Istanbuldiki Uyghurlar roza héytni birlikte ötküzdi

Süret, sherqiy türkistan wexpi we sherqiy türkistan maarip we hemkarliq jemiyitining birlikte uyushturushi bilen 2009 ‏- yili 9 ‏‏- ayning 21 ‏- küni sherqiy türkistan wexpide ötküzülgen roza héytni tebriklesh murasimidin bir körünüsh.

Murasimgha sherqiy türkistan wexpi we sherqiy türkistan ma'arip we hemkarliq jem'iyitining ezaliri hem istanbulda yashawatqan Uyghurlardin er ‏- ayal bolup 500 din artuq kishi qatnashti.

Murasimgha sherqiy türkistan wexpining bash katipi hamut köktürk we sherqiy türkistan ma'arip jem'iyitining bash katipi doktor alimjan riyasetchilik qildi. Murasim qur'an kerim tilawet qilish bilen bashlandi.

Murasimda sherqiy türkistan ma'arip we hemkarliq jem'iyitining bash naziri ablikimxan mexsum échilish nutqi sözlep, murasim ishtirakchilirining roza héytni tebriklesh bilen birge yene roza héytning ehmiyiti heqqide söz qildi.

Murasimda yene istanbul sheherning mu'awin waliysi murat kojabash, sherqiy türkistan wexpining re'is wekili proféssor doktor sultan mehmut qeshqerli, sherqiy türkistan ma'arip jem'iyitining re'isi hidayetulla oghuzxan, türk dunyasi tetqiqat fondining re'isi proféssor doktor turan yazghan, péshqedem wetenperwer zat seley hajim artushi, awstraliyidin istanbulgha ziyaretke kelgen péshqedem wetenperwer zat exmet igemberdi qatarliq rehberler söz qilip Uyghurlarning roza héytni tebriklidi.

Istanbul sheherning mu'awin waliysi murat kojabash ependi söz qilip mundaq dédi: "hörmetlik qérindashlirim, hemminglarning mubarek ramizan bayriminglarni tebrikleymen, shuning bilen birge sherqiy türkistanda shehid bolghan qérindashlirimgha allahtin rehmet tileymen, tupraqliri mol bolsun, rohliri shat bolsun, erkinlik yoli her waqit ochuq bolsun, xudayim buyrisa bir küni sherqiy türkistan zéminida, kök bayraqning lepildishi astida héyt bayrimini tebrikleymiz."

Murasimda yene sherqiy türkistan ma'arip we hemkarliq jem'iyitining bash katipi doktor alimjan söz qilip, bu yerde nechche yüzligen Uyghurlar roza héytni bir yerge jem bolup tebriklesh murasimi ötküzüwatqanliqini tekitlidi.
 
Murasimda yene istanbul oqughuchilirining shé'ir oqush musabiqiside birinchi derijilik mukapatqa érishken Uyghur qizi injinir kuchar shé'ir déklamatsiye qilip murasim ishtirakchilirining qizghin alqishigha érishti. Kéyin Uyghur ösmürliri, 'wetinimidin chiqip ket' qatarliq shé'irni déklamatsiye qildi.

Kéyin qaghiliqta alemdin ötken meshhur dini merhum alim ablikimxan mexsum hajimning hayat ‏- kechürmishliri heqqide ishlen'gen höjjetlik filim qoyuldi. Axirida ziyapet bérildi.

Yuqiridiki awaz ulinishidin, bu heqtiki melumatimizning tepsilatini anglaysiler.