Истанбулда ' түркистан мәдәнийәт кечилики' өткүзүлди

Охшаш болмиған милләт вә охшаш болмиған өрүп ‏- адәтләрни бир йәргә җәм қилип өз ара чүшәнчә һасил қилиш мәқситидә бир қанчә күндин бери истанбул - зәйтунбурну районлуқ һөкүмити тәрипидин " нөвәттики вәзийәттә бүгүн" намлиқ программа уюштурулған болуп, бу программиға һәр күни истанбулниң зәйтунбурну районида яшайдиған хәлқтин һәр қайси милләт вә җәмийәтләрни қатнаштурулуп уларниң милли өрүп - адәтлирини тонуштуруп кәлмәктә.
Мухбиримиз арслан
2008-10-24
Share
Istnblda-Trkstn-kechis-305.jpg Сүрәт, 2008 ‏- йили 22‏ - өктәбир күни түркийә вақти кәч саәт 20:00 дин 22: 00 гичә зәйтунбурну хизмәт бинасиниң йиғин залида "түркистан мәдәнийәт кечиси" программиси өткүзүлгән көрүнүшләрдин бири.
RFA Photo / Arslan

Бу программа зәйтунбурну районлуқ хизмәт бинасиниң йиғин залида өткүзүлгән болуп, программини мави қарадеңиз телевизийәсидә сүни һәмра арқилиқ нәқ мәйдандин тарқитип кәлмәктә.

Бу программа мунасивити билән 2008 ‏- йили 22 ‏- өктәбир чаршәнбә күни түркийә вақти кәч саәт 20:00 дин 22: 00 гичә зәйтунбурну хизмәт бинасиниң йиғин залида "түркистан мәдәнийәт кечиси" программиси өткүзүлди.

Программини зәйтунбурну районлуқ һөкүмәтниң қоллиши билән қазақ түрклири вәхпи уюштурди. Программиға истанбул муавин валиси мустафа алтунташ, зәйтунбурну районлуқ шәһәр башлиқи мурад айдин әпәнди, муавин башлиқи айдин чиғриқчи, баш мәслиһәтчиси иляс сака, зәйтунбурну районлуқ маарип назарити башлиқи мәһмәт қараҗи әпәнди , шәрқий түркистан маарип вә һәмкарлиқ җәмийити муавин башлиқи һидаютуллаһ оғузхан, шәрқий түркистан көчмәнләр җәмийити башлиқи әхмәт түркоз әпәнди, хоҗа әһмәт йәсәви илим вә ирфан вәхпи рәиси абдураһман җәвһәр, қазақ - түрклири иҗтимаий һәмкарлиқ җәмийити рәиси сулайман өзтупрақ, афғанистан түркмәнләр иҗтимаий һәмкарлиқ җәмийитиниң баш катипи һаҗи рәҗәп түрк оғли, инсан һәқлирини қоғдаш вә инсаний ярдәмлишиш вәхпиниң вәкили абдуллаһ чай, зәйтунбурну районлуқ һәр қайси сиясий партийә вәкиллири һөкүмәт кадирлири вә истанбулда яшаватқан қазақ - уйғур болуп җәмий 700 дин артуқ киши иштирак қилди.

Программиға истанбулда яшаватқан көп санда уйғурларму қатнашқан болуп, программида истанбул муавин валийси мустафа алтунташ әпәнди, зәйтинбурну районлуқ шәһәр башлиқи мурад айдин әпәнди баш мәслиһәтчиси иляс сака әпәнди қатарлиқ шәхсләр сөз қилип түркистан азрақ вә уйғурлири һәққидә тохталди. Программини мави қара деңиз телевизийиси сүни һәмра арқилиқ нәқ мәйдандин тарқатти. Униңдин башқа йәнә истанбул таймиз, зәйтунбурну хәбәр қатарлиқ ахбарат органлириниң мухбирлириму иштирак қилди.

Программида истанбул районлуқ шәһәр башлиқи мурад айдин әпәнди сәһнигә чиқип истанбулдики шәрқий түркистан аммиви тәшкилатлириниң иш ‏- паалийәтлири һәққидә тохталди һәмдә , шәрқий түркистан көчмәнләр җәмийитиниң башлиқи әхмәт түркоз, шәрқий түркистан маарип вә һәмкарлиқ җәмийитиниң муавин башлиқи һидайәтуллаһ оғузхан, қазақ түрклири вәхпи башлиқи, әхмәт йәсәви илим вә ирпан вәхпи башлиқи абдурахман җәвһәр, қазақ - түрклири иҗтимаий һәмкарлиқ җәмийити рәиси сулайман өзтупрақ, қатарлиқ шәхсләрни сәһнигә тәклип қилди. Һәмдә шәрқий түркистан һәққидә елип барған иш - паалийәтлирини тәбрикләш билән биргә тәшәккүр ейтидиғанлиқини билдүрди. Уларниң һәр бири билән айрим ‏- айрим қол елишип көрүшүп әһвал сориди.

Программида уйғур, қазақ, қирғиз, өзбәк , азәр қатарлиқ милләтләрдин тәркип тапқан бир сәнәт өмики нахша ‏- музика орунлиди. Сәнәтчиләр уйғур, қазақ, қирғиз, вә түрк тиллирида манас дастанидин парчә қатарлиқ бир қанчә парчә нахша ‏- музика орунлиди. Уйғурчә орунланған "қәмбәрханим" қатарлиқ бир қанчә парчә нахша - музика программа иштиракчилириниң қизғин алқишиға еришти, уйғур сәнәтчи пәрһат тәңритағниң орунлишида аман болсун дегән нахша тәқдим қилинди.

Униңдин башқа йәнә , "алтун тартайму көмүшму" қатарлиқ чатма усуллуқ уйғурчә нахша тәқдим қилинди. Кейин нахша музикиға тәңкәш қилип уйғурчә усул ойналди. Ахирида "өзбек, уйғур, азәр бир бойдур, қарақалпақ, қирғиз, қазақ улар бир сойдур" дегән нахша орунланған болуп, уйғур қазақ, қирғиз , түрк қатарлиқ пүткүл түркий сестимисидики милләтләр нахша ‏- музикиға тәңкәш қилип бирла вақитта өзлириниң милли усуллирини ойниди.

Ахирида, истанбул шәһриниң муавин валиси мустафа алтунташ әпәнди сөз қилип мундақ деди: " әслимиз вә нәслимиз болған түркистандин, ана вәтинимиз болған анадолу түркийигичә һәр хил мәдәнийәтләр ичидә биргә яшаватимиз, бу йәрдики әслимиләр бизниң мәдәнийитимизниң йүксәклики көрситиду, бу көрүнүшләр бирлик вә баравәрлик вә һәмкарлишиш ичидә түркистандин роминийигичә болған арилиқта нурғун мәдәнийәт вә тупраққа саһип болғанлиқимизниң испатидур. Бу тупрақларда өз мәдәнийитимизни сақлап кәлдуқ һәмдә гүлләндүрдуқ. Бу мәдәнийәтләрни әҗдатлиримиз бирлик вә баравәрлик ичидә бәрпа қилған икән. Охшашла бизму бирлик вә баравәрликимизни сақлап кәлсәк әң яхши ишларни қилимиз. Бүгүн бу йәрдә бу программини орунлаштурған қериндашлиримизниң хизмәт - паалийәтлири вә бу программида сәнәтчилимизниң көрсәткән номурлири әң яхши ишлардур улар әсли мәдәнийитимизни әсләтти, бу мунасивәт билән бу программини уюштурған қериндашлиримизға, сәнәтчилиримизгә шундақла аммиви тәшкилат рәһбәрлиригә алаһидә рәһмәт ейтимән."

 

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт