Ulghiyiwatqan jenubiy junggo heptilik géziti weqesi heqqide uchur we inkaslar

Gézitning yene bir türküm muxbir we tehrirliri wezipisidin istépa bérip, döletning axbarat cheklimisige naraziliq bildürgen idi. Nöwette xitay we xelq'ara axbarat wasitiliride “Jenubiy junggo heptilik géziti weqesi” dep atiliwatqan bu weqening kölimi we tesiri barghanséri kücheymekte.

Eslide jenubiy junggo heptilik gézitining yéngi yilliq tebrik sözide asasiy qanun islahati chaqiriq qilin'ghan. Teshwiqat tarmaqliri tebriktiki bu chaqiriqni chiqiriwétip, ornigha kompartiyining netijilirige medhiye oqughan.

Mezkur gézit muxbir we tehrirliri naraziliq herikitini bashlighandin kéyin, ulargha qollighuchilar her sahege kéngiyip, her sahe kishiliri oxshimighan shekiller arqiliq, mezkur gézit muxbirlirining naraziliq heriketlirini qollighan. Tünügün bir türküm kishiler jenubiy junggo heptilik géziti qorusining aldigha toplinip, xizmet tashlighan muxbir we tehrirlerge hörmet bildürgen.

Tünügün yene béyjing, fujyen, jyangsu, shangxey, chéngdu we jéjang qatarliq jaylardiki chong gézitxanilar aldida shu jaydiki erkinlik terepdari kishiler toplinip, jenubiy junggo géziti muxbirlirini qollaydighanliqini bildürgen. Ular qolliridiki lozunka we towlighan sho'arliri arqiliq, döletning axbarat cheklimisige naraziliq bildürgen.

Nöwette yene xitaydiki bir qisim meshhur shexsler we kino cholpanliri öz torbetliride bayanat élan qilip mezkur gézit muxbirlirigha hésdashliqini bildürüshmekte. Kino cholpanliridin li bingbing bu heqte ipade bildürüp, “Zimistanning baldurraq kétishini, baharning tézrek kélishini xalaymen” dégen. Meshhur naxshichi chén kün bolsa “Qelbim jenubiy junggo gézitidiki dostlar bille” dep ipade bildürgen. 3 Milyondin artuq tordishi bolghan cholpan yaw chén, “Bir jümle rast sözning salmiqi dunyaning éghirliqini bésip chüshidu” déyish arqiliq, jenubiy junggo heptilik gézitining sap axbaratchiliq istiligha medhiye oqughan.

Mezkur weqe nöwette teywen we xongkongdiki xitaylar, shundaqla chet'ellerdiki kishilik hoquq pa'aliyetchiliriningmu diqqitini tartmaqta. Bügün teywen medeniyet ministiri jenubiy junggo heptilik gézitige medhiye oqup, uning yalghuz xitaydila emes, teywendimu zor inawetke we ishenchke ige bir axbarat orni ikenlikini bayan qilghan we xitay hökümitini mezkur weqeni aqilanilik bilen bir terep qilishqa chaqirghan. Xongkong muxbirlar jem'iyitimu bu heqte bir bayanat élan qilip, jenubiy junggo géziti muxbirlirining telipining tolimu addiy we heqqaniy bir telep ikenlikini otturigha qoyghan. Bayanatta yene, xitay asasiy qanunining 35-maddisi neqil keltürülüp, xitay dölitini puqralarning söz we neshriyat erkinlikige hörmet qilishqa chaqirghan. Xongkongdiki démokratik birliksep teshkilati bügün namayish ötküzüp, xitayni axbarat cheklimisini bikar qilishqa chaqirghan.

Tünügün amérika tashqi ishlar bayanatchisi jenubiy junggo heptilik géziti weqesi heqqide pikir bayan qilip, mezkur gézit muxbirlirining heqqaniyetchilik rohigha apirin oqughan. Xitayni puqralirining heq-hoquqlirigha hörmet qilishqa chaqirghan. Xitay tashqi ilar bayanatchisi bügün buninggha inkas qayturup, xitayda axbarat cheklimisi yoqluqini, puqralarning erkin sözlesh hoquqining kapaletke ige ikenlikini bildürdi we amérikini xitayning ichki ishlirigha arilashmasliqqa dewet qildi.

Bügün xitayning dölet axbarat organliridin yer shari waqti géziti bu heqte bir obzor élan qilip, jenubi junggo heptilik géziti weqesining yasalma bir weqe ikenlikini, weqeni ulghaytiwatqanlarning xitay xelqining asasi qismigha wekillik qilalmaydighanliqini éytqan. Da'iriler bu obzorni herqaysi gézit, zhurnallarning köchürüp bésishini teshebbus qilghan؛ obzorni köchürüp basqan bezi metbu'atlar, kirish sözliride özlirining amalsizliqini ipadiligen. Buning bilen xitay torbetliride mezkur weqe heqqidiki talash-tartishlar téximu keskinliship, bir türküm kompartiye terepdari kishilermu namayish ötküzüp, xitay kompartiyisini qollaydighanliqini bildürüshken we mezkur gézitxana xadimlirini eyibligen.

Melum bolushiche, bügün gu'angdung ölkisining yéngi bashliqi xu chünxu'a weqege biwasite ariliship, ish tashlighan muxbirlarni ish ornigha qaytip kélishke we gézitning neshrini derhal eslige keltürüshke chaqirghan, u yene ötken ishlarning hésabi élinmaydighanliqi heqqide wede bergen.

Nöwette bu weqe roytris, birleshme agéntliqi we b b s qatarliq dangliq xelq'ara axbarat wasitilirining qiziq nuqta xewerlirige aylanmaqta we xitayda 1989-yildin buyan muxbirlarning tunji qétim réjimgha qarshi isyan kötürüshi dep qaralmaqta.