Istanbuldiki 15 - nöwetlik türk dunyasi balilar pa'aliyitide Uyghur ösmürler

6 ‏ - Ayning 1 ‏ - künidin 4 ‏ - künigiche 4 kün dawam qilghan 15 ‏‏ - nöwetlik turk dunyasi balilar uchrishish paaliyitide uyghur ösmürler.

Istanbul waliyliqi bilen türk dunyasi tetqiqat wexpi teripidin birlikte uyushturulghan 15 ‏‏ - nöwetlik turk dunyasi balilar uchrishish pa'aliyiti 2009 ‏ - yili 6 ‏ - ayning 4‏ - küni istanbulda ghelibilik axirlashti.

6 ‏ - Ayning 1 ‏ - künidin 4 ‏ - künigiche 4 kün dawam qilghan bu pa'aliyetke qazaqistan, özbékistan, qirghizistan, türkmenistan qatarliq 41 dölet we rayonlardin kelgen türk millitige mensup 11 ‏ - yashtin 13 ‏ - yash arisidiki 600 ge yéqin ösmür balilar istanbulda jem bolup tilda, dilda, pikirde bir ikenlikini dunyagha körsetti.

Bu pa'aliyetke Uyghur balilargha wakaliten sherqiy türkistan wexpining orunlashturushi bilen 20 neper Uyghur ösmürliri qatnashti.

Pa'aliyetning 3 ‏ - künidiki programmisi istanbuldiki ali samiyen putbol meydanida ötküzüldi. 30 Ming kishilik putbol meydani pa'aliyet ishtirakchiliri bilen liq toldi,meydanning töt etrapigha 41 döletning chong hejimdiki bayraqliri ésilghan bolup, u qatarda sherqiy türkistan bayriqimu orun alghan. Pa'aliyet bashlinishtin ilgiri türk dunyasi tetqiqat wexpining re'isi turan yazghan ependi we istanbul waliysi mu'emmer güler échilish nutiqi sözlidi.

Istanbul waliysi mu'emmer güler sözide mundaq dédi: tarixning chongqur qatlamlirida bizni öz‏ - ara zich baghlap turghan ortaq bir tarix we kültürimiz bar. Buni bir ‏ - birige zich baghlighan ortaq bir til bar. Buning qimmitini bek yaxshi chüshinishimiz lazim, bularning bizge élip kélidighan payda ‏ - menpe'eti medeniy bayliqlar bilen siyasiy we iqtisadi bir küch bar. Sharsiman dunyada buningdin eng yaxshi shekilde paydilinishimiz lazim.

Kéyin her qaysi dölettin kelgen ösmür balilar ayrim ‏ - ayrim guruppa bolup özlirining milliy kiyimlirini kiyishken halda öz dölitining bayriqigha egiship piyade yürüp meydanni aylinip istanbul waliysi mu'emmer gülerge salam bérip ötti.

Uyghur ösmürliri chimen doppa, etles köyneklirini kiygen bolup, qollirida ay yultuzluq kök bayraq we chong hejimde sherqiy türkistan dégen xet yézilghan wiwiska taxtini kötürgen halda meydanni aylinip istanbul waliysi mu'emmer güler qatarliq méhmanlargha salam bérip ötti. Ular sehne aldigha kelgende, mikrafunda sherqiy türkistan keldi dep élan qilindi. Kishiler chawak chélip alqish bilen qarshi aldi. Kéyin her qaysi dölet we rayon'gha wekillik qilidighan ösmür balilar özlirining milliy usulini oynidi, Uyghur ösmürliri gülmerem dégen naxsha muzikisigha usul oynidi we qizghin alqishqa érishti.
 
Bu pa'aliyette piyade yürüsh qilip özini körsitish, naxsha éytish, usul oynash, awaz musabiqisi élip bérish qatarliq programmilar orunlashturulghan bolup, axirida awaz musabiqisi ötküzüp ilghar bolup tallan'ghanlar mukapatlandi.

Biz pa'aliyet axirida bu pa'aliyetke qatnashqan Uyghur balilar we sherqiy türkistan wexpining bash katipi hamut köktürk ependi bilen bu pa'aliyet heqqide söhbet élip barduq.

Yuqiridiki awaz ulinishidin, bu heqtiki melumatimizning tepsilatini anglaysiler.