Җасус гумандари бабур мәхсут йәнә сотланди

Шветсийидики хитай җасуси бабур мәхсут, шветсийә граждани, ‏61 ‏яшлиқ уйғур. 2007-Йили 6-май.

Соттин кейин шиветсийә радиосиниң зияритини қубул қилған җасус гумандариниң баш әйиблигүчиси томас линдстранд әйиблинишниң сәвәблири һәққидә тохтилип мундақ дәйду: "у чәтәлдә яшаватқан уйғурларниң шәхсий һаятиға, саламәтликигә, сияси панаһлиқ тиләш әһвалиға мунасивәтлик тәпсилатларни вә уйғурларниң һәр хил сияси паалийәтлиригә мунасивәтлик материялларни, болупму дуня уйғур қурултийиға мунасивәтлик материялларни, дуня уйғур қурултийи билән қоюқ алақиси бар он нәччә адәмниң әһваллирини, шундақла хитай һөкүмити билишни халиған һәрқандақ әһвалларни хитай һөкүмитиниң шиветсийидә дипломат вә мухбирлиқ салаһити билән паалийәт елип бериватқан хитай җасуслуқ органлириниң хадимлириға тапшуруп бәргән."

У йәнә мундақ дәйду: "хитай ишпийонлуқ органлириға материяли тапшуруп берилгән бу уйғурларниң бир қисми чәтәлдики уйғур һәрикитиниң муһим адәмлири болса, йәнә бир қисми хитай һөкүмити тәрипидин террорист елан қилинған кишиләрдур. Әгәр униң бу һәрикити йәнә мушундақ узун давамлашса яки бир системиға айлинип қалса, материяли  хитай җасуслуқ органлириға тапшуруп берилгән кишиләрниң аилисидикиләргә яки туғқанлириға еғир зиян - зәхмәт йетиши мумкин. Ким билиду, бу чаққичә қанчилик инсан бу ишниң зийиниға учрап болди."

Шиветсийә ахбарат агентлиқиниң тарқатқан бир хәвиридә әйиблигүчиниң сөзи нәқил қилинип мундақ йезилиду: "ишпийон гумандари хитай ишпийонлуқ органлириға материял йоллашта мәхпий тутуш, алдаш қатарлиқ килассик ишпийонлуқ васитилирини қолланған болуп, көпинчә вақитларда коча телефонлирида телефон қилған, зөрүр тепилғанда бәлгиләнгән орунларда мәхпий учрашқан. У дуня уйғур қурултийиға мунасивәтлик учурларға игә болуш үчүн ялғандин уйғур дәвасиға көңүл бөлидиған қияпәткә киривалған."

Шиветсийә ахбарат агентлиқиниң тарқатқан бу хәвәрдә йәнә мундақ дейилиду: "ишпийон гумандари хитай ишпийонлуқ органлириниң хадимлириға йәткүзгән материяллири үчүн давамлиқ һәқ елип турған, сақчилар униң өйини ахтурғанда униң чапининиң янчуқидин 110 миң крон шиветсийә пули чиққан. Шиветсийә қануни бойичә  бухил қанунсиз ахбарат йәткүзүш җинайити бекитилсә әң көп болғанда 4 йил түрмә җазаси берилиду. Бирақ, ишпийон гумандари һазирчә җинайитигә иқрар болмиғанлиқи үчүн 1 - айда йәнә сот ечилиду."

Юқиридики аваз улинишидин, бу һәқтики мәлуматимизниң тәпсилатини аңлайсиләр.