Хитайниң 1‏ - өктәбир дөләт байримида истанбулдики уйғурлар намайиш қилди

2010 ‏- Йили 10 ‏- айниң 1 ‏- күни, хитай дөлити қурулғанлиқиниң 61 ‏- йили мунасивити билән шәрқий түркистан маарип вә һәмкарлиқ җәмийити вә шәрқий түркистан яшлар җәмийити бирликтә хитайниң истанбулдики консулханиси алдида намайиш елип барди.
Мухбиримиз арислан
2010.10.01
Istanbulda-namayish-1001-2010-305 Сүрәт, 2010 ‏- йили 10 ‏- айниң 1 ‏- күни, хитай дөлити қурулғанлиқиниң 61 ‏- йили мунасивити билән шәрқий түркистан маарип вә һәмкарлиқ җәмийити вә шәрқий түркистан йашлар җәмийити бирликтә хитайниң истанбулдики консулханиси алдида елип барған намайиштин көрүнүш.
RFA Photo / Arslan

Намайишқа, шәрқий түркистан давасиға көңүл бөлидиған түркләр вә истанбулда яшаватқан уйғурлар қатнашти. Намайиш түркийә вақти саәт 12 дә башланди. Намайишчилар қоллирида "5 ‏- июл үрүмчи вәқәси" әкс әттүрүлгән рәсимләр һәм ай юлтузлуқ көк байрақни көтүрүшкән һалда, истанбулдики хитай консулханиси алдиға йетип келип шоарлар товлашти.

Намайишчилар хитай консулханиси алдида бирдәк "шинҗаң әмәс шәрқий түркистан!", "һәқ - һоқуқ, адаләт, түркистанға һөрийәт!", "қизил хитай шәрқий түркистандин чиқип кәт!" дегәнгә охшаш шоарлар товлиди.
 
Намайиш җәрянида шәрқий түркистан маарип вә һәмкарлиқ җәмийитиниң башлиқи һидайәтулла оғузхан вә шәрқий түркистан яшлар җәмийитиниң башлиқи тибәт йүҗәтүрк әпәндиләр айрим ‏- айрим һалда баянат елан қилди. Намайишқа көплигән телевизийә вә гезит мухбирлириму кәлди.
Istanbulda-namayish-qara-gul-chembirek-1001-2010-305
Сүрәт, 2010 ‏- йили 10 ‏- айниң 1 ‏- күнидики намайишта хитайниң истанбулдики консулханиси ишикигә қара гүлчәмбирәк қойулған көрүнүш.
RFA Photo / Arslan

Тибәт йүҗәтүрк әпәнди сөзидә мундақ деди: "61 йил илгири мустәқил түрк юрти болған, әмма хитайниң ишғал астида қалған, бүгүнки күндә дуняда әң еғир паҗиәләрниң мәркизи болған шәрқий түркистан: 61 йилдин бири хитай зулумиға қарши күрәш қилған, ассимилятсийә қилиш сиясәтләргә қараш көкрәк кирип тик турушни билгән, һөр дуняға 'бизму бар ' дәп нида қилған бир шәрқий түркистан. Бүгүн биз шәрқий түркистанлиқлар үчүн матәм күни. Дуня яритилғандин башлап бизгә тәвә болған түркләрниң ана вәтинидә, шәрқий түркистан җумһурийити әң ахирида 1949 ‏- йили хитай коммунист һакимийити тәрипидин ишғал қилинди вә бу ишғалийәт күни йәни '1 ‏- өктәбир байрам күни ' дәп елан қилинди. 61 Йилдин бири мустәқиллиқ күришимиз тохтимай давам қилмақта."

Тибәт йүҗәтүрк сөзидә йәнә, уйғур дияриниң һазирқи вәзийити һәққидә тохтилип мундақ деди: "мушу вақитта үрүмчи, ақсу, ғулҗа, қәшқәр вә хотән қатарлиқ шәһәрлиримиздә, пүткүл дуканлар етилгән, йоллар бош, уйғур яшлириниң көпинчиси түрмиләрдә қамалғанлиқи үчүн, кочиларда болса яшанған чоң анилар, тул қалған аяллар. Кочиларда йәнә нөвәт билән чарлаш елип бериватқан хитай әскәр вә сақчилири қорқунч ичидә айланмақта. Һәммә йәр әскәрләр билән толған. Танкилар, мәргәнләр буйруқ күтүп диққәттә турмақта. Шәрқий түркистан асманлирида болса хитай тикучарлири учуп йүрмәктә. яшисун әркин яшаш ирадимиз! шәрқий түркистан һәргизму тәслим болмиди вә болмайду. я һөр яшаймиз; яки бу йолда өлимиз!"

Юқиридики аваз улинишидин, бу һәқтики мәлуматимизниң тәпсилатини аңлайсиләр.

 
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.