Истанбулда уйғур оқуғучиларни мукапатлаш мурасими өткүзүлди

Һәр йилдикигә охшаш бу йилму, уйғур оқуғучиларниң язлиқ тәтилдин пайдилинип, 6‏ - айниң 20 ‏‏ - күни истанбул шәһриниң уйғурлар көп олтурақлашқан зәйтунбурну вә сәфакөй районлирида мәхсус уйғур синипи ечилип дәрс өтүлгән иди.
Мухбиримиз арислан
2009.08.19
Share on WhatsApp
Share on WhatsApp
Istanbulda-Uyghur-oqughuchilarni-mukapatlash150809-305.jpg Сүрәт, 8 - айниң 16 - күни истанбул шәһриниң зәйтинбурну районлуқ һөкүмәтниң ақдеңиз йиғин залида еечилған, 400 дин артуқ киши қатнашқан, уйғур оқуғучиларниң уйғур синипи паалийити қатнашчилирини мукапатлаш мурасимидин бир көрүнүш.
RFA Photo / Arslan

Бу уйғур синиплирида асаслиқи уйғур тили, миллий өрп адәт, мәдәнийәт, ислам динидин мәлумат вә қуран кәрим оқуш дәрси өтүлгән болуп, икки ай давам қилғандин кейин оқушни тамамлиған оқуғучилардин имтиһан елинған һәмдә әлачи болғанларни 3 дәриҗигә айрип мукапатлаш орунлаштурулди. Бу курсқа башланғуч мәктәп сәвийисидә оқуватқан 7 яштин 15 яш арисидики уйғур оқуғучилар қатнашқан болуп, 8 ‏ - айниң 16 ‏ - күни истанбул шәһриниң зәйтинбурну районлуқ һөкүмәтниң ақдеңиз йиғин залида уйғур оқуғучиларни мукапатлаш мурасими өткүзүлди. Мурасимға оқуғучиларниң ата ‏ - анилири вә истанбулда яшаватқан уйғурлардин болуп 400 дин артуқ киши қатнашти.

Мурасим, уйғур синипида оқуп қуран савади чиққан әсәдулла исимлик оқуғучиниң қуран тилавәт қилиши билән башланди. Мурасимға шәрқий түркистан маарип вә һәмкарлиқ җәмийитиниң баш катипи доктур алимҗан атавулла риясәтчилик қилди. Мурасимда шәрқий түркистан маарип вә һәмкарлиқ җәмийитиниң башлиқи һидайәтулла оғузхан ечилиш нутиқи сөзләп, милләтниң кәлгүси из басарлири болған әвладлар үчүн маарип вә тәлим тәрбийә елишниң наһайити муһим икәнлики шундақла билимлик инсанлар билән билимсиз инсанларниң охшаш әмәслики һәққидә тохталди.

 Мурасимда йәнә шәрқий түркистан маарип вә һәмкарлиқ җәмийитиниң башлиқи абликимхан мәхсум сөз қилип, илим тәһсил қилишниң әһмийити вә илим тәһсил қилишқа мадди вә мәнивий җәһәттин қоллап қуввәтлигән мәрипәтпәрвәр, төһпикар шәхсләр һәққидә тохталди шундақла бу қетимқи курста оқуған оқуғучилар вә дәрс өгәткән оқутқучиларға тәшәккүр ейтти һәм уларни тәбриклиди.
 
Абликимхан мәхсум сөзидә йәнә, өсмүр балиларниң ата ‏ - анилириға пәрзәнтлирини яхши оқутушини тәвсийә қилди, шундақла, яхши оқуған пәрзәнтләрниң арисидин милләтни йетәкләйдиған даһийларниң чиқишини үмид қилидиғанлиқини билдүрди.

Мурасимда өсмүр балилар абдуреһим өткүрниң 'из', абдухалиқ уйғурниң 'ойған' намлиқ шеирлирини җараңлиқ декламатсийә қилди, кейин башқа бир гуруппа оқуғучилар 'гүзәл түркистан' намлиқ нахша оқуди, оқуғучилар тәрипидин тәқдим қилинған ' үрүмчи вәқәси вә хитайниң зулум ‏ - искәнҗилири тәсвирләнгән ' итот кишиләрни бәк тәсирләндүрди.

Мурасим ахирида шәрқий түркистан маарип вә һәмкарлиқ җәмийитиниң мәсуллири оқуғучиларға мукапат боюмлири тарқатти. Биринчи дәриҗилик мукапатқа еришкән 2 оқуғучи бир талдин түркийә йерим җумһурийәт алтуни, иккинчи дәриҗилик мукапатқа еришкәнләр чарәк җумһурийәт алтуни, 3 - дәриҗилик мукапатқа еришкәнләр бир талдин қол сомкиси вә мадди әшялар билән мукапатланди. Ахирида курсқа қатнашқан барлиқ оқуғучиларға қол сомкиси мукапат берилди.

Юқиридики аваз улинишидин, бу һәқтики мәлуматимизниң тәпсилатини аңлайсиләр.
 
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.