Истанбулда шәрқий түркистан маарип вә һәмкарлиқ җәмийтиниң йәнә бир шөбиси ечилди

Истанбул шәһиригә қарашлиқ күчүкчәкмәҗә ‏- сәфакүй районида шәрқий түркистан маарип вә һәмкарлиқ җәмийтиниң шөбиси ечилип, 2010 ‏- йили 1 ‏- айниң 30 ‏- күни шөбиниң ечилиш мурасими өткүзүлди.
Мухбиримиз арислан
2010.02.01
Share on WhatsApp
Share on WhatsApp
Istanbul-Safakoyda-Maarip-Jemiyiti-shobisi-echildi-305.jpg Сүрәт, 2010 ‏- йили 1 ‏- айниң 30 ‏- күнидики истанбул шәһиригә қарашлиқ күчүкчәкмәҗә ‏- сәфакүй районида шәрқий түркистан маарип вә һәмкарлиқ җәмийти шөбисиниң ечилиш мурасимиға қатнашқан миһманлардин бир көрүнүш.
RFA Photo / Arslan

Мурасимға шәрқий түркистан маарип вә һәмкарлиқ җәмийитиниң мәсуллири вә истанбулда яшаватқан уйғурлардин көп санда киши қатнашти. Ечилиш мурасимға йәнә күчүкчәкмәҗә шәһәр башлиқи әзиз йениай башчиқилидики бир һәйәт, адаләт вә тәрәққият партийисиниң күчүкчәкмәҗә районлуқ шөбә башлиқи тәмәл қарадеңиз вә пишқәдәм вәтәнпәрвәр зат сәләй һаҗим артуши иштирак қилди.

Мурасимда истанбул ‏- күчүкчәкмәҗә шәһәр башлиқи әзиз йениай, адаләт вә тәрәққият партийисиниң күчүкчәкмәҗә раюнлуқ шөбә башлиқи тәмәл қарадеңиз сөз қилди. Мурасимда шәрқий түркистан маарип вә һәмкарлиқ җәмийтиниң рәиси һидайәтуллаһ оғузхан сөз қилип, шәһәр башлиқи әзиз йениай башчилиқидики һәйәткә, уйғурлар вә шәрқий түркситан мәсилиси һәққидә қисқичә доклат бәргәндин кейин, шәрқий түркситан маарип вә һәмкарлиқ җәмийитиниң хизмәт ‏- паалийәтлирини тонуштуруп өтти.

Истанбулниң сәфакүй райони чоң вә ават районлиридин бири болуп, бу районда 500 дин артуқ уйғур аилиси яшайду. Шәрқий түркистан маарип вә һәмкарлиқ җәмийти 2008 ‏- йили истанбулниң зәйтинбурну районида шөбисини ачқан иди.

Мурасим ахирида, шәһәр башлиқи әзиз йениай вә адаләт вә тәрәққият партийси күчүкчәкмәҗә районлуқ шөбә башлиқи тәмәл қарадеңиз әпәндиләргә уйғур допписи тәқдим қилинди.

Биз мурасим ахирида шәһәр башлиқи әзиз йениай вә шәрқий түркистан маарип вә һәмкарлиқ җәмийити рәиси һидайәтуллаһ оғузхан әпәндиләр билән сөһбәт елип бардуқ.

‏-- Һөрмәтлик шәһәр башлиқи, бүгүн бу йәрдә уйғурларни зиярәт қиливатисиз, шәрқий түркистандики уйғурлар һәққидә немиләрни ойлаватисиз?

‏-- Һазир хусусән шәрқий түркситан уйғур районида узун йиллардин бири җиддий зулум болуватиду, пат ‏- пат қәтлиамлар йүргүзүлүватиду, һәтта бу қәтлиам қирғинчилиққа айлиниватиду, әпсуслинарлиқи, у йәрдики қандашлиримизға, қериндашлиримизға зулумлар қилиниватиду, алди билән мән бир инсан болуш сүпитим билән, буни һәқиқәтән инсанийәткә дағ тәккүзидиған чоң бир әйиб дәп билимән вә буниңдин биарамлиқ һес қиливатимиз. Биз бу йәрдә, шәрқий түркистандики қериндашлиримизниң дәсләптә өз әркинликлиригә игә болушлирини арзу қилимиз, улар миллий салаһийитини қоғдиялиғидәк шәкилдә өзи пут тирәп туралайдиған күн йеитп кәлгәндә, бу биз үчүн байрам күни болиду, чүнки һәр қандақ инсанниң, һәр қандақ милләтниң өз миллий ядикарлиқлириға, мәдәнийәтлиригә игә чиқип яшаш һәққи бар. Бу мәнада хусусән у райондики зулумни, у райондики тарихи җәрянни һәммимиз йеқиндин көзитип келиватимиз, буни бир түрк болуш сүпитимиз билән һөҗәйрлиримиздә, ичимиздә һес қиливатимиз, у йәрдики қериндашлиримизға тинчлиққа еришидиған, хушаллиққа чүмидиған күнләрниң келиши үчүн аллаһқа дуа қилимиз. Бу һәқтә түркийә җумһурийити һәр саһәдә ярдәм қилиду, у йәрдики қериндашлиримизниң, у йәрдики қандашлиримизниң йүзлири күлгән күнләр бизниң үчүн байрам күни болиду.

‏-- Һөрмәтлик шәһәр башлиқи, әркин асия радиоси арқилиқ уйғурларға йоллайдиған бирәр сөзиңиз барму?

‏-- У йәрдики қериндашлар бизниң қериндашлиримиз, у йәр бизниң ата юртимиз, биз әсли у йәрдин кәлгән, улар бизниң қан қериндашлиримиз, уларға һәр түрлүк һөрмәт вә салам йоллаймиз, гәрчә биз түркийидә болсақму, бир путимиз, бир қәдимимиз у йәрдә, роһлиримиз у йәрдә, әқлимиз у йәрдә, биз һәр заман у йәрдики қериндашлиримиз билән биргә. Уларни дуалиримизда яд етимиз.

Юқиридики аваз улинишидин, бу һәқтики сөһбитимизниң тәпсилатини аңлайсиләр.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт