Мюнхендики уйғурлар арисиға селинған җасус сотланди

Германийә ахбарат агентлиқиниң 12-сентәбирдики хәвиригә асасланғанда, хитай тәрипидин германийиниң мюнхен шәһиридики уйғурлар арисиға селинған хитай җасуси 11-сентәбир күни сотқа тартилған.
Ихтиярий мухбиримиз әкрәм
2011.09.15
myunxen-sot-mehkimisi-305.jpg Мюнхен сот мәһкимиси. 2006-Йили апрел.
en.wikipedia.org

Мәзкур сотниң хәвири 12-сентәбир күни германийидики “дуня вақит гезити” қатарлиқ бирқисим даңлиқ гезитләрдә вә көплигән интернет тор бәтлиридә елан қилинған. Илгири мюнхендики төт нәпәр уйғурниң хитайға җасуслуқ қилғанлиқ гумани билән өйлириниң ахтурулғанлиқ хәвири мәтбуатларда йәр алған вә уйғурлар арисида күчлүк ғулғула қозғиған иди. Бу қетим сотқа тартилған хитай җасуси шуларниң бири болуп, у германийә бихәтәрлик даирилири тәрипидин сәккиз күн тутуп турулуп сорақ қилинған.

Хәвәрдә 2005-йилидин 2009-йилиғичә хитайниң мюнхендики консулиниң қоманданлиқи билән уйғурлар арисиға селинған 63 яшлиқ бу җасусниң асаси вәзиписиниң д у қ ни мәхпий назарәт қилиш, ахбарат топлаш болғанлиқи баян қилинған. Хәвәрдә көрситилишичә, уйғурлар арисиға селинған бу җасус бейҗиң бихәтәрлик даирилиригә сетилған болуп, хитай һөкүмити тәрипидин чәтәлдики “бәш зәһәрлик орган” ниң бири вә әң чоңи болған д у қ ни тәқиб қилиш вәзиписигә тәйинләнгән. У германийә бихәтәрлик даирилиригә өзиниң қилмишлири тоғрисида иқрар қилған.

Хәвәрдә бу җасусниң исим, фамилиси тилға елинмиған. Униң 63 яшлиқ бир киши болғанлиқи, илгири уйғур вәтинидә оқутқучилиқ билән шуғулланғанлиқи, хитайға сетилғандин кейин, хитайниң мюнхендики консули билән мәхпий алақилишип, уларни уйғурларға вә уйғур тәшкилатлириға аит ахбаратлар билән тәминлигәнлики сөзләнгән. 13-Сентәбир күни йәнә мюнхенда чақирилған сотқа бир қисим уйғур сиясий паалийәтчилириму гуваһчи сүпитидә қатнашқан болуп, уларниң ичидә д у қ ниң сабиқ рәиси әркин алиптекин әпәнди, д у қ ниң баш катипи долқун әйса әпәндиләрму барикән.

Бу қетимқи сотниң мәтбуатлардики хәвиридин вақип болған мюнхендики уйғурлардин турсун әпәнди сотқа тартилған бу кишиниң әсли исминиң ләнсаң болғанлиқини, германийигә кәлгәндин кейин өзини шөһрәт дегән уйғурчә исим билән атап йүргәнликини, миллитиниң шевә икәнликини, илгири ғулҗида оқутқучилиқ билән шуғулланғанлиқини вә уйғурчини раван сөзләйдиғанлиқини ейтти.

13-Сентәбир күни сотқа қатнашқан д у қ баш катипи долқун әйса әпәнди бу тоғрида әтраплиқ мәлумат берип өтти. Диққитиңлар бу сөһбәт хатирисидә болғай.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.