler heqqide muzakire élip bérildi. Yighinda yene afghanistan heqqide her türlük saheler boyiche körünerlik bir hemkarliq ornitish üchün meydan hazirlash kérekliki otturigha qoyuldi.

Yighinda yene, 2009 ‏- yili, 4 ‏- ayning 1 ‏- küni échilghan rayonluq uchrishish, yeni, türkiye, afghanistan we pakistandin ibaret üch terepning ali derijilikler yighinda élin'ghan qararlarning netijisi oqup ötüldi.

Türkiye jumhuriyiti re'isi abdullah gül, "asiyaning merkizide dostluq we hemkarliq aliy derijilikler yighinining" yépilish murasimida ötküzülgen muxbirlarni kütüwélish yighinida söz qilip mundaq dédi: "afghanistanda saqliniwatqan mesililer qoral ishlitish yoli bilen hel qilinmaydu, rayon döletlirining bu mesililerni öz mesilisige oxshash hel qilishqa tirishchanliq körsitishliri kérek."

Abdullah gül sözide yene, "shimaliy atlantik ehdi teshkilati da'iriside afghanistan'gha herbiy jehette yardem bériwatqan türkiye, nöwette afghanistanning tereqqiy qilishi üchün eng chong yardem qiliwatidu" dédi.

Xitay tashqi ishlar ministiri yang jéchi, türkiye tashqi ishlar ministiri exmet dawut'oghluning teklipige bina'en bu qétimqi yighin'gha qatnishish üchün istanbulgha kelgen idi. Türkiye tashqi ishlar ministirliki élan qilghan bayanatta bildürülüshiche, xitay tashqi ishlar ministiri yang jéchining ziyariti jeryanida, u istanbulda ötküzülgen yighin'gha xitay dölet re'isi xu jintawning alahide wekili bolup qatnashqan.

Yang jéchini, türkiye jumhuriyiti prézidénti abdullah gül chiraghin sariyida qobul qildi. Ikki terep türkiye ‏- xitay ikki dölet munasiwetliridin bashqa yene ikki döletke alaqidar rayonluq we xelq'araliq mesililer heqqide muzakiriler élip barghan bolsimu, biraq bu heqte axbaratchilargha tepsili uchur bérilmidi.

Yuqiridiki awaz ulinishidin, bu heqtiki melumatimizning tepsilatini anglaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.