Xitayning 1‏ - öktebir dölet bayrimida istanbuldiki Uyghurlar namayish qildi

Süret, 2010 ‏- yili 10 ‏- ayning 1 ‏- küni, xitay döliti qurulghanliqining 61 ‏- yili munasiwiti bilen sherqiy türkistan maarip we hemkarliq jemiyiti we sherqiy türkistan yashlar jemiyiti birlikte xitayning istanbuldiki konsulxanisi aldida élip barghan namayishtin körünüsh.

Namayishqa, sherqiy türkistan dawasigha köngül bölidighan türkler we istanbulda yashawatqan Uyghurlar qatnashti. Namayish türkiye waqti sa'et 12 de bashlandi. Namayishchilar qollirida "5 ‏- iyul ürümchi weqesi" eks ettürülgen resimler hem ay yultuzluq kök bayraqni kötürüshken halda, istanbuldiki xitay konsulxanisi aldigha yétip kélip sho'arlar towlashti.

Namayishchilar xitay konsulxanisi aldida birdek "shinjang emes sherqiy türkistan!", "heq - hoquq, adalet, türkistan'gha höriyet!", "qizil xitay sherqiy türkistandin chiqip ket!" dégen'ge oxshash sho'arlar towlidi.
 
Namayish jeryanida sherqiy türkistan ma'arip we hemkarliq jem'iyitining bashliqi hidayetulla oghuzxan we sherqiy türkistan yashlar jem'iyitining bashliqi tibet yüjetürk ependiler ayrim ‏- ayrim halda bayanat élan qildi. Namayishqa köpligen téléwiziye we gézit muxbirlirimu keldi.

RFA Photo / Arslan

Tibet yüjetürk ependi sözide mundaq dédi: "61 yil ilgiri musteqil türk yurti bolghan, emma xitayning ishghal astida qalghan, bügünki künde dunyada eng éghir paji'elerning merkizi bolghan sherqiy türkistan: 61 yildin biri xitay zulumigha qarshi küresh qilghan, assimilyatsiye qilish siyasetlerge qarash kökrek kirip tik turushni bilgen, hör dunyagha 'bizmu bar ' dep nida qilghan bir sherqiy türkistan. Bügün biz sherqiy türkistanliqlar üchün matem küni. Dunya yaritilghandin bashlap bizge tewe bolghan türklerning ana wetinide, sherqiy türkistan jumhuriyiti eng axirida 1949 ‏- yili xitay kommunist hakimiyiti teripidin ishghal qilindi we bu ishghaliyet küni yeni '1 ‏- öktebir bayram küni ' dep élan qilindi. 61 Yildin biri musteqilliq kürishimiz toxtimay dawam qilmaqta."

Tibet yüjetürk sözide yene, Uyghur diyarining hazirqi weziyiti heqqide toxtilip mundaq dédi: "mushu waqitta ürümchi, aqsu, ghulja, qeshqer we xoten qatarliq sheherlirimizde, pütkül dukanlar étilgen, yollar bosh, Uyghur yashlirining köpinchisi türmilerde qamalghanliqi üchün, kochilarda bolsa yashan'ghan chong anilar, tul qalghan ayallar. Kochilarda yene nöwet bilen charlash élip bériwatqan xitay esker we saqchiliri qorqunch ichide aylanmaqta. Hemme yer eskerler bilen tolghan. Tankilar, mergenler buyruq kütüp diqqette turmaqta. Sherqiy türkistan asmanlirida bolsa xitay tik'ucharliri uchup yürmekte. Yashisun erkin yashash iradimiz! sherqiy türkistan hergizmu teslim bolmidi we bolmaydu. Ya hör yashaymiz؛ yaki bu yolda ölimiz!"

Yuqiridiki awaz ulinishidin, bu heqtiki melumatimizning tepsilatini anglaysiler.