Истанбулда 'уйғур пән ‏- маарипиниң бүгүни вә кәлгүси тәрәққияти' дегән темида илмий муһакимә йиғини өткүзүлди

2010 ‏- Йили, 5 ‏- айниң 9 ‏- күни мәркизи истанбулға җайлашқан хәлқара уйғур академийисиниң уюштуруши билән "уйғур пән ‏- маарипиниң бүгүни вә кәлгүси тәрәққияти" дегән темида илмий муһакимә йиғини өткүзүлди.
Мухбиримиз арислан
2010.05.11
Uyghur-pen-texnika-muhakime-yighini-305.jpg Сүрәт, 2010 ‏- йили, 5 ‏- айниң 9 ‏- күни мәркизи истанбулға җайлашқан хәлқара уйғур академийисиниң уйуштуруши билән өткүзүлгән "уйғур пән ‏- маарипиниң бүгүни вә кәлгүси тәрәққийати" дегән темидики илмий муһакимә йиғинидин бир көрүнүш.
RFA Photo / Arslan

Йиғинға, америкиниң "наса" дәп аталған аләм бошлуқи тәтқиқат мәркизиниң хадими, шундақла уйғур академийисиниң пәхри рәиси әркин сидиқ, әгә университети түрк дуняси тәтқиқат институтиниң оқутқучиси профессор доктор алимҗан инайәт қатарлиқларни өз ичигә алған бир қисим уйғур мутәхәссислири һәм һәр қайси университетларда һәр хил кәсипләр бойичә докторлуқ унвани үчүн оқуватқан вә оқуш пүттүргән зиялийлардин көп санда адәм қатнашти.

Йиғинда алди билән уйғур академийисиниң йеңидин сайланған рәиси профессор доктор алимҗан инайәт әпәнди сөзгә чиқип, уйғур академийисиниң қурулуши вә тунҗи нөвәтлик омумий йиғинидин мәлумат бериш билән биргә, уйғур академийисиниң ғайә вә мәқсәтлири һәм буниңдин кейин қилмақчи болған хизмәт пиланлири һәққидә сөз қилди.

Йиғин икки бөлүмгә айрилған болуп, биринчи бөлүмидә , уйғур физика алими әркин сидиқ әпәнди, "уйғур маарипи вә қош тил", әнқәрә университети тил, тарих вә җуғрапийә факултети уйғур тили бөлүминиң оқутқучиси доктор әркин әмәт әпәнди, "уйғур тили вә маарип", һаҗәтәпә университети тарих бөлүминиң оқутқучиси дотсент доктор әркин әкрәм әпәнди "тарих вә истратегийә: уйғур маарипидики саһәләр ара мунасивәт", уйғур академийисиниң йеңидин сайланған рәиси профессор доктор алимҗан инайәт әпәнди, "уйғур маарипиниң өтмүши, бүгүни вә кәлгүси" дегән темиларда сөз қилди.

Йиғинниң иккинчи бөлүмидә, америка, японийә, түркийә қатарлиқ дөләтләрдә оқуш пүттүрүп шу дөләтләрдә өзлириниң кәспи бойичә хизмәт қиливатқан йәнә бир қисим уйғур мутәхәссислири охшимиған темиларда сөз қилди.

Йиғинда әркин сидиқ әпәнди, миллий кимликни сақлаш, миллий роһни әслигә кәлтүрүш вә миллий сапани өстүрүш һәққидә сөз қилди. Йиғин ахирида йәнә, йиғинда сөз қилған алимлар йиғин иштиракчилириниң уйғур маарипиға алақидар сориған соаллириға җаваб бәрди.

Уйғур академиклар җәмийити, 2009 - йили, 9 - айда түркийидә оқу - оқутуш вә илмий тәтқиқат билән шуғуллиниватқан уйғур зиялийлири тәрипидин қурулған болуп, бу, түркийә җумһурийити һөкүмити тәрипидин тәстиқлинип рәсмий әнгә елинған, илим - пән вә маарип ишлирини алий ғайә қилған бир илмий җәмийәттур.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.