Istanbulda ' türkistan medeniyet kéchiliki' ötküzüldi

Oxshash bolmighan millet we oxshash bolmighan örüp ‏- adetlerni bir yerge jem qilip öz ara chüshenche hasil qilish meqsitide bir qanche kündin béri istanbul - zeytunburnu rayonluq hökümiti teripidin " nöwettiki weziyette bügün" namliq programma uyushturulghan bolup, bu programmigha her küni istanbulning zeytunburnu rayonida yashaydighan xelqtin her qaysi millet we jem'iyetlerni qatnashturulup ularning milli örüp - adetlirini tonushturup kelmekte.
Muxbirimiz arslan
2008.10.24
Istnblda-Trkstn-kechis-305.jpg Süret, 2008 ‏- yili 22‏ - öktebir küni türkiye waqti kech saet 20:00 din 22: 00 giche zeytunburnu xizmet binasining yighin zalida "türkistan medeniyet kéchisi" programmisi ötküzülgen körünüshlerdin biri.
RFA Photo / Arslan

Bu programma zeytunburnu rayonluq xizmet binasining yighin zalida ötküzülgen bolup, programmini mawi qaradéngiz téléwiziyeside sün'i hemra arqiliq neq meydandin tarqitip kelmekte.

Bu programma munasiwiti bilen 2008 ‏- yili 22 ‏- öktebir charshenbe küni türkiye waqti kech sa'et 20:00 din 22: 00 giche zeytunburnu xizmet binasining yighin zalida "türkistan medeniyet kéchisi" programmisi ötküzüldi.

Programmini zeytunburnu rayonluq hökümetning qollishi bilen qazaq türkliri wexpi uyushturdi. Programmigha istanbul mu'awin walisi mustafa altuntash, zeytunburnu rayonluq sheher bashliqi murad aydin ependi, mu'awin bashliqi aydin chighriqchi, bash meslihetchisi ilyas saka, zeytunburnu rayonluq ma'arip nazariti bashliqi mehmet qaraji ependi , sherqiy türkistan ma'arip we hemkarliq jem'iyiti mu'awin bashliqi hidayutullah oghuzxan, sherqiy türkistan köchmenler jem'iyiti bashliqi exmet türkoz ependi, xoja ehmet yesewi ilim we irfan wexpi re'isi abdurahman jewher, qazaq - türkliri ijtima'iy hemkarliq jem'iyiti re'isi sulayman öztupraq, afghanistan türkmenler ijtima'iy hemkarliq jem'iyitining bash katipi haji rejep türk oghli, insan heqlirini qoghdash we insaniy yardemlishish wexpining wekili abdullah chay, zeytunburnu rayonluq her qaysi siyasiy partiye wekilliri hökümet kadirliri we istanbulda yashawatqan qazaq - Uyghur bolup jem'iy 700 din artuq kishi ishtirak qildi.

Programmigha istanbulda yashawatqan köp sanda Uyghurlarmu qatnashqan bolup, programmida istanbul mu'awin waliysi mustafa altuntash ependi, zeytinburnu rayonluq sheher bashliqi murad aydin ependi bash meslihetchisi ilyas saka ependi qatarliq shexsler söz qilip türkistan azraq we Uyghurliri heqqide toxtaldi. Programmini mawi qara déngiz téléwiziyisi sün'i hemra arqiliq neq meydandin tarqatti. Uningdin bashqa yene istanbul taymiz, zeytunburnu xeber qatarliq axbarat organlirining muxbirlirimu ishtirak qildi.

Programmida istanbul rayonluq sheher bashliqi murad aydin ependi sehnige chiqip istanbuldiki sherqiy türkistan ammiwi teshkilatlirining ish ‏- pa'aliyetliri heqqide toxtaldi hemde , sherqiy türkistan köchmenler jem'iyitining bashliqi exmet türkoz, sherqiy türkistan ma'arip we hemkarliq jem'iyitining mu'awin bashliqi hidayetullah oghuzxan, qazaq türkliri wexpi bashliqi, exmet yesewi ilim we irpan wexpi bashliqi abduraxman jewher, qazaq - türkliri ijtima'iy hemkarliq jem'iyiti re'isi sulayman öztupraq, qatarliq shexslerni sehnige teklip qildi. Hemde sherqiy türkistan heqqide élip barghan ish - pa'aliyetlirini tebriklesh bilen birge teshekkür éytidighanliqini bildürdi. Ularning her biri bilen ayrim ‏- ayrim qol éliship körüshüp ehwal soridi.

Programmida Uyghur, qazaq, qirghiz, özbek , azer qatarliq milletlerdin terkip tapqan bir sen'et ömiki naxsha ‏- muzika orunlidi. Sen'etchiler Uyghur, qazaq, qirghiz, we türk tillirida manas dastanidin parche qatarliq bir qanche parche naxsha ‏- muzika orunlidi. Uyghurche orunlan'ghan "qemberxanim" qatarliq bir qanche parche naxsha - muzika programma ishtirakchilirining qizghin alqishigha érishti, Uyghur sen'etchi perhat tengritaghning orunlishida aman bolsun dégen naxsha teqdim qilindi.

Uningdin bashqa yene , "altun tartaymu kömüshmu" qatarliq chatma usulluq Uyghurche naxsha teqdim qilindi. Kéyin naxsha muzikigha tengkesh qilip Uyghurche usul oynaldi. Axirida "özbék, Uyghur, azer bir boydur, qaraqalpaq, qirghiz, qazaq ular bir soydur" dégen naxsha orunlan'ghan bolup, Uyghur qazaq, qirghiz , türk qatarliq pütkül türkiy séstimisidiki milletler naxsha ‏- muzikigha tengkesh qilip birla waqitta özlirining milli usullirini oynidi.

Axirida, istanbul shehrining mu'awin walisi mustafa altuntash ependi söz qilip mundaq dédi: " eslimiz we neslimiz bolghan türkistandin, ana wetinimiz bolghan anadolu türkiyigiche her xil medeniyetler ichide birge yashawatimiz, bu yerdiki eslimiler bizning medeniyitimizning yüksekliki körsitidu, bu körünüshler birlik we barawerlik we hemkarlishish ichide türkistandin rominiyigiche bolghan ariliqta nurghun medeniyet we tupraqqa sahip bolghanliqimizning ispatidur. Bu tupraqlarda öz medeniyitimizni saqlap kelduq hemde güllendürduq. Bu medeniyetlerni ejdatlirimiz birlik we barawerlik ichide berpa qilghan iken. Oxshashla bizmu birlik we barawerlikimizni saqlap kelsek eng yaxshi ishlarni qilimiz. Bügün bu yerde bu programmini orunlashturghan qérindashlirimizning xizmet - pa'aliyetliri we bu programmida sen'etchilimizning körsetken nomurliri eng yaxshi ishlardur ular esli medeniyitimizni esletti, bu munasiwet bilen bu programmini uyushturghan qérindashlirimizgha, sen'etchilirimizge shundaqla ammiwi teshkilat rehberlirige alahide rehmet éytimen."

 

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.