Istanbulda 'Uyghur pen ‏- ma'aripining bügüni we kelgüsi tereqqiyati' dégen témida ilmiy muhakime yighini ötküzüldi

2010 ‏- Yili, 5 ‏- ayning 9 ‏- küni merkizi istanbulgha jaylashqan xelq'ara Uyghur akadémiyisining uyushturushi bilen "Uyghur pen ‏- ma'aripining bügüni we kelgüsi tereqqiyati" dégen témida ilmiy muhakime yighini ötküzüldi.
Muxbirimiz arislan
2010.05.11
Uyghur-pen-texnika-muhakime-yighini-305.jpg Süret, 2010 ‏- yili, 5 ‏- ayning 9 ‏- küni merkizi istanbulgha jaylashqan xelqara uyghur akadémiyisining uyushturushi bilen ötküzülgen "uyghur pen ‏- maaripining bügüni we kelgüsi tereqqiyati" dégen témidiki ilmiy muhakime yighinidin bir körünüsh.
RFA Photo / Arslan

Yighin'gha, amérikining "nasa" dep atalghan alem boshluqi tetqiqat merkizining xadimi, shundaqla Uyghur akadémiyisining pexri re'isi erkin sidiq, ege uniwérsitéti türk dunyasi tetqiqat institutining oqutquchisi proféssor doktor alimjan inayet qatarliqlarni öz ichige alghan bir qisim Uyghur mutexessisliri hem her qaysi uniwérsitétlarda her xil kesipler boyiche doktorluq unwani üchün oquwatqan we oqush püttürgen ziyaliylardin köp sanda adem qatnashti.

Yighinda aldi bilen Uyghur akadémiyisining yéngidin saylan'ghan re'isi proféssor doktor alimjan inayet ependi sözge chiqip, Uyghur akadémiyisining qurulushi we tunji nöwetlik omumiy yighinidin melumat bérish bilen birge, Uyghur akadémiyisining ghaye we meqsetliri hem buningdin kéyin qilmaqchi bolghan xizmet pilanliri heqqide söz qildi.

Yighin ikki bölümge ayrilghan bolup, birinchi bölümide , Uyghur fizika alimi erkin sidiq ependi, "Uyghur ma'aripi we qosh til", enqere uniwérsitéti til, tarix we jughrapiye fakultéti Uyghur tili bölümining oqutquchisi doktor erkin emet ependi, "Uyghur tili we ma'arip", hajetepe uniwérsitéti tarix bölümining oqutquchisi dotsént doktor erkin ekrem ependi "tarix we istratégiye: Uyghur ma'aripidiki saheler ara munasiwet", Uyghur akadémiyisining yéngidin saylan'ghan re'isi proféssor doktor alimjan inayet ependi, "Uyghur ma'aripining ötmüshi, bügüni we kelgüsi" dégen témilarda söz qildi.

Yighinning ikkinchi bölümide, amérika, yaponiye, türkiye qatarliq döletlerde oqush püttürüp shu döletlerde özlirining kespi boyiche xizmet qiliwatqan yene bir qisim Uyghur mutexessisliri oxshimighan témilarda söz qildi.

Yighinda erkin sidiq ependi, milliy kimlikni saqlash, milliy rohni eslige keltürüsh we milliy sapani östürüsh heqqide söz qildi. Yighin axirida yene, yighinda söz qilghan alimlar yighin ishtirakchilirining Uyghur ma'aripigha alaqidar sorighan so'allirigha jawab berdi.

Uyghur akadémiklar jem'iyiti, 2009 - yili, 9 - ayda türkiyide oqu - oqutush we ilmiy tetqiqat bilen shughulliniwatqan Uyghur ziyaliyliri teripidin qurulghan bolup, bu, türkiye jumhuriyiti hökümiti teripidin testiqlinip resmiy en'ge élin'ghan, ilim - pen we ma'arip ishlirini aliy ghaye qilghan bir ilmiy jem'iyettur.

Yuqiridiki awaz ulinishidin, bu heqtiki melumatimizning tepsilatini anglaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.